‏ Luke 24

Yeesus umep ikok iikirak

(Matiu 28.1-10, Mak 16.1-8, Yon 20.1-10)

1Aria Sande epa wiiwim wi emeria nain iikirap maa ikin eliwa iiriw aawep-puamik nain feekiya matmat ikiwemik. 2Ikiwep fuunep nomon omopora upep-puamik nain urufamik-na iiriw suuw-ekap-puamik. 3Wi ekap tepak ikiwemik-na Yeesus sawi napuma-ko me urufamik. 4Naap urufap kema unu-unowa wuam-ikaiwkin mua wiam erup wi mamaiya-pa wiar imenaremik. Wiena mia suuwowa parin onaiya. 5Wi naap urufap kema tootonep keema muuna mikap maara miiwa-pa mikamik. Ne mua erup nain-ke wia maakemik, “Ni moram mua mokok enuma ikua nain umow epa-pa fan akupiman? O fan me ikua, iiriw iikirak! Iiriw Galili-pa ikok opora nia maakem-ikua nain kema suuweka. 7Naap maem-ikua, ‘Mua Muuka ikoka wi pina mua wapena-pa wiar wuiwkin nomokow moke-pa patot warikuan. Ne umep fofa arow-pa kiiriw iikirinon.’ Naap maek nain kema suuweka.” 8Ne wi Yeesus opora nain wiar kema suuwap kiiriw kirep owowa ikiwemik. Ikiwep ona teeria mua ten kuisow kuisow nain wia maakemi mua papako pun wia maakemik. 10Wi emeria nain Maria Makdala, Yoana, Yems onak Maria ne emeria papako, wis-ke ikiwep wi aposel wia maakemik. 11Wia maakiwkin ewar opora-ke naep makena me wiar naemik. 12Ne Pita-ke iikirap matmat karuwiw ikiwok. Fuunep ineka kuep tepak mokakek-na konima muutiw nan ikua. Naap urufap os pun kiiriw kirep ekapep kema unu-unowa wuam-ikua.

Mua wiam erup Emeus ikiwem-ikok era-pa Yeesus urufamik

(Mak 16.12-13)

13Aria, fofa kuisow neeke mua wiam erup owowa Emeus naimik nain ikiwemik. Yerusalem piipuap owowa nain ikiwowa era lawisiw epasia. ▼

▼24.13Ikiwowa era mail ikur okaiwi-pa erup naap.

14Ikiwem-ikok inon maa naap imenarek nain aakun-ikim-ikemik. 15Ne Yeesus ona wi wiar imenaremi wiamiya arep ikiwem-ikua. 16O urufamik nain miiriramik. 17Ne wia nokarek, “Ni niam erup maa mauwa aakun-ikim-ikaiman?” Naap wia nokareya pasiriw iimarep ikemik. 18Mua oko unuma Kliopas, os-ke maakek, “Inon maa imenarek nain no naisow me amisarep yia nokarin-i?” 19Naeya maek, “Maa mauwa-ke imenarek?” Ne maakemik, “Aa-na Nasaret mua Yeesus wiar imenarek. O profet-ke, Mua Maneka mokoka-pa uuwow maneka onak ne opor eliwa wia wafuram-ikomak. Ne wi emeria mua pun sira wiar urufap eliwa naemik. 20Naap uuwam-ikaeya o uminok naep wi pris woos mua ne yiena owow woos mua-ke opap Rom anim onoma wapena-pa wiar wuamik. Ne wis-ke nomokow moke-pa patot waremik. 21I iiriw feenap maem-ikemik, os-ke i Isrel wi iiwua tepak-pa wiar ikemkun yia iirarinon. Naemik-na weetak, o umok. Ne maa nain imenarek nain aakisa fofa arow arek. 22I aakisa yiena teeria emeria papako-ke maiwkin soranemik. Wi uuriw akena matmat ikiwemik-na Yeesus sawi napuma nan me ikua. Ne kiiriw ekapep feenap maemik, ‘Wi ensel-ke yiar imenarep yia maakemik, “O iiriw iikirak,” ’ naap yia maakemik. 24Naap maiwkin mua papako matmat ikiwemik-na wis pun naap urufamik. Mua makena ona me urufamik.”

25Ne Yeesus-ke wia maakek, “Ni niam erup kema marew akena! Opor unowa iiriw wi profet maemik nain ni baliwep kema suuwap me wiar opaman. 26Ni opor maneka feenap ikua nain me amisareman-i? ‘Krais kiikir sirirowa aawep ikoka parin maneka-pa mua unumiya ikainon,’ ni nain me kema suuwiman-i?” 27Nain wia maakemi Moses ne wi profet unowa opora-pa onoma wuami Mua Maneka opora unowa o maemi maek nain wia ookomak. 28Aria wi aakun-ikiwep Emeus fuunep owowa nomakekam naep onam-ikaeya asipami maakemik, “Aa, ama orok, lawisiw akena kokomarinon. I yiokap feeke yiar ine.” Naeya wi wiokak. 30Nan ikok maa enow epa-pa Yeesus wiamiya pokap emer ikowa aawep Mua Maneka sira eliwa naakep wu-wuepap wienakek. 31Naap oneya mokoka melinaremi amisaremik, faa Yeesus-ke naemik. O naap onap-puami mesenalek. 32Wi kiiriw me urufap wi-wieniw maem-ikemik, “Naapeya i era-pa ekapem-ikemkun os-ke yiamiya aakunemi Mua Maneka opora ariman yia wuomaya kema-ke yiar iikirak!” 33Naap aakunemi ewur kuisow iikirami kiiriw kirep Yerusalem ikiwemik. Ikiwep ona teeria ten kuisow kuisow wi mua papako wiamiya ikaiwkin ikip wiar fuunemik. 34Fuuniwkin wia maakemik, “Maken akena, yiena Maneka kiiriw iikirak! Saimon pun wiar imenareya urufak!” 35Naeya wiam erup pun era-pa maa imenarek nain ne emer ikowa wia wuepomaya paayaremik nain wia nanaromamik.

Yeesus ona teeria wiar imenarek

(Matiu 28.16-20, Mak 16.14-18, Yon 20.19-23)

36Wi nain aakunem-ikaiwkin Yeesus ona gone-pa wiar imenaremi wia maakek, “Ni kema sonom eliwa ikeka.” 37Wiar imenareya wi kema tootonep kema unu-unowa wuami mua kukusa-ke naemik. 38Naeya wia maakek, “Ni moram kema unu-unowa wuiman? 39Yo wapena ne merena efar urufeka, faa yos-ke. Yo efa tiimap fureweka, moram mua kukusa-na mia oposia, oona marew ikua.” 40Naap maemi ona wapena, merena wia ofakowak. 41Wi naap urufap manek akena kemelamik, nain makena-ke me naemik. Ne wia maakek, “Ni maa enowa-ko niar ikua-i?” 42Naeya mera ikowa kakawa iwep urufam-ikaiwkin wiar aawep enek.

44Neemi wia maakek, “Yo maa unowa fain iiriw niamiya ikok nia maakem-ikem, opor unowa Moses ne wi profet, ne wi somek buk siisimemik nain yo efa maemi siisimemik nain makena imenarowa-ke.” 45Naap maemi wi kema wia fookeya Mua Maneka opor unowa nain wiar amisaremik. 46Ne wia maakek, “Mua Maneka opora feenap ikua, Krais sirirowa maneka aawep uminon, ne fofa arow-pa iikirinon. 47Ni miiw unowa ikiwep yo unuma-pa wia maakiwkin kema kiruk. Kema kiriwkin Mua Maneka-ke pina wiar iirarinon. Uuwowa nain Yerusalem-pa onoma wuami maa unowa urufaman nain wia maakem-miaweka. 49Yena Auwa maa nia sesekomowa maek nain ikoka yena nia sesekominen. Naapeya ni ewur me ikiweka, feek ikaiwkin Mua Maneka kekanowa niar oreya o kekanowa onaiya ikiweka.”

Mua Maneka-ke Yeesus aawep iinan owowa purupok

(Mak 16.19-20, Aposel 1.9-12)

50Ne aria Yeesus-ke wia aawep Betani wia pikiwep nan ona wapena fakerap Mua Maneka farep nokarek, baliwep wia wuinok naep. 51Naap onam-ikaeya Mua Maneka-ke aawep owow iinan purupok. 52Ne wi keema muuna mikap lotu onap-puap kemelami kiiriw kirep Yerusalem ekapemik. 53Nan ikok anane tempel koora ikiwep Mua Maneka maemi unuma fakeram-ikemik.