Psa 94 | MEU | STEP | Iehova e, dika davana ihenina Diravana, dika davana ihenina Diravana e, a diari.

‏ Psalms 94

1 Iehova e, dika davana ihenina Diravana,
dika davana ihenina Diravana e, a diari.
2 Tanobada ihahemaoro-henina Diravana e, a tore isi,
heaḡi taudia na davadia ba henidia.
3 Iehova e, kara dika taudia na ela bona edena nega ai,
ela bona edena nega ai, bae heaḡi?

4 Edia heaḡi herevadia e gwaurai momomu,
kara havara taudia iboudiai na e hekokorokumu.
5 Iehova e, emu bese taudia e moidia taomu,
emu tano e hadikaiamu;
6 vabu bona idau tauna e aladiamu,
ihareha e aladia masemu.
7 Idia na e tomu: Iehova ese se itaiamu;
Iakob ena Dirava ese se laloamu.

8 Lalo-duhu herea taumui e, ba diba.
Kavakava taumui e, edena nega ai lalomui bae parara?
9 Taia vada e ato Diravana na se kamonaimu a?
Mata vada e kara Diravana na se itamu a?
10 Bese idau-idau matadia e hakanimu Diravana na
dava basine heni a?
Taunimanima e ha-aonegadiamu Diravana,
11 Iehova, ia na taunimanima edia lalo-hadai dibana;
ia dibana idia na hahodi tamona na heto.

12 Iehova e, matana o hakaniamu tauna be namo,
emu taravatu o hadibalaia tauna danu.
13 Hekwarahi dinadia ai na laḡa-ani o heniamu,
ela bona kara dika taudia iabidia rikirikina gurina baine heḡei.
14 Badina be Iehova ese ena bese taudia na basine rakatanidia;
ena tano danu basine rakatania.
15 Badina be hahemaoro ḡoevaḡoevana ese kara maoromaoro taudia baine lou henidia,
bona lalo-ḡoevaḡoeva taudia iboudiai ese bae ḡavaia.

16 Daika baine tore isi, baine durugu,
kara dika taudia ilao-ahudia?
Daika baine gini tore, baine kahagu,
kara havara taudia ilao-ahudia?
17 Iehova basinema durugu,
lau laumagu na asi reḡereḡena tanona bema hanoho haraḡa.
18 Lau banava nato “Aegu e dedimu” negana ai,
Iehova e, emu hebogahisi ese e dogogu tao;
19 Ialogu e hekwarahi momomu negadia ai,
emu tauhalo ese laumagu e hamoaleamu.
20 Lohia dikadia na oi ida bae hebou diba a?
Idia ese edia taravatu amo dika e havaraiamu.
21 Idia na e henega boumu, kara maoromaoro taudia edia mauri iabiohona totona;
idia ese asi edia kerere taudia na e revadia mase.
22 A Iehova na egu kohoro;
egu Dirava na egu roho-mauri nadi-ginina.
23 Edia kara havara na idia latadiai ma baine haloua,
bona edia kara dika daidiai baine ha-oredia;
Iehova iseda Dirava ese baine havahuradia.