Rom 1 | MEU | STEP | Lau Paulo, Iesu Keriso ena hesiai taugu, e boirigu ena aposetolo tauna ai bainala, bona e hahelagagu Dirava ena sivarai namo baina harorolaia.

‏ Romans 1

1 Lau Paulo, Iesu Keriso ena hesiai taugu, e boirigu ena aposetolo tauna ai bainala, bona e hahelagagu Dirava ena sivarai namo baina harorolaia. 2 Sivarai namo bunai ia ese ena peroveta taudia ududia amo e gwauraia hamata, Buka Helaḡa lalonai: 3 ia Natuna herevana, tau-anina ai David garana amo e vara, 4 a Lauma Helaḡa ese mase amo e hatorea isi negana ai e gwauraia hedinarai mai siahuna ida, ia na Dirava Natuna; eda Lohiabada Iesu Keriso bunai. 5 lena amo harihari-bada, bona aposetolo dagina, ai ese vada a abi, bena ia ladana dainai bese iboudiai baia hahelalodia kerehai, abidadama korikori bae abia; 6 bona umui danu, Iesu Keriso ese e boirimuimu taumui. 7 Dirava ese e ura henimuimu taumui Roma ai o nohomu, helaḡa taumui e gwauraimuimu, ba namo; Tamada Dirava bona Lohiabada Iesu Keriso edia anlo harihari-bada bona maino bavabi.

Hahenamo herevadia

8 Egu hereva gini-gunana binai: egu Dirava na hanamoamu Iesu Keriso ladana ai, umui iboumui ai daimui ai; badina be emui abidadama harina e piuamu ina tanobada heḡege-madai lalonai. 9 Natuna ena sivarai namo isiaina laumagu ai na laohenimu Diravana na mai dibana, lauegu ḡuriḡuri na asi dokona umui daimui ai, 10 bona egu ḡuriḡuri ai na noinoi louloumu, Dirava baine ura nega ta baina vasi itamui. 11 Badina be na ura lalo-dikamu baina itamui, bona Lauma ena harihari ḡauna baina henimui, bena ba gini tutuka-tutuka. 12 Bona na tomanm umui bona lau eda heabidadama dainai baita hahealo heheni. 13 Varavaragu e, lau na uramu ba diba, nega hoho baina vasi nato, to e laogu ahumu ema bona harihari; egu ura be huahuamui baina davaria, bese idau-idau ediai vada na abi heḡereḡerena.

14 Lau na Helene taudia bona bese idau-idau taudia, aonega taudia bona kavakava taudia, ediai na abi torehai, 15 taunabunai lau na uramu umui Roma ai o nohomu taumui vairamui ai sivarai namo do baina harorolaia. 16 Badina be sivarai namo asina hemarailaiamu; ia na Dirava ena siahu, abidadama taudia e hamaurilaidiamu, guna Iuda taudia, gabe amo Helene taudia. 17 Badina be ia lalonai Dirava ena kara maoromaoro eme hedinarai, abidadama ihabadana totona; buka ai e torea na heto, eto, Kara maoromaoro tauna na ena abidadama dainai baine mauri.

Hahemaoro bese idau-idau latadiai

18 Dirava ena badu guba amo e hedinaraimu, taunimanima edia kara gageva-gagevadia bona Dirava asie matauraiamu karadia latadiai: idia ese edia kara gagevadia daidiai hereva momokani e tao tarimu. 19 Dirava herevana dibadia, badina be Dirava ese lalodia ai vada e hahedinaraia; 20 tanobada matamana amo e hehuni ḡaudia, ena siahu bona ena kara, vada eme hedinarai, e kara ḡaudia ese vada e hahedinaraimu. Taunabunai, idia na asi edia hahekora herevadia. 21 Badina be Dirava na dibadia, to edia Dirava ai asie halaoa, asie heatolaia, bona asie hanamoa; edia lalo-hadai vada e kavakava, bona lalo-duhu ese lalodia vada e hadiburadia. 22 Sibodia e tomava mai aonegadia, a ḡau be kavakava taudia ai ela; 23 noho hanaihanai Diravana hairaina e rakataniava, taunimanima laulaudia, bona manu, boroma, bona e raumu ḡaudia laulaudia, e toma henidia dihova.

24 Taunabunai, Dirava ese e kahudia nege, edia heḡahusi bodagadia bae ḡava, bena sibodia bae hahedika. 25 Badina be Dirava ena hereva momokani na idia ese koikoi ḡauna ai e boloava, e kara ḡaudia e toma heni dihova, bona isiaidia e lao heniva, a ikaradia Diravana na e dadaraiava. Hahenamo be iena ela bona hanaihanai. Amen.

26 Una dainai Dirava ese vada e kahudia nege, heḡahusi bodagadia bae badina; edia hahine ese hahine karana korikorina vada e ha-idaua, sibodia e heḡahusi hehenimu; 27 tatau danu, hahine vada e rakatanidia, sibodia e heḡahusi hehenimu; bena edia kara havara davana na tau-anidia ai e abiamu.

28 Idia ese Dirava ilalo-hadailaina asie urava, taunabunai Dirava ese vada e kahudia nege, edia lalo-hadai kavakavadia bae ḡava bona kara dikadia bae kara; 29 ema bona dika iboudiai ese vada e hahonudia: kara gagevagageva, kara dika, mata ḡaniḡani, vaḡeḡe, hebore, roroma, hepapahuahu, dibaka, daḡedaḡe. 30 Idia na hesivarai taudia, ere dika taudia, Dirava ese e dadaraidiamu taudia, ere daḡedaḡe taudia, hekokoroku taudia, heaḡi taudia, dika ihavarana taudia, tamadia sinadia e dadaraidiamu taudia, 31 asi aonegadia taudia, gwauhamata itata-utuna taudia, asi edia heuraheni taudia, asi edia hebogahisi taudia. 32 Ena be dibadia Dirava e gwau hamata, eto, “Unu bae kara toma taudia bae mase”, to idia ese e karamu, bona e karamu taudia danu e imodaidiamu.