Rom 2 | MEU | STEP | Benaini, oi haida o hahemaoro henidiamu taumu, oi na asi emu hahekora herevadia; emu hahemaoro na sibomu o hahedikalaimu, badina be oi hahemaoro taumu na unu o kara tomamu.

‏ Romans 2

Hahemaoro Iuda taudia latadiai

1 Benaini, oi haida o hahemaoro henidiamu taumu, oi na asi emu hahekora herevadia; emu hahemaoro na sibomu o hahedikalaimu, badina be oi hahemaoro taumu na unu o kara tomamu. 2 Dibada danu, unu e kara tomamu taudia na Dirava ese davadia baine henidia mai maoromaorona ida. 3 Bena unu e kara tomamu taudia o hahemaoro henidiamu, ma sibomu danu unu o kara tomamu; o lalomu o tomamu Dirava ena hahemaoro amo ba roho mauri a? 4 Eiava, ena harihari-bada, ena haheauka bona ena hebogahisi o dadaraimu, matona asi dibamu Dirava ena harihari-bada ese e hakaumumu helalo dalana ai a? 5 Emu lalo-duhu dainai badu latamu ai o habouamu; bena Dirava ena hahemaoro dinana ai una badu anina baine hedinarai. 6 Ia ese taunimanima iboudiai edia kara heḡereḡerena davadia do baine henidia hagau-hagau: 7 kara namodia e kara tarika-tarikamu bona hairai bona hahenamo bona basine pata maurina danu e tahumu taudia na mauri hanaihanai bae abia; 8 a e heiri-heirimu bona hereva momokani e dadaraiamu bona kara gageva-gageva e badinamu taudia na badu bona hisihisi bae abi. 9 Kara dika taudia ese lalo-hisihisi bona kudou-hetaha bae davari, guna Iuda taudia, gabe amo Helene taudia; 10 a kara namo taudia ese hairai bona hemataurai bona maino bae davari, guna Iuda taudia, gabe amo Helene taudia. 11 Badina be Dirava ese taunimanima iboudiai e itadiamu, heḡereḡere mo.

12 Taravatu murimurinai e kara dika taudia na taravatu murimurinai davadia bae abi, a taravatu lalonai e kara dika taudia na taravatu lalonai bae hahemaoro henidia. 13 Dirava vairanai bae maoromaoro taudia na dia taravatu e kamonaimu taudia, to taravatu e badinamu taudia hari. 14 Bese idau-idau taudia na taravatu asi dibadia, to lalodia ai taravatu e badinamu; taravatu be asi dibadia, to sibodia edia taravatu e haginimu. 15 Idia ese lalodia ai e torea tal-avatuna karadia e hahedinaraimu, bena lalodia ese taravatu e hamomokanimu; bona lalodia ese e hahemaoro henidiamu, bena e habadelaidiamu, eiava maorodia e gwauraimu. 16 Egu sivarai namo hegereḡerena, dinana baine kau ai Dirava ese taunimanima edia hehuni karadia baine hahemloro henidia, Iesu Keriso bagunai.

17 Taunabinai oi, Iuda taumu o tomamu, taravatu o abidadama heniamu taumu, Dirava o heatolaiamu 18 bona ena ura mai dibamu taumu, herea-dae ḡaudia toadia dibamu bona taravatu vada o diba vaitani o tomamu taumu: 19 oi na mata-kepulu taudia o hakaudiamu, bona dibura ai e nohomu taudia edia diari ai o laomu, 20 bona kavakava taudia o sisiba henidiamu, bona memero o hadibadiamu; badina be aonega bona hereva momokani oromadia na taravatu lalonai o davarimu. 21 Matona, bamomu o hadibadiamu, to sibomu to hahedibamu a? O haroromu, o tomamu taunimanima basie henao, a ḡau be oi o heuda hanaimu a? 22 O tomamu taunimanima basie heuda hanai, a ḡau be oi o heuda hanaimu a? Kaivakuku o ihi-ihiraidiamu, a ḡau be dubu ḡaudia o henaomu a? 23 Taravatu o heagilaiamu, a ḡau be taravatu itata-utuna ai Dirava o hadikaiamu a? 24 Benaini, buka ai ini e torea toma, ani: Dirava ladana na bese idau-idau bogaragidiai e ihiihiraiamu umui daimui ai.

25 Momokani, taravatu ba badinaia negana ai peritome ese baine hanamomu; a taravatu ba tataia utu negana ai emu peritome na asi anina. 26 A asie peritomea tauna na taravatu baine badinaia, ia na e peritomea tauna heḡereḡerena ai bainela ani? 27 Bona, asie peritomea to taravatu e badinaiamu tauna ese oi, taravatu ai o vara bona peritome o abia to taravatu o tataia utumu taumu, na baine hahemaoro henimu ani? 28 Badina be Iuda oromana na dia Iuda korikori, bona peritome oromana na dia peritome korikori; 29 a Iuda korikori na lalona ḡauna, bona peritome korikori na lalona ḡauna, dia tau-anina ai to lauma ai. Tau unuhetomana na taunimanima readia basie heatolaia, to Dirava ese baine heatolaia.