Joh 2 | MHL | STEP | Aria fofa erup naap ikiweya Kaana owowa-pa mua-ko emeria aaweya enow maneka onamik. Owowa nain Galili kame-pa ikua. Ne Yeesus onak pun nan ikua.

‏ John 2

Yeesus eka kiripeya wain eka imenarek

1 Aria fofa erup naap ikiweya Kaana owowa-pa mua-ko emeria aaweya enow maneka onamik. Owowa nain Galili kame-pa ikua. Ne Yeesus onak pun nan ikua.

2 Yeesus fariwkin ona teeria unowiya wia urufowa ikiwemik. 3 Naap ikok wain eka wiar weesereya onak-ke ekap mamaiya-pa maakek, “Wi wain wiar weeserek.” 4 Naeya onak maakek, “Sa, aite no moram efa maakin. Yo epa eewuar efar ikua.” 5 Ne onak-ke wi uuwow mua wia maakek, “Ni maa mauwa onowa nia maakinok-na naap onap-pueka.”

6 Aria eka amina mane-maneka nomoniw onamik nain ikur okaiwi-pa kuisow nan ikua. Wiena Yuuda sira ookami eka amina neeke unep wapena yasuwimik. Amina nain maneka, eka andet lita naap eliw ototinan. 7 Ne Yeesus-ke uuwow mua wia maakeya, amin unowa nain eka ototamik. Ototiwkin taanomakeya 8 wia maakek, “Eka nain unep iimarow mua pikiwomaka.” 9 Ne pikiwiwkin iimarow mua nain akimak-na eka nain wain puukak. O kaanek aawep pekapomamik nain me amisarek, ne wi uuwow mua eka unep naap onamik nain wi amisaremik. Naapeya o mua emeria aawok nain farep 10 maakek, “Ei, mua unowa maa enowa onami wain eliwa kiikir poraimik, enep lawiliw momorariwkin eliw marew nain poraimik. Ne nos-ke wain eliwa nan wuap-puap aakisa fan poron.” 11 Yeesus maa miililina onak nain mokomokoka nan onak. Ona kekanowa ne unum maneka kame nan ariman wueya wiar urufamik. Naapeya ona teeria makena-ke naep opora wiar opamik. 12 Aria maa enowa nain weesereya Yeesus ne onak, ona wiamun unowa ne ona teeria, wi unowiya Kapeneam owowa orop lawisiw nan ikemik.

Yeesus tempel koora ikiwok

(Matiu 21.12-13, Mak 11.15-17, Luk 19.45-46)

13 Aria wi Yuuda Pasowa maapora mamaiyarem-ikaeya Yeesus Yerusalem ikiwok. 14 Ikiwep fuunep tempel pika kemena urupok-na wi mua-ke patirow maa sesekam-ikaiwkin wia urufak, bulmakau, sipsip ne nepa ibiamun, maa naap nain. Ne wi mua papako pun nan pokap ikok wiena maamuma wia kiripomami tempel maamuma wuowa nain wiem-ikemik. 15 Naap wia urufap iikirami waamara aawep purekap sarua wiaremi bulmakau ne sipsip wiar fa-faemi maa unow onaiya wia iirarek. Maamuma esimsa onaiya nameneya wiar ururek. 16 Ne wi nepa sesekam-ikemik nain pun wia iiraremi wia amukarek, “Niena nepa aawep owaruma oreka. Yena Auwa koora fain niena fofa epa saarik me aroweka.”

17 Naap oneya ona teeria Mua Maneka opora nain kema suuwamik. Feenap,

“Nena tempel koora manek akena kookaliyem nain mukuna saarik efa kuumiya.”
(Someka 69.9)

18 Ne Yeesus sira naap wia oneya wi Yuuda woos mua-ke maakemik, “Naapeya no aakisa kuisow maa miililina-ko oneya i urufap maiyen, ‘Aa pepek, no Mua Maneka kekanowa onaiya ikon, naapeya sira naap yia onan,’ i naap maiyen.” 19 Ne wia maakek, “Ni tempel koora fain teekowen-na yo fofa arow muutiw kiiriw enuma kuainen.” 20 Naeya maakemik, “Sa, koora fain kuam-ikaiwkin mokoma ten erepam nainiw ikur okaiwi-pa kuisow arek. Ne nos-ke fofa arow muutiw eliw enuma kuainan-i?” 21 Yeesus eena ona wame maemi tempel koora maek, ne wi nain kemena me wiar aawemik. 22 Naapeya o umep ikok iikireya iir nain ona teeria-ke opora eena iiriw wia maakek nain wiar kema suuwap maemik, makena. Mua Maneka opora pun makena maemik.

Yeesus emeria mua kema wiar amisarek

23 Aria Yeesus Yerusalem-pa ikok Pasowa maapora epa-pa maa miililina imenam-ikaeya mua unowa nain wiar urufap makena-ke naemik. 24 Nain ona wi kema wiar amisarek. Naapeya wi me mua makena-ke wia naemi ona kema ariman me wia wuomak. 25 Onaiw wi mua sira ne kema baliwep akena wiar amisarek, mua oko-ke me maakemik.