Mar 14 | MHL | STEP | Wi Yuuda Pasowa ne emer kekanowa enowa maapora ere naap onikuan. Ne wi pris woos mua ne sira amis mua Yeesus kokot ifakimu naep opora anumamik.

‏ Mark 14

Wi sira amis mua-ke Yeesus ifakimowa naep aakunemik

(Matiu 26.1-5, Luk 22.1-2)

1 Wi Yuuda Pasowa ^{▼▼14.1Iiriw ekera wi Yuuda mua Isip owowa-pa ikok samor aawem-ikaiwkin Mua Maneka-ke wia asipap wia aawep Isrel owowa wia pikiwok. Naapeya wi Yuuda mua maa nain kema suuwami anane mokoma ne ona siiwa kerereya Pasowa sira onimik. Wi sande kuisow sira nain onam-ikok emer kekanowa, yis marew nain enem-ikaimik.} ne emer kekanowa enowa maapora ere naap onikuan. Ne wi pris woos mua ne sira amis mua Yeesus kokot ifakimu naep opora anumamik. 2 Maemik, “I maapora fofa-pa me ifakimiyen, oko wi yakeyak maneka nain-ke yia urufap iiwua yia purupomikuan.”

Emeria oko sanda aawep Yeesus ikiwosa-pa sawikomak

(Matiu 26.6-13, Yon 12.1-8)

3 Aria Yeesus Betani-pa ikok Saimon koora-pa wiar ikua. Mua nain iiriw mia gigir mane-maneka onaiya ikok sariarek. Yeesus nan ikok maa enem-ikaeya emeria-ko sanda feekiya ekapok. Sanda nain sesa manek akena. Ekapep botol opaimika wuepap sanda Yeesus ikiwosa-pa sawikomak.

4 Naap oneya mua papako nan ikemik nain naap urufap o maemi wi-wieniw maemik, “Sa, sanda nain oram maneka nan wesusak ya. 5 Nain sesekekamik-na maamuma andet arow naap eliw aawep wi mua maa marewa nain wiekamik.” Naap maemi emeria nain kakankamik.

6 Ne Yeesus-ke wia maakek, “Neek efa oninok, ni me amukareka. Ni moram kema wiar samoriman? O sira eliw akena efa onak. 7 Wi mua maa marewa nain anane niamiya ikaikuan, ne niena kookalep-na eliw wia asipam-ikowen. Ne yo wia, anane niamiya me ikainen. 8 Emeria fain yo kema efa suuwap ona kema-pa naap efa onak. Yo ikoka efa soopowa nain os-ke sira eliwa onami mia kiikir efa saliwak. 9 Yo maken akena nia maakiyem, ikoka yo opor eliwa owow unowa nain wia maakem-miawemi o sira eliwa efa onak nain pun wia maakikuan. Ne os pun kema suuwikuan.”

Yuudas, Yeesus wi pris woos mua wapena-pa wia wuowa eliw naek

(Matiu 26.14-16, Luk 22.3-6)

10 Yeesus teeria mua ten kuisow erup nain mua oko unuma Yuudas Iskariot. Os-ke Yeesus wi wapena-pa wiar wuinen naep wi pris woos mua wiar ikiwok. 11 Ikiwep opora wia maakeya miimap kemelami feenap maakemik, “No ikoka nefa sesenariyen.” Ne Yuudas ikip kema suuwam-ikua, ikoka kamenap onap Yeesus wi wapena-pa wiar wuinen, nain era akupam-ikua.

Yeesus ona teeria onaiya Pasowa enowa enemik

(Matiu 26.17-25, Luk 22.7-14 ne 22.21-23, Yon 13.21-30)

12 Aria emer kekanowa enowa maapora kerereya wi Yuuda sipsip muuka ifakimep Pasowa enow maneka onamik. Iir nain Yeesus teeria-ke o nokaremik, “Nee, i epa kaanek ikiwep maa enowa onomiyen?” 13 Naeya mua erup wia sesekami wia maakek, “Ni owow maneka ikiweka. Ikiwep neeke mua oko urufowen, eka amina opap niar ekapem-ikaeya urufap-na wameiya ikiweka. 14 Ikiwemi koora kaanek fuunep-na koor onoma nain maakeka, ‘Yiena somek mua nefa maek, “Yo koor kemena epa wuap-puomen nain are kaaneke ikua? I ikoka yena teeria onaiya Pasowa maa enowa neeke enimiyen naek.”’ 15 Naap maakiwkin samapora iinan koor kemena manekiw nia ofakowinon. Epa iiriw kakenap-puamik. Maa enowa neeke yia onomaka.”

16 Aria wiam erup ikiwep Yerusalem kererep Yeesus wia maakek naap imenamik. Ne nan ikok maa enowa onamik. 17 Aria urera Yeesus ona teeria onaiya fuunep koora nain ikiwemik. 18 Nan maa enem-ikok Yeesus-ke maek, “Yo maken akena nia maakiyem, mua kuisow i yiamiya ikua, os-ke ikoka yo iiwua wapena-pa efa wuinon. Mua nain yo efamiya maa enem-ikaiya.” 19 Naap maeya wi kema samorarep mua kui-kuisow o nokaremik, “Yo me efa maen-yon aa?”

20 Naeya wia maakek, “Ni mua ten kuisow erup fain mua kuisow-ke sira naap efa oninon. Mua eena ikos epaskun emera maa eka epira-pa suuwap enimimik nain. 21 Ae, makena, yo Mua Muuka ikoka umowa nain opora iiriw Mua Maneka opora-pa siisimep-puamik naap akena arinon. Aa wiisak, mua eena wi iiwua wapena-pa efa wuiya nain ikoka samor aawinon, onak me muukarekak-na eliw-yon.”

Yeesus komunio enowa sira wuak

(Matiu 26.26-30, Luk 22.15-20, 1 Korin 11.23-25)

22 Aria wi maa enem-ikok Yeesus emer ikowa aawep opap Mua Maneka sira eliwa naakep-puap wu-wuepap wienakemi maek, “Aawep enimeka. Fain yena mia-ke.”

23 Ne wain urupa opap kiiriw Mua Maneka sira eliwa naakep-puap wienakeya enemik. 24 Enem-ikaiwkin wia maakek, “Fain yena aka-ke. Opor enuma eena Mua Maneka ni niamiya kaikiya nain yena aka fainiw koonowinon. Aka efar oromi miiw unowa emeria mua pina wiar iirarinon. 25 Yo makena nia maakiyem, yo wain eka aakisa enimiyem fain kiiriw nainiw me eniminen, weetak. Naap ikok yena Auwa pika kemena-pa ikok wain eka enuma oko niamiya eniminen.” 26 Yeesus opora maep weesereya wi lotu someka awep-puap oromi ikiwep Oliw ema urupemik.

Yeesus Pita maakek, “No ikoka efa sailinan”

(Matiu 26.31-35, Luk 22.31-34, Yon 13.36-38)

27 Ne Yeesus ona teeria wia maakek, “Ni ikoka yo efa piipuap baurarowen. Moram Mua Maneka opora iiriw siisimep-puamik nain feenap,

‘Yo sipsip nepiow mua waremkun sipsip wiar baurarep pukikuan.’
(Sekaraiya 13.7)

28 Nain yo umep ikok Mua Maneka kekanowa-pa iikirap Galili kame ikiwemkun ni murarep yookowen.”

29 Ne Pita-ke maakek, “Wi unowa fain baurarikuan-na yo yaisow me nefa piipuinen.” 30 Naeya maakek, “Yo maken akena nefa maakiyem, ikok uura aara farowa erup me areya no sailemi maem-ikainan, mua fain yo me amisarem. Naap sailowa arow arinan.” 31 Naeya Pita-ke kekan-afurami maek, “Weetak, yo naap me mainen. I eliw ikos yia ifakimuk, nain yo me sailinen.” Ne wi unowiya opora kuisow nainiw maemik.

Yeesus Mua Maneka farowa naep Getsemani epa ikiwok

(Matiu 26.36-46, Luk 22.39-46)

32 Aria wi ikiwep epa oko Getsemani naimik nan kereremik. Ikip fuunep ona teeria wia maakek, “Ni feek pokap ikaiwkin yo feek ekap Mua Maneka farinen.” 33 Ne ekami Pita, Yems ne Yon wia maakeya ookap ekamik. Kema samor-ko peelalemi kema pinarep wia maakek, “Yo kema manek akena samorariyem, yo fan umiyem. Ni me ineka, feek pokap ikeka.”

35 Ne lawisik ekap keema wueskap iima ifemakep Mua Maneka farek, “Oo Auwa, era oko-ko ikainok-na yo yoowa me aawinen-yon.” 36 Ne nainiw maek, “Auwa, maa kamenap nain no eliw oninan. Nena suusa yiep-puan nain perekome. ^{▼▼14.36Matiu 26.49-pa urufeka.} Nain yo oram maiyem, nena kookalowa muutiw ooke.”

37 Mua Maneka farep-puap wiam arow nain wiokap epak-na wi inep ikemik. Ne Pita maakek, “Saimon, no moram inen? No lawiliw muuta pokap ikowa nain no ewur inen. 38 Ni me ineka. Mua Maneka farem-ikeka. Naap onowen-na akimowa-pa me oro-boonowen. Niena kema-ke yo yookowa kookaliman, nain mia-ke palanow marew.”

39 Naap wia maakep-puap nainiw ekak. Ekap kiiriw Mua Maneka faremi opora iiriw maek nain nainiw maek. 40 Naap maep epak-na wi mokoka samor akena pinarep iiriw inep puemik. Ne wia iikiroweya opora maakowa kema marewaremik. 41 Ne kiiriw ekap Mua Maneka farep-puap nainiw epak. Nain-ke arow arek. Ne wia maakek, “See, ni naap oram inep ikowen-i? Ni inow epa weeserek. Yo Mua Muuka efa opap wi mua samora wapena-pa wiar wuowa nain mamaiya arek. 42 Ni iikiriwkin ikiwikua. Urufeka, yo iiwua wapena-pa efa wuowa mua nain fanek.”

Wi Yeesus opamik

(Matiu 26.47-56, Luk 22.47-53, Yon 18.3-12)

43 Aria naap maem-ikaeya Yuudas ekapep fuunek, eena ona teeria mua nain. Ne mua teeria maneka o wameiya ekapemik nain wi pris woos mua, sira amis mua ne wi owow woos mua-ke wia sesekiwkin fura, kuuma aawep ekapemik. 44 Ne Yuudas amisa iiriw wiep-puak, “Ekami mua nain opap wuakemkun-na maeka, mua makena naneka. Naeya ekap opaka. Ne baliwep urufeka, me baurarinok.”

45 Aria Yuudas kererep Yeesus wiar ekami maek, “Oo somek mua.” Naap maemi Yeesus opap wuakek. 46 Naap oneya mua teeria maneka nain ekap o opamik. 47 Ne Yeesus teeria mua oko-ke ona fura maala mufep pris woos mua uuwow mua ifana wiar puukeya orok. 48 Ne Yeesus-ke wia maakek, “Ni yo mua samora-ke efa naiman-i? Naeya fura kuum onaiya efa opowa ekapeman. 49 Yo anane tempel koora-pa ikok suule wia onam-ikem, nain me efa opaman. Aa-na eliw, ni aakisa sira efa oniman fain Mua Maneka opora efa maek nain maken akena arek.”

50 Ne ona teeria-na o piipuap bauraremik. 51 Wi Yeesus opap pikim-ikaiwkin takira oko murarep wiokam-ikua. O mia suuwowa me wuak, konima muutiw wame baguserap ikua. Wi o urufap opiwkin konima wiar ululeya saporma baurarek.

Yeesus opora-pa wuamik

(Matiu 26.57-68, Luk 22.54-55 ne 22.63-71, Yon 18.13-14 ne 18.19-24)

53 Aria wi Yeesus opap pris woos mua koora wiar pikiwemik. Pikiwep neeke ikaiwkin wi pris woos mua, sira amis mua, ne wi owow woos mua ekapep wiam fiirimemik. 54 Pita pun Yeesus ememin ookami pika tepak ikiwok. Ikiwep wi ami mua wiamiya pokap epia arem-ikua.

55 Aria wi pris woos mua ne wi Kaunsel Maneka unowiya Yeesus ifakimowa nain wadol opora papako imenap neeke ifakimiyen naemik. Teeria maneka ekapemi wadol opora mikamik pun pina-ko me wiar imenamik. Opor unowa maemik nain me makena. 57 Ne mua papako-ke iikirami opora wiar kiripami wadol opora arowami maemik, “O opora naap maeya miimamik, ‘Tempel koora eena mua-ke wapeniw kuamik fain ikoka yos-ke te-teekinen. Te-teekap fofa arow muutiw kiiriw enuma kuainen, me wapeniw kuainen,’ naap maek,” naemik. 59 Wi aakunemik nain opora momorar-iraparek.

60 Ne pris woos mua-ke iimarep Yeesus nokarek, “Wi fain opor unowa nefa mikimik nain no opora-ko me wia kiripominan-i?” 61 Naap nokarek-na opora-ko me wia kiripomak, popor maneka ikua. Ne pris woos mua-ke kiiriw nokarek, “No Krais-ki? No Mua Maneka muuka-ki?” 62 Ne Yeesus-ke maek, “Ae, yos-ke. Ni ikoka Mua Muuka Mua Maneka Kekanowa Akena nain aken ekeria-pa wiar pokap ikok maa ipisia onaiya iinan-pa orom-ikaeya urufowen!”

63 Opor muut nain pris woos mua-ke kema bagiwirap ona mia suuwowa pere-perekami maek, “Opor papako o maemik nain me wiar kema suuwiyen. Ona opora aakisa maek nain wiar miimaman-i? Mua Maneka firekiya ya. Aria ni kamenap maiman?” Ne wi unowiya maemik, “Mua Maneka firekiya, naapeya uminok akena.” 65 Ne mua papako-ke iikirami o opeka waremik. Mokoka konimiw wiar kaikap arufami maakemik, “Nena mokoka-pa yia urufowa saarik mae, naareke nefa arufak.” Ne wi ami mua-ke aawep ikiwemi kiiriw arufamik.

Pita-ke Yeesus me amisarem naek

(Matiu 26.69-75, Luk 22.56-62, Yon 18.15-18 ne 18.25-27)

66 Ne aria Pita nan epia arem-ikaeya pris woos mua uuwow emeria oko-ke ekapemi urufap kakeniw o mokakemi maek, “Nos pun Nasaret mua Yeesus wameiya ikon.” Ne Pita-ke sailemi maek, “No maa mauwa maen? Yo me amisarem.” Naap maep-puap orop pika omopora-pa nan iimarep ikaeya aara farowa kuisow arek.

69 Nan ikaeya uuwow emeria nain-ke kiiriw urufap wi mua wameiya-pa ikemik nain wia maakek, “Mua fain pun wi teeria nain-ke.” 70 Naeya nainiw sailek. Ne naap iki-ikok wi mua o wameiya-pa ikemik nain-ke maakemik, “Makena, nos pun wi teeria nain-ke. No Galili mua-ke.” 71 Ne maek, “Yo makena maiyem. Mua eena ni maiman nain yo me amisarem. Yo wadolalinen-na samor aawinen.”

72 Naap maeya aara nainiw farek. Nain-ke erup arek. Aara fareya Yeesus iiriw Pita maakek nain kema wiar epak, “Aara farowa erup me areya nos-ke me efa amisarem naep sailowa arow arinan.” Ne nain kema suuwap samor akena omok.