Luk 21 | MHL | STEP | Aria Yeesus tempel koora-pa ikok feenap wia urufak, wi maamuma mua-ke ekapemi tempel koora uuwowa maamuma wuam-ikemik.

‏ Luke 21

Emer apura-ke Mua Maneka naep maamuma maneka wuak

(Mak 12.41-44)

1 Aria Yeesus tempel koora-pa ikok feenap wia urufak, wi maamuma mua-ke ekapemi tempel koora uuwowa maamuma wuam-ikemik. 2 Ne emer apura-ko ekapemi maamuma gelemuta erup wuak, maamuma oka erup pepek. 3 Ne Yeesus-ke naap urufap maek, “Wi maamuma mua-ke maamuma maneka wuamik, nain wiena osena wiar ikua nain wuamik. Ne apura fain maa unowa weetak. O maamuma muuta wiar ikua nain iiwawun fan wuak. Makena nia maakiyem, o wuak nain Mua Maneka mokoka-pa manek akena wuak, ne wi mua papako maamuma wuamik nain maneka wia.”

Yeesus maek, tempel koora ikoka samorarinon

(Matiu 24.1-2, Mak 13.1-2)

5 Yeesus ona teeria mua papako tempel koora urufami maemik, “Tempel koora faa, nomon mane-manekiw kuamik. Ne Mua Maneka naep maamuma wuiwkin maa ele-eliwa sesenarep bala opawamik noma.” Ne Yeesus-ke maek, 6 “Wiimar maa-ko imenareya naap me urufowen, weetak. Ni koora urufiman fain ikoka nomona kuisow nomon oko iinan-pa me ikainon, weetak. Pika nain ikoka iiwawun te-teekiwkin ururomakinon.”

Yeesus pina unowa ikoka imenarowa nain maek

(Matiu 24.3-14, Mak 13.3-13)

7 Ne wis-ke nokaremik, “Somek mua, maa maen nain iikamin akena-ko imenarinon? Maa mauwa kiikir imenareya ilenap maiyen, maa maen nain fan imenariya?” 8 Ne wia maakek, “Ni maa urufami ikeka, oko mua oko-ke nia peeskimikuan. Mua unowa ekapemi yo unuma efa unufami maikuan, ‘Yo Krais-ke, miiwa weeserow epa imenariya.’ Naap maiwkin-na me wiokeka. 9 Aria irakowa feekeriw miimowen ne wi epasia-pa irakowa meta wiar miimowen. Ni nain me keker opaka. Makena, sira nain ikoka owow unowa pun wiar imenarowa-ke. Nain miiwa weeserow epa eewuar ikua.”

10 Ne kiiriw wia maakek, “Owow unowa ikoka wi-wieniw irakikuan ne owow oko saria-ke owow oko irakowa fee-feekeriw arikuan. 11 Ne maa ofofona pun imenaromakinon, owow unowa weniw samor akena ne napuma sira-sira aawikuan. Ikoka aapereka-pa maa sira-sira ne maa keker opowa pun imenarinon.

12 Maa unowa nain me imenarowa ikaeya yo muuta nain sirirowa niu naep nia opikuan. Ne lotu koor kemena-pa opora-pa nia wuap koora nia pekikuan. Ne opora-pa nia wuami wi owow saria ne wi anim onoma wapena-pa nia wuikuan. 13 Naeya iir nain yo opor makena ariman wia maakowen. 14 Naapeya opora kamenap wia kiripomowa nain kema me wueka. 15 Iir nain yena opora ne amis eliwa kema niemkun ni iiwua-ke nia fienami me nia nomakikuan.

16 Niawi, neene, niamun epia ne nomar, wis pun wi iiwua wapena-pa nia wuiwkin papako nia ifakimikuan. 17 Ni yo muuta nain kema nia iririmem-ikaikuan. 18 Ni eliwa ikowen, niena ikiwos afifa kuisow me niar pusuninon. 19 Ni kekanep yo opora baliwep ookiman neeke anane eliwa ikowa imenowen.”

Yeesus-ke maek, Yerusalem ikoka samorarinon

(Matiu 24.15-21, Mak 13.14-19)

20 “Ne wi irakow mua-ke Yerusalem warikiwkin wia urufap-na maeka, owowa nain ikoka samorarinon. 21 Maa nain imenareya wi Yuudia kame-pa ikemik nain baurarep ema urupomakuk. Wi Yerusalem-pa ikemik nain owowa piipuap epa oko ikiwomakuk. Ne owow oko-pa ikemik nain Yerusalem me ekapuk. 22 Iir nain Mua Maneka-ke pina wia kiripomami opor unowa ona opora-pa ikomakek nain maken akena arowinon. 23 Wiisak aa, wi emeria urom onaiya ne muuk wesusa onaiya ikemik nain ikoka kamenap arikuan? Wi samor aawikuan, moram miiw unowa owow unowa sirirow maneka ne irakow maneka imenarinon. 24 Wi iiwua-ke wia ifakimemi papako wia kaikap owow oko wia pikiwikuan. Wi owow oko teeria-ke ekapep Yerusalem iiwawun samorikuan. Ikip ikip wiena epa pepek ereya piipuikuan.”

Mua Muuka ikoka ekapinon

(Matiu 24.29-31, Mak 13.24-27)

25 “Ikoka siisia sira-sira-ke ama, siiwa ne mokoma-pa imenarinon. Ne ifera-ke kuemi manek akena duunem-ikaiya nain miimap kema tootonikuan. 26 Maa mauwa-ke yiar imenariya naep keker opap kema marewarikuan. Moram aapereka iinan maa unowa kekekrarinon. 27 Nain imenarep ikaeya Mua Muuka ona kekanowa ne parin maneka onaiya maa ipisia-pa orom-ikaeya urufikuan. 28 Yo maa unowa nia maakem nain imenarem-ikaeya ni kekanep iimarep kemaiw tuupam-ikeka. Moram ni nia aawowa epa nan imenariya.” Naap wia maakek.

Arekin opora oko nomokowa fik pepekimok

(Matiu 24.32-35, Mak 13.28-31)

29 Ne arekin opor oko feenap wia iromak, “Ni nomokowa fik ne nomokowa papako urufap kema aaweka. 30 Gulowa enuma mikami ifa wueya urufap maiman, ‘ama saana mamaiya arek.’ 31 Sira naap, maa unowa nain pun naap akena imenareya urufap kema aawep maowen, Mua Maneka miiw mua pika kemena-pa wia wuowa epa nan kereriya, maowen. 32 Yo makena nia maakiyem, wi teeria fain mua papako me umowa ikaiwkin maa nain imenaromakinon. 33 Aapereka miiwa onaiya ikoka mesenalinon, ne yo opora-ke me mesenalinon, anane naap ikainon.”

Yeesus ona teeria wia maakek, ni maa urufap

34 “Ni maa urufap. Oko maapora onami eka enemi momorarem-ikowen ne miiw maa kema manekiw ikowen. Ni naap ikaiwkin fofa nain kerereya niam soranowap kamenap arowen. 35 Moram miiw unowa teeria ikoka top-pa kokor erowa saarik oram soranep-puikuan. 36 Naapeya ni baliwep ikok Mua Maneka kema suuwap farem-ikeka, kekanowa nieya ni maa unowa imenariya nain nomakep, Mua Muuka miir onoma-pa wiar iimarowen,” naap wia maakek.

37 Yeesus anane tempel koora-pa ikok opor unowa nain wia maakem-ikua. Naap onam-ikok kokomareya ikiwep Oliw ema-pa nan inem-ikua. 38 Wi emeria mua opora wiar miimu naep uuriw akena tempel koora ikiwem-ikemik.