Rom 5 | MEU | STEP | Taunabunai, iseda abidadama dainai ita maoroda vada e gwaurai, bena Dirava ena maino tame abia, Iesu Keriso iseda Lohiabada bagunai.

‏ Romans 5

Eda Hahemauri Keriso ena amo

1 Taunabunai, iseda abidadama dainai ita maoroda vada e gwaurai, bena Dirava ena maino tame abia, Iesu Keriso iseda Lohiabada bagunai. 2 Ia bagunai danu ita ese ta noholaiamu hariharina vada tame davaria, eda abidadama dainai; Dirava hairaina danu ta laroamu mai moaleda ida. 3 Dia una mo: a dikadika negadia ai ta moalemu; badina be dibada hisihisi ese haheauka e havaraiamu, 4 bona haheauka ese manada e havaraiamu, bona manada ese helaro e havaraiamu. 5 Helaro danu basine doko; badina be Lauma Helaḡa vada tame abia, bena ia ese Dirava ena uraheni na laloda ai vada eme vedaia. 6 Badina be nega korikori ai, ita ta manokava negana ai, Keriso e mase, Dirava e ihi-ihiraiava taudia daidiai. 7 Kara maoromaoro tauna dainai daika baine mase? Readia ta ta mo unu bae kara toma. 8 A Dirava ese ena uraheni ini e hahedinaraia toma; ita na dounu kara dikadia ta karava negadia ai Keriso na ita daidai e mase.

9 Iesu rarana dainai ita na maoroda e gwauraimu, taunabunai ia ese Dirava ena badu amo baine hamaurida. 10 Gunaguna, ta inai heniava negana ai, Dirava ida ta herohemaino ia Natuna bagunai; harihari, vada ta herohemaino vaitani negana ai, mauri baita abia iena mauri bagunai. 11 A dia una mo: Dirava ta moalelaiamu iseda Lohiabada Iesu Keriso dainai; badina be ia bagunai herohemaino vada tame abia.

Adam bona Keriso

12 Taunabunai, tau ta dainai dika tanobada ai e vareai, bona dika ese mase e vareailaia; bena mase ese taunimanima iboudiai e butudia tao, badina be iboudiai na mai edia kara dika. 13 Badina be kara dika vada e vara guna tanobada ai, taravatu be gabeamo; asi taravatu negana ai kara dika asie hahemaoro heniava. 14 Mase vada e kwalimuva, Adam negana ema bona Mose negana ai; ena be haida ese Adam ena kara dika asie tohotohoa, to e mase.

Adam ese bainema tauna e hahedinaraia guna. 15 A kara dika na idau, harihari-bada danu idau. Badina be tau ta ena kara dika dainai hutuma e mase; a harihari, Dirava ena harihari-bada dainai, bona ena harihari-bada ese e havaraia herahiana, Iesu Keriso, dainai, hutuma eme mauri. 16 Tau tamona ena kara dika be idau, harihari-bada be idau; badina be tau tamona dainai hahemaoro ese hahedika e gwauraia, a harihari-bada ese kara dika taudia hutuma maorodia eme gwaurai. 17 Tau tamona ena kara dika dainai mase vada e kwalimu; unuhetomana, harihari-bada bona kara maoromaoro e abimu taudia na bae kwalimu bona bae mauri, tau tamona, Iesu Keriso, dainai. 18 Bona tau tamona ena kara dika dainai hahemaoro ese iboudiai e hadikadia; unuhetomana, tau tamona ena kara maoromaoro dainai taunimanima iboudiai maorodia e gwauraunu, vada bae mauri. 19 Bona tau tamona ena gwau-edeede daimai hutuma na dika taudia ai e halaodiava; unuhetomana, tau tamona ena kamonai dainai hutuma na kara maoromaoro taudia ai e halaodiamu.

20 Taravatu e gini, bena hekwakwanai vada e vara badabada. A kara dika e badamu gabudia ai, harihari-bada na e honuhonu daemu. 21 Kara dika e kwalimuva, mase e havaraiava; unuhetomana kara maoromaoro dainai harihari-bada e kwalimumu, mauri hanaihanai e havaraiamu, Iesu Keriso iseda Lohiabada bagunai.