Psa 91 | MEU | STEP | Herea Mikamika metaina ai e nohomu tauna, Siahu-idoinai Diravana ikerukeruna ai e nohomu tauna ese

‏ Psalms 91

1 Herea Mikamika metaina ai e nohomu tauna,
Siahu-idoinai Diravana ikerukeruna ai e nohomu tauna ese
2 Iehova baine hereva henia, baineto,
“Egu roho-mauri gabuna bona egu kohoro;
egu Dirava, na abidadama henimumu”.
3 Ia ese manu-tahu tauna ena idoa amo baine harohomu mauri,
mase gorerena amo baine hamaurimu.
4 Ia ese ia hanina amo baine gorumu ahu,
ia hanina henudiai emu roho-mauri gabuna ba davaria;
iena heabidadama na emu kesi bona keme aurina.
5 Hanuaboi ena hahegari na basio garilaia,
dina ai e kinomu dibana danu garina basio gari;
6 hanuaboi ai e dai hanaimu gorerena,
bona dina tubua ai e kaumu hahebua-tarina danu.

7 Taunimanima daha na ohemu ai bae keto,
bona gerebu na oi imamu idibana kahana ai;
a basine hakahikahimu.
8 Matamu amo ba roha roha,
kara dika taudia davadia e abimu ba itaia.

9 Iehova na emu roho-mauri gabuna ai vada o halaoa,
Herea Mikamika na emu noho gabuna bunai;
10 una dainai dika ta emu ai basine kau,
gorere ta emu kalaga basine hakahikahia.

11 Badina be ia ese ena aneru baine haduadia,
emu dala iboudiai bae gimamu.
12 Idia ese imadia ai bae abimu isi,
aemu na nadi ai ba tutuhia na garina.
13 Leona bona hekori gaigaina do ba moidia,
leona natuna bona gaigai na aemu amo ba moidia tao.

14 Ia ese e lalokau henigumu dainai,
lau ese baina hamauria;
lau ese baina gimaia,
badina be lau ladagu na dibana.
15 Baine boi henigu negana ai,
lau ese baina haere henia;
lau ese ena hekwarahi ai baina bamoa,
baina hamauria, bona imatauraina baina henia.
16 Mauri dinadia momo baina henia;
egu hahemauri baina hahedinarai henia.