Luk 23 | MHL | STEP | Aria wi kaunsel unowiya iikirami Yeesus aawep anim onom maneka Pailat wiar pikiwemik.

‏ Luke 23

Yeesus Pailat wiar pikiwep opora-pa wuamik

(Matiu 27.1-2 ne 27.11-14, Mak 15.1-5, Yon 18.28-38)

1 Aria wi kaunsel unowiya iikirami Yeesus aawep anim onom maneka Pailat wiar pikiwemik. 2 Pikiwep nan opora-pa wuami Pailat maakemik, “Mua fain-ke i Yuuda teeria yia peeskimeya o ookimik. Siisar takis me iweka wia maakiya, ne feenap maem-ikaiya, ‘Yo Krais-ke, saria maneka-ke,’ naap wame maiya.” 3 Ne Pailat-ke Yeesus nokarek, “No mae, no wi Yuuda owow saria-ki?” Naeya maek, “Opora pepek nan maen.” 4 Ne Pailat-ke wi pris woos mua ne wi teeria maneka wia maakek, “Yo mua fain pina-ko me wiar imenam.” 5 Ne wi kekan-afurami faremik, “O Yuuda kame-pa emeria mua irakowa imenu naep kema wia iikirowiya. Galili-pa onoma wuak nain ekapep iiwawun feeke.”

Yeesus kiiriw Erot wiar pikiwep opora-pa wuamik

6 Aria Pailat-ke naap miimap wia nokarek, “Mua fain Galili mua-ki?” 7 Ae naiwkin Erot wiar sesekak, Yerusalem ekapep ikaeya. Moram Erot-ke Galili kame urufiya, ne Yeesus pun wi nain mua-ke. 8 Naeya Erot o urufap kemelak, moram iiriw o maiwkin miimak nain urufinen naem-ikua-na wia, me urufam-ikua. Naapeya Yeesus maa-ko oneya wiar urufekam naep opora unowa akena nokarek. Nokarek-na opora kuisow-ko me kiripomak. 10 Ne wi pris woos mua ne wi sira amis mua nan ikemik nain wadol opora unow akena mikamik. 11 Ne Erot-ke ona ami mua onaiya o amap-niiremik. Naap onami mia suuwowa eliw akena nain mia anian-pa wuomap nainiw Pailat wiar sesekamik. 12 Iiriw Erot Pailat ikos wiam irewam-ikemik, ne iir nain akena kiiriw womar wiam arowamik.

Pailat-ke Yeesus nomokow moke-pa patot warowa ae naek

(Matiu 27.15-26, Mak 15.6-15, Yon 18.39-19.16)

13 Pailat-ke wi pris woos mua, wi owow woosa mua ne emeria mua wia fareya ekapiwkin wia maakek, 14 “Ni mua fain aawep pekapemi maeman, wi emeria mua irakowa imenowa wia maakem-ikua, naap maiman. O opora-pa wuaman nain niena mokoka-pa yo nokarem-na pina-ko me wiar imenam. 15 Ne Erot pun naap furewap kiiriw sesekeya i yiar ekapok. Ni miimeka, o pina kuisow-ko me onak, aa eliw ifakimekamik. 16 Naapeya yo feenap maiyem, wi ami mua wia maakemkun sarua muutiw wariwkin yo piipuamkun ikiwinok.” [ 17 Ne wiena sira naap wiar ikua, wi mua koora ekap ikemik nain anane Pasowa maapora-pa Pailat-ke mua kuisow wasirkiya.] 18 Ne aria teeria maneka nain-ke kiriremi maemik, “O ifakimiwkin uminok, ne Barabas yia piipuomaya orainok.” 19 Barabas-na feenap onak, mua papako wiamiya Rom anim onoma iiraru naep irakowa iikirowami mua kuisow ifakimeya umok, naapeya koora-pa wuamik. 20 Ne Pailat-ke Yeesus piipuamkun ikiwinok naep nainiw wia maakek-na wia, wi unowiya faremi maemik, “Nomokow moke-pa uminok akena.” 22 O opora kuisow nain wia maakowa arow arek, “Moram, o pina kain onak? Opor pina weetak, o ifakimowa nain. Naapeya wi ami mua wia maakemkun sarua wariwkin yo piipuamkun ikiwinok.” 23 Naap wia maakek-na wia, wi kekan-afuramik, nomokow moke-pa uminok naep piikirami kerew akena kirirowiwkin opora marewarep wiisiw wiokak. 25 Ne mua eena anim onom muuta nain irakowa imenap mua wia ifakimep koora ekap ikua nain piipuak. Ne Yeesus wiena kookalowa wiokami ifakimuk naeya amapikiwemik.

Yeesus nomokow moke-pa patot waremik

(Matiu 27.32-44, Mak 15.21-32, Yon 19.17-27)

26 Aria, wi Yeesus aawep pikiwem-ikok mua oko miirowamik, unuma Saimon. Mua nain owowa Sairini, ne Yerusalem ekapem-ikua. O urufap opap Yeesus nomokow moke akuawomowa suuwamik. Ne os-ke akuawep Yeesus murarep ookam-ikua. 27 Emeria mua teeria maneka ookam-ikemik. Ne wi emeria papako kema samorarep kerew akena omem-ikiwemik. 28 Ne Yeesus kirep wia maakek, “Ni Yerusalem emeria, yo me efa omaweka. Ni niena niam omawami muuka pun wia omaweka. 29 Ni miimeka, ikoka epa-ko kerereya feenap maikuan, ‘Wi emeria sumarsa ne wi muuka wia kakaltowa marew, wi nain eliw kemelikuan.’ 30 Iir nain feenap maikuan, ‘Oo, ema mane-maneka, ni tenep oromi yia ifakimurumekan oo! Oo, ema gelemuta fain yia pipilimekan oo!’ Naap maikuan. 31 Aakisa yo pina marewa fain efa samorimik. Ne ikoka wi mua pina onimik nain samor akena wia samorikuan.”

32 Aria wi Yeesus pikiwemi mua samora erup nain pun wia aawep pikiwemik, Yeesus mamaiya wia ifakimu naep. 33 Ikiwemi epa ara oko-pa fuunemik, epa nain unuma “I mua woos oona” naimik. Epa nan nomokow moke-pa patot waremik. Ne pina mua wiam erup nain pun patot wiaremik, oko Yeesus aken ekeria-pa wuamik ne oko asow ekeria-pa. 34 Ne Yeesus-ke wi opamik nain wia maek, “Oo Auwa, wi pina wiar iirare. Wi me amisarep naap efa onamik,” naap maek. Aria wi ami mua-ke naap onap-puap Yeesus mia suuwowa satu niirep wiar aawemik. 35 Wi emeria mua o urufam-ikaiwkin wi woos mua niirow opora opawami maem-ikemik, “Iiriw mua oko wia naapam-ikua. Ne aakisa Mua Maneka-ke o Krais pepekimeya-na ona wame naapinok oo!” 36 Ne wi ami mua pun o firekami wameiya ekap eka masia onakemi maakemik, “No wi Yuuda sariaiya-na nena name asipe, ne me uminan.” 38 Ne ami mua-ke opora feenap siisimep ona woos erekina-pa wuamik, “MUA FAIN WI YUUDA OWOW SARIA MANEKA-KE.” 39 Ne pina mua erup nomokow moke-pa patot wiaremik nain, oko-ke kirep Yeesus firekami maakek, “No Krais name main-i? Naap nain nena name naapami is pun yia naape.” 40 Naap maeya mua oko nain-ke miimap amukarek, “No pina oneya nefa sererimemik, nain no Mua Maneka me keker opin-i? 41 I yiam erup pepek yia ifakimiwkin umiyen, moram i sira samora onap pina aawemik. Wiisak, mua fain wia, pina-ko me onak,” naap maakek. 42 Ne kirep Yeesus maakek, “Yeesus, no ikoka owow iinan Saria Maneka ikok yo efa kema suuwe.” 43 Naeya maakek, “Yo maken akena nefa maakiyem, no ikoka kuisow yena efamiya owow eliwa-pa ikainan.”

Yeesus nomokow moke-pa umok

(Matiu 27.45-56, Mak 15.33-41, Yon 19.28-30)

44 Aria unun ama naeya ama umok. Miiw unowa iiwawun kokoma-ke muep ikaeya ikip ama arow naek. 45 Ne konim maneka tempel koor kemena-pa sererep ikua nain-ke onaiw gone-pariw perenep oromi kakawa erup arek. 46 Aria Yeesus kerew akena faremi maek, “Oo Auwa, yena ewar aakisa no wapena-pa nefar wuiyem.” Naap maemi umok. 47 Umeya ami woos mua-ke naap urufap Mua Maneka unuma fakerami maek, “Maken akena, mua fain mua eliwa-ke.” 48 Ne yakeyak o urufowa ekapep ikemik nain naap urufap kema samorarep kemanpira wiam arufami kirep ikiwemik. 49 Ne Yeesus ona womar unowa ne emeria papako Galili-pa o ookam-miok ekapep fan ikemik nain, lawisiw epasia-pa iimarep ikok naap urufam-ikemik.

Yeesus sawi napuma nomon ona-pa wuamik

(Matiu 27.57-61, Mak 15.42-47, Yon 19.38-42)

50 Aria mua oko unuma Yosep, ona owowa Arimatia, Yuudia kame-pa ikua. Mua nain kakeniw ikaiya, ne os pun Kaunsel teeria-ke. 51 Wi Kaunsel papako opora anumap Yeesus opora-pa wuamik nain eliwa me naek. O Mua Maneka miiw mua pika kemena-pa wia wuowa epa nain wiar arewap ikua. 52 Os-ke Yeesus sawi napuma aawep soopekam naep Pailat wiar ikiwep nokarek. 53 Ikiwep Pailat nokareya eliw naakek. Naeya ikiwep nomokowa-pa amaporop konim kiaiw wasiep pikiwep nomon ona-pa wuak. 54 Nomon ona nain aakisa fan kuamik, ne mua-ko nan me wuowa ikemik. Ne Sabat fofa pun tiil arem-ikaeya maa saliwamik. 55 Wi emeria iiriw eena Galili piipuap Yeesus wameiya ekapemik nain Yosep muri-ookap ikiwep matmat urufamik. Ne Yeesus sawi napuma kamenap wuamik nain pun urufamik. 56 Urufap-puap kiiriw kirep owowa-pa maa tana ikin eliwa ne wel ikin eliwa aawep wuap-puamik. Moram Sabat fofa kerereya wiena sira ookami wi uuraremik.