Luk 18 | MHL | STEP | Aria wi anane Mua Maneka farep nokarowa me piipuauk naep wia maakemi arekin opora oko wia iromak.

‏ Luke 18

Anane Mua Maneka farep nokarowa sira

1 Aria wi anane Mua Maneka farep nokarowa me piipuauk naep wia maakemi arekin opora oko wia iromak. 2 Feenap maek, “Owow oko ona anim onoma onaiya ikua. Mua nain emin sekaria, Iinan Mua Maneka me keker opiya, ne wi mua oko ekima me wia opiya. 3 Emer apura-ko owowa nan ikua. O yaawerow marew mua nain maakem-ikua, ‘Mua oko-ke efa iiraremi maa unowa efar aawekam naep oniya. Yo mua nain opora-pa wuowa efa asipe naep ekapem.’ 4 Naap maakeya apura nain asipowa miatinep naap ikok ikok nainiw woosa feenap wuak, ‘Makena, yo Mua Maneka me keker opiyem ne wi mua pun ekima me wia opiyem. 5 Nain apura fain-ke anane yo mia efa erowawiya. Eliw, yo o-ko asipinen. Oko anane maneka naap ekapem-ikainon,’ naap maek.” 6 Naemi opor makena fookak, “Ni mua nain opora wiar furewap kema suuweka. O mua samora nain emer apura nain asipak. 7 Ne Mua Maneka ona teeria me wia asipinon-i? Ona wia pepekimep ona teeria-pa wia wuak, ne wi anane amirika ne uura o kema suuwap nokarem-ikaimik. Naap oniwkin ewur me wia asipinon-i? 8 Yo makena maiyem, ewur akena wia asipinon, me waliminon. Nain ikoka Mua Muuka ona ekapow fofa-pa wi emeria mua o opora wiar opimik nain eliw wia imeninon-i e weetak!”

Mua erup Mua Maneka faremik nain arekin opora-ke

9 Aria mua papako unuma wiam pirami mua oko wia firekamik nain Yeesus-ke arekin opora feenap wia iromak, “Aria mua erup Mua Maneka farowa naep tempel koora ikiwemik. Mua oko wi Farisi-ke ne oko takis aawow mua-ke. 11 Farisi nain ona waisow iimarep ikok Mua Maneka feenap maakek, ‘Oo Mua Maneka, yo mua eliwa-ke, me wi mua papako naap. Naapeya yo sira eliwa nefa naiyem. Wi anane ikumarimik, sira samora onimik, ne muewowa puukimik. Ne yo wia. Yo me takis aawow mua nain saarik. 12 Yo anane sande kuisow fofa erup maa enowa emi wuiyem. Maa unowa aawiyem nain fiirimep mokoka ten kuisow nain mokoka kuisow no niowa naep tempel koora pekapiyem,’ naap maek. 13 Ne takis aawow mua nain pun epasia-pa iimarek. Iinan me mokakek, weetak, maara mikap ikua. Ne iimarep ikok kema samorarep kemanpira arufami maek, ‘Oo Mua Maneka, yo pina mua-ke. Yo efa kemale!’ Naap maek.”

14 Neemi maek, “Yo makena maiyem, takis aawow mua nain Mua Maneka-ke o mua kaken eliwa nainon, ne mua oko nain wia. Mua unuma wame purupiya nain ikoka wiar porainon. Ne unuma wame poraiya nain ikoka wiar purupinon.”

Yeesus wi muuka gelemutitik kekanowa wiek

(Matiu 19.13-15, Mak 10.13-16)

15 Aria muuka gelemutitik Yeesus wiar amapekapemik, wapena ikiwosa-pa wia wueya kekanowa aawuk naep. Naeya Yeesus teeria-ke naap urufap onak wiawi wia kakankami iiraremik. 16 Ne Yeesus-ke muuk unowa wia fareya wameiya wiar ekiwkin maek, “Ni muuka me wia iirareka, efar ekapuk. Moram Mua Maneka pika kemena nain wi takir muutitik feenap nain-ke kemena wiar ekikuan. 17 Yo makena nia maakiyem, o mua Mua Maneka pika kemena-pa wiar ikowa opora nain muuka gelemuta saarik me aawinon-na, Mua Maneka pika kemena me wiar ekinon, weetak akena.”

Mua maa unowa wiar ikua nain opora-ke

(Matiu 19.16-30, Mak 10.17-31)

18 Aria wi Yuuda woos mua oko-ke Yeesus feenap nokarek, “Somek mua eliwa, yo sira kamenap onap anane Mua Maneka wameiya ikok eliwa ikainen?” 19 Naeya maakek, “No moram eliwa efa naen? Mua eliwa-ko me ikaimik. Mua Maneka waisow eliwa-ke. 20 Iiriw Moses sira wuomakek nain no amisaren: ‘No soma me ore, mua me wia ifakime, me ikumare, wadol opora me wia ife, nena neene niawi opora wia miime.’” 21 Naeya mua nain-ke maek, “Iiriw yo takira ikok sira nain iiwawun ookam-ikok arimep aakisa mua arem.” 22 Opora naap wiar miimap maakek, “Makena, nain no maa kuisow akena onowa-ke nefar ikua. Nena maa unowa sesekap maamuma aawep sererkap wi mua oorpowa nain wiomake. No naap oninan-na owowa iinan-pa maa eliwa akena nain nefar ikainon. Aria ekapep yo yooke.” 23 Naap maeya miimap kema senam akena pinarek. Moram o maamuma unow akena wiar ikua.

24 Yeesus-ke naap urufap maek, “Wi maamuma mua Mua Maneka pika kemena wiar ekowa nain yoowa akena. Maa unowa wiar ikua nain-ke wia opap ikua. 25 Feenap, maa eneka kamel wuara gelemuta-pa ikiwowa nain yoowa. Ne wi maamuma mua Mua Maneka pika kemena wiar ekowa yoowa akena.” 26 Mua unowa nain miimap maemik, “Naap nain, Mua Maneka mua kuisow-ko me wia aawinon-i?” 27 Naiwkin maek, “Mua Maneka pika kemena wiar ekowa nain mua wieniw me pepek, nain Mua Maneka ona eliw wia aawinon. Moram o maa onowa maek nain pepek eliw oninon.”

28 Naeya Pita-ke maakek, “Aa, i yiena maa unowa piipuap no nookam-miawimik.” 29 Naap maeya maakek, “Ae makena, nain yo nia maakiyem. Wi mua Mua Maneka pika kemena-pa wiar ekow muuta nain wiena koora piipuami wiena emeria, weepe, wiamun, wiawi, onak e muuka wia piipuimik, wi nain ikoka Mua Maneka-ke aakisa epa feeke wia ane-maisomami baliwep wia saliwinon. Ne naap ikok umep Mua Maneka wameiya ikok eliwa ikaikuan.”

Yeesus ikoka umep iikirowa nain nainiw maek

(Matiu 20.17-19, Mak 10.32-34)

31 Aria Yeesus ona teeria ten kuisow erup nain muutiw wia aawep epa wenup ekap wia maakek, “Aria miimeka, i Yerusalem ikiwimik. Ikoka neeke Mua Muuka opor unowa iiriw wi profet-ke siisimep-puamik nain makena arinon. 32 Wi o opap owow oko mua wapena-pa wuiwkin firekami samo-samorami opeka warikuan. 33 Samor-ko arufap ikoka ifakimiwkin uminon. Umep fofa arow-pa iikirinon.” 34 Naap wia maakek nain wi kema me pukemik. Opora nain onoma kokot ikaeya wi kema me aawemik.

Yeesus mua mokok opa saliwak

(Matiu 20.29-34, Mak 10.46-52)

35 Aria Yeesus ame ikiwemi Yeriko owowa mamaiyaremik. Mua mokok opa-ko era pona-pa pokap ikok maamuma wia nomarem-ikua. 36 Wi yakeyak maneka ekapemi nomakem-ikaiwkin wia miimap wia nokarek, “Nee, ni mauwa onowa ikiwiman?” 37 Naeya maakemik, “Wia, Nasaret mua Yeesus naimik nain-ke ikim-ikaiya.” 38 O naap miimap farek, “Oo Yeesus, Dewit nembesir, yo efa kemale aa!” 39 Naap fareya wi miimem-ikemik nain-ke kakankamik, “No poporare!” Kakankamik-na wia, kerew akena farem-ikua, “Dewit nembesir, yo efa kemale aa!” 40 Ne Yeesus ikim-ikok naap miimap iimarep wia maakek, “Opap pekapeka.” Pekapiwkin nokarek, 41 “Yo kamenap nefa asipinen?” Ne maek, “Oo Maneka, mokoka efar saliweya maa urufinen naep.” 42 Naeya maakek, “Yo kekanowa efar naeya mokoka nefar sariarek. No aakisa maa eliw urufinan.” 43 Naap maakem-ikaeya mokoka wiar sariarek. Ne maa urufap iikirap Yeesus ookami Mua Maneka sira eliwa naakemi unuma fakeram-ikua. Wi emeria mua naap urufap wis pun Mua Maneka unuma purupemik.