Luk 22 | MHL | STEP | Aria emer kekanowa enowa maapora nain onowa mamaiyarek, eena Pasowa naimik nain.

‏ Luke 22

Yuudas-ke ikoka Yeesus wi iiwua wapena-pa wiar wuinon

(Matiu 26.1-5 ne 26.14-16, Mak 14.1-2 ne 14.10-11, Yon 11.45-53)

1 Aria emer kekanowa enowa maapora nain onowa mamaiyarek, eena Pasowa naimik nain. 2 Wi pris woos mua ne wi sira amis mua Yeesus ifakimowa nain wi emeria mua wia keker opap kamenap oniyen naep era akupam-ikemik. 3 Naap ikok Yeesus teeria mua oko, unuma Yuudas Iskariot, Satan-ke kema mikeya ikiwep wi pris woos mua ne wi tempel koora ami mua kokot wia maakek. Ikoka os-ke era imenap Yeesus wi wapena-pa wiar wuinon, nain wia maakek. 5 Naapeya wi kemelap nefa sesenariyen naakemik. 6 Ne naap aakunep ikiwep kokot era akupam-ikua, iir oko teeria maneka Yeesus wameiya me ikaiwkin ona waisow tenep ekeya-na wi iiwua wapena-pa wiar wuinen naek.

Yeesus teeria mua erup Pasowa maa enowa onamik

(Matiu 26.17-25, Mak 14.12-21, Yon 13.21-30)

7 Emer kekanowa enowa maapora kererek. Fofa nan wi Yuuda anane sipsip muuka ifakimep Pasowa maapora onimik. 8 Naeya Yeesus-ke Pita Yon ikos wia sesekami wia maakek, “Ni Pasowa maa enowa ikiwep yia onomaka.” 9 Naeya nokaremik, “I kaaneke ikiwep maa oniyen?” 10 Ne wia maakek, “Owow maneka ikiweka. Ikiwep mua oko eka amina opap niar ekapem-ikaeya urufap-na wameiya ikiweka. 11 Ikiwemi koora kaanek fuunep-na koor onom mua nain maakeka, ‘Yiena somek mua nefa maek, “Yo koor kemena epa wuap-puomen nain are kaaneke ikua? I ikoka yena teeria onaiya Pasowa maa enowa neeke enimiyen naek.” ’ 12 Naap maakiwkin samapora iinan koor kemena manekiw nia ofakowinon. Epa iiriw kakenap-puamik. Maa enowa neeke yia onomaka.” 13 Naeya wiam erup nain ikiwep maa unowa wia maakek naap imenap nan maa enowa onamik.

Yeesus ona teeria komunio wienakek

(Matiu 26.26-30, Mak 14.22-26, 1 Korin 11.23-25)

14 Aria urera enow ama naeya Yeesus ona teeria onaiya ikiwep maa enimu naep pokamik. 15 Ne wia maakek, “Yo ni niamiya Pasowa maa enowa manek akena kema suuwap kookaliyem, niamiya maa enep-puap ikoka yoowa aawinen. 16 Yo nia maakiyem, yo Pasowa maa enowa kiiriw me eniminen. Ikoka Pasowa Sipsip Muuka ifakimiwkin umeya Mua Maneka ni miiw mua pika kemena-pa nia wuowa epa imenareya iir nain nainiw eniminen.” 17 Naap maep-puap wain urupa aawep Mua Maneka sira eliwa naakep wia maakek, “Ni wain eka fain aawep posel-posela enimeka. 18 Yo nia maakiyem, yo wain eka nainiw me eniminen, iiwawun ikiwep Mua Maneka miiw mua pika kemena-pa nia wuowa epa imenareya nainiw eniminen.” 19 Ne emera pun sira naap, Mua Maneka sira eliwa naakep wu-wuepap wienakemi maek, “Fain yena mia-ke. Yo yena mia oposia fain nienakiyem, yo ni nia naep uminen. Ni sira feenap onam-ikok yo efa kema suuwam-ikeka.” 20 Wi maa enep weesereya wain urupa opap maek, “Eka fain yena aka-ke, ni muuta nain oromi Mua Maneka opor enuma niamiya kaikiya nain koonowinon. 21 Aria, mua eena yo iiwua wapena-pa efa wuowa nain efamiya pokap ikua. 22 Yo Mua Muuka-na ikoka umowa nain Mua Maneka iiriw maek naap uminen. Aa, wiisak, mua eena wi iiwua wapena-pa efa wuiya nain samor aawinon.” 23 Naap maeya, wi-wieniw kiri-kiremi wiam nokaremik, “Nee, naareke naap oninon noma? Naeya naap maiya.”

Woos mua ona wame porainok

24 Aria naap ikok ona teeria-ke wi-wieniw oporiw irakemik, mua naareke ikoka miimow mua yiar ikainon naep. 25 Ne Yeesus-ke wia maakek, “Miiw unowa owow unowa wi owow saria-ke sira kekanow akena wia urufam-ikemik. Ne wi woos mua ‘I saria-ke’ wiam naimik. 26 Ne ni sira naap me oneka. Miimow mua-ke takira wame arowap murarowa-pa ikainok, ne woos mua-ke taar teekow mua ikainok. 27 Ni kema suuweka, mua kaanin-ke maneka? Mua pokap maa enimiya nain-i e mua waawarem-ikaiya nain? Mua pokap maa enimiya nain-ke maneka. Ne yo sira naap nain wia, yo uuwow mua puukap nia waawariyem.

28 Aria akimowa unowa yo efar imenaromakek nain ni yena efamiya ikeman, me efa piipuaman. 29 Yena Auwa-ke ona teeria wia urufowa naep efa pepekimok ne yos pun naap nia oninen. 30 Ni ikoka yo pika kemena-pa efar ikok yena efamiya pokap maa eliwa enem-ikowen. Ne owow saria pokow eliwa-pa wiar pokap ikok wi Isrel kerekera ten kuisow erup nain wia urufam-ikowen.”

Yeesus Pita maakek, “No ikoka efa sailinan”

(Matiu 26.31-35, Mak 14.27-31, Yon 13.36-38)

31 Aria Yeesus-ke Pita maakek, “Oo Saimon, Mua Maneka-ke Satan ae naakeya nia akimekam naep nia ofofinon. 32 Naapeya no wakiemi yo opora iiwawun me efar piipue naep yo Mua Maneka nokarem. No ikoka kiiriw kema kirep-na nena nomar teeria wia kekanowe.” 33 Naeya maek, “Maneka, yo no nookami koora eliw ekinen, ne no naep eliw uminen.” 34 Naap maeya maakek, “Oo Pita, ikok uura aara me farowa ikaeya no sailemi maem-ikainan, ‘Mua fain yo me amisarem.’ Naap sailowa arow arinan.”

Maa opap soomarowa

35 Ne nainiw wia maakek, “Yo iiriw nia sesekam nain niena maamuma paus, inera ne meren suuwowa me aawep onaiya ikiweman. Iir nain maa kuisow-ko iiwareman-i e weetak?” Ne maemik, “Weetak.” 36 Ne wia maakek, “Aria aakisa maamuma paus eliw aawowen ne inera pun naap. Ni fura marewa nain niena mia suuwowa sesekap fura sesenareka. 37 Moram Mua Maneka opora feenap maek,

‘Os pun wi mua samora teeria-ke naemi ifakimikuan.’
(Aisaiya 53.12)

Nain makena yo efar imenarinon. Naapeya opor unowa efa maek nain aakisa makena nan imenariya.” 38 Ne maakemik, “Maneka, urufe. I fura erup yiar ikua.” Naeya os-ke wia maakek, “Pepek.”

Yeesus Mua Maneka farowa naep Oliw ema urupok

(Matiu 26.36-46, Mak 14.32-42)

39 Aria Yeesus koora-pa orop ikiwemi Oliw ema urupok, anane oniya naap. Ona teeria pun ookap ikiwemik. 40 Ikip fuunep ona teeria wia maakek, “Ni feek ikok Mua Maneka farem-ikeka, ikoka akimowa me niar imenarinok.” 41 Ne wia piipuap lawisiw epasia ekak, mua nomona wafuriwkin ikip oriya, pepek naap ekak. Ekap keema muuna mikap Mua Maneka faremi maek, 42 “Oo Auwa, nena suusa yiep-puan fain nena kookalep-na perekome. ^{▼▼22.42Matiu 26.49-pa urufeka.} Nain yo kookalowa me yooke, weetak, nena kookalowa ooke.” [ 43 Naap aakunem-ikaeya ensel-ke orop o kekanowak. 44 O kema iiwawun pinar-afurap Mua Maneka senam akena nokarem-ikua. Mia oospowa aka saarik miiwa-pa kolonem-ikua.] 45 Mua Maneka farep weesereya iikirap ona teeria wiar ekak-na wi kema samorarep inep puep ikemik. 46 Ne wia ifimami wia maakek, “Ni moram naap iniman? Iikirap Mua Maneka farem-ikeka, ne ikoka akimowa-pa me wakiowen.”

Yuudas-ke Yeesus wi iiwua wapena-pa wiar wuak

(Matiu 26.47-56, Mak 14.43-50, Yon 18.3-11)

47 Naap wia maakem-ikaeya mua teeria maneka ekapep fuunemik. Yeesus ona teeria mua oko Yuudas naimik nain, os-ke miimok. Fuunep Yeesus wiar ekap opap wuakek. 48 Naeya Yeesus-ke maakek, “Yuudas, no sira naap onami Mua Muuka wi iiwua wapena-pa wiar wuekam naep-i?” 49 Ne ona teeria-ke naap wia urufap maemik, “Maneka, i wiamiya irakiyen-i?” 50 Naap maemi mua oko-ke iikirap fura aawemi pris woos mua uuwow mua ifana aken ekeria wiar puukeya orok. 51 Ne Yeesus-ke wia maakek, “Sa, naap me oneka.” Naap maakep-puap mua nain ifana wiar opami kiiriw wiar tana opaweya sariarek. 52 Ne kiremi wi pris woos mua, wi tempel ami mua ne wi owow woos mua o opowa ekapemik nain wia maakek, “Yo mua samora-ke efa naiman-i? Naeya fura ne kuuma opap feekiya efa opowa ekapeman. 53 Yo anane tempel koora-pa niamiya ikaiyem nain me efa opaman. Eliw, aakisa ni epa-ke, epa kokoma Satan-ke kekanek.”

Pita-ke Yeesus me amisarem naek

(Matiu 26.57-58 ne 26.69-75, Mak 14.53-54 ne 14.66-72, Yon 18.12-18 ne 18.25-27)

54 Aria Yeesus opap pris woos mua koora wiar pikiwemik. Ne Pita pun murarep ememin wiokami pika kemena ikiwok. 55 Mua papako owaruma-pa epia ururumep arem-ikaiwkin emin ekami wiamiya pokak. 56 Nan ikaeya uuwow emeria oko-ke mukun parina-pa baliwep urufap maek, “Mua fain pun o wameiya ikua.” 57 Naeya maek, “Sa, weetak, yo mua nain-ko me amisarem.” 58 Lawisiw naap ikok mua oko-ke baliwep urufap maek, “Nos pun wi teeria nain-ke.” Naeya maek, “Weetak, yo wia.” 59 Naap ikok mua oko-ke urufap sisewaremi maek, “Makena, mua fain mua nain wameiya ikua. Os pun Galili mua-ke.” 60 Naeya maek, “Ai, no opora maen nain yo me amisarem.” Naap maem-ikaeya aara farek. 61 Ne Yeesus kirep Pita mokoka toonep urufeya opora iiriw maakek nain kiiriw kema wiar epak, “Ikoka uura aara me farowa ikaeya me efa amisarem naep sailowa arow arinan.” 62 Opora nain kema suuwap epa maneka orop kema samorarep kerew omok.

Yeesus amap-niiremi arufamik

(Matiu 26.67-68, Mak 14.65)

63 Aria, wi mua Yeesus opamik nain-ke o amap-niiremi saru-pu-puukamik. 64 Konim tiiriw mokoka wiar kaikap nokaremik, “Nena mokoka-pa yia urufowa saarik mae, naareke nefa arufak.” 65 Naap onami opora sira-sira maakemi firekam-ikemik.

Wi Kaunsel Maneka-ke Yeesus opora-pa wuamik

(Matiu 26.59-66, Mak 14.55-64, Yon 18.19-24)

66 Aria uuriw epa wiimeya wi pris woos mua ne wi owow woos mua ne wi sira amis mua unowiya ekapep wiam fiirimemik. Wi mua teeria nain Kaunsel Maneka wia naimik. Wiam fiirimiwkin Yeesus aawep wi wiar pekapemik. Pekapiwkin maakemik, “Opor makena yia maake. No Krais-ki?” Naeya maek, “Yo nia maakinen-na ni makena me naowen. 68 Ne pun yo opora papako nia nokarinen-na, ni me kiripowen. 69 Ne aakisa Mua Muuka Mua Maneka Kekanowa Akena nain aken ekeria-pa pokap anane naap ikainon.” 70 Naeya unowiya iikirami maakemik, “No nena naap name main, no Mua Maneka Muuka-ke, naap-i?” Naeya os-ke, “Ni maiman naap, nain yos-ke.” 71 Ne maemik, “Opor papako o maemik nain me wiar kema suuwiyen. I yiena kakeniw miimamik, ona kakeniw opora fain maemi Mua Maneka firekiya.”