Psa 90 | MEU | STEP | Ḡaubada e, emai noho gabuna oi mo, uru iboudiai lalodiai.

‏ Psalms 90

1 Ḡaubada e, emai noho gabuna oi mo,
uru iboudiai lalodiai.
2 Ororo do asie vara,
tanobada bona motumotu do so kara,
una negana ema bona hari ela bona hanaihanai
oi mo Duava.
3 Oi ese taunimanima na ḡahu ai ma o halaodiamu,
ini o gwau tomamu
“Taunimanima natuna loḡora e, ba lou”.
4 Badina be laḡani daha oi vairamu ai na varani na heto vada e ore,
eiava hanuaboi hegima negana tamona na heto.
5 Oi ese taunimanima na o ha-arudia oho; idia na nihi na heto;
idia na rei daba ai e vara loumu na heto:
6 daba ai e varamu, e tubumu;
adorahi ai e maraimu bona e kakoromu.
7 Badina be emu badu ese e habuamai tari,
emu badu ese e ḡovamai.
8 Emai kara havara na oi vairamu ai vada o ato lasi,
bona emai kerere hehunidia na oi vairamu diarina ai danu.

9 Badina be emai dina iboudiai na oiemu badu henunai vada e lao bubuni;
emai mauri laḡanidia vada e oremu,
hahodi tamona na heto.
10 Emai mauri laḡanidia na hitu-ahui,
eiava goada dainai bae taurahani-ahui readia;
to idia na hekwarahi ai bona lalo-hisihisi ai e honu honu daemu;
idia na e ore haraḡamu, bena ai na dauha a roho laomu.

11 Daika ese emu badu siahuna e laloamu?
Daika ese emu badu na igari-henimu ida e haheḡereḡereamu?
12 Oi ese emai dina ihagaudia ba hadibamai,
bena lalomai ese aonega bae davari.
13 Iehova e, a lou mai! Edena nega ai baoma?
Emu hesiai taudia a bogadia hisi.
14 Daba ai emu hebogahisi amo ba ubumai;
emai dina iboudiai baia hisi dae bona baia moale helaoreana.
15 Ba hamoalemai dinadia na o hahisimaiva dinadia ida ba haheḡereḡeredia,
bona dika a mamiava laḡanidia ida danu bae heḡereḡere.
16 Emu ḡaukara baine hedinarai emu hesiai taudia vairadiai,
bona emu siahu herea-daena na idia natudia vairadiai.
17 Iehova, emai Dirava, ena lalo-namo na latamai ai baine mia,
bona imamai ḡaukaradia ba haginidia ai emai ai;
oibe, imamai gaukaradia ba haginidia.