Mar 16 | MHL | STEP | Aria Sabat fofa weesereya emeria wiam arow, Makdala owow emeria Maria, ne Maria oko Yems onak, ne Salome, wi ikiwep sanda sesenaremik, Yeesus sawi napuma-pa ifowa naep.

‏ Mark 16

Yeesus umep ikok iikirak

(Matiu 28.1-8, Luk 24.1-12, Yon 20.1-10)

1 Aria Sabat fofa weesereya emeria wiam arow, Makdala owow emeria Maria, ne Maria oko Yems onak, ne Salome, wi ikiwep sanda sesenaremik, Yeesus sawi napuma-pa ifowa naep. 2 Ne Sande uuriw epa wiiwim naap iikirap matmat ikiwemik. 3 Wi-wieniw aakun-ikiwemik, “Nee, naareke nomon maneka omopora ofomap-puamik nain yia paaskominon noma?” Naap mae-ikiwem-ikemik.

4 Wi ikip fuunep mokoka wuamik-na nomon ebebiria maneka nain iiriw suuw-ekap-puamik. 5 Naap urufap nomon ona nain tepak ikiwemik-na takira-ko urufamik. Takira nain aken ekeria-pa pokap ikua, mia suuwowa kia manekiw. Naap urufap samor akena soranep rurukerap naap ikemik. 6 Ne takira nain-ke wia maakek, “Ni kema me tootoneka. Ni Nasaret mua Yeesus eena nomokow moke-pa umok nain urufowa ekapeman-i? O fan me ikua. Iiriw iikirak. O eena wuamik fain urufeka. 7 Ni ikiwep ona teeria wia maakemi Pita pun maakeka. ‘O iiriw miimep Galili kame ikiwok. Ni ikiwep neek urufowen, iiriw nia maakek naap.’ Naap wia maakeka.”

8 Wi naap miimap kema manek akena tootonep karuemik. Wi kema tootonep mua era-pa wia urufamik nain opora-ko me wia maakemik. ^{▼▼16.8Opor ara fain (9-20) Mak ona me siisimok. Mua papako-ke siisimep Mak opora wiar anetiramik.}

Makdala owow emeria Maria Yeesus urufak

(Matiu 28.9-10, Yon 20.11-18)

9 Aria Yeesus umep Sande uuriw akena iikirak. Iikirap ikip Makdala owow emeria Maria wiar imenareya urufak. Emeria nain iiriw sawur samora ikur okaiwi-pa erup anirawap ikaiwkin Yeesus-ke wia iirarek. 10 Os-ke Yeesus urufap ekapep ona teeria kema samorarep omem-ikaiwkin wia maakek, 11 “Yeesus iiriw iikirak. Yo yena mokoka erup urufam.” Wia maakek-na opora me wiar miimamik.

Yeesus teeria mua wiam erup o urufamik

(Luk 24.13-35)

12 Aria iir oko Yeesus teeria mua wiam erup Yerusalem piipuap epa oko ikiwem-ikaiwkin Yeesus ona wiar imenarek. 13 Ne aakisa fan o urufap amisarep kiiriw kirep Yerusalem ekapep ona teeria unowa nain wia maakemik-na opora me wiar miimamik.

Yeesus ona teeria wia sesekak, ona opor eliwa miiw unowa wia maakowa

(Matiu 28.16-20, Luk 24.36-49, Yon 20.19-23)

14 Aria naap ikok Yeesus teeria mua ten kuisow kuisow koora-pa ikok maa enem-ikaiwkin ona wiar imenarek. Wi o urufamik nain wia maakiwkin opora me makena-ke naep me wiar miimamik. Naapeya wia amukarek.

15 Ne wia maakek, “Ni owow unowa ikiwemi yena opor makena eliwa fain wia maakem-miaweka. 16 Ne wi opora efar opimik nain eka-pa wia yasuwiwkin Mua Maneka teeria-pa ikauk. Ne opora me efar opimik nain yo teeria-pa me efar ikaikuan. Ikoka umep samor aawikuan. 17 Aria wi yo opora efar opap makena-ke efa naimik nain ikoka Mua Maneka kekanowa-pa feenap onikuan, wi mua sawur wia anirawiwkin ikemik nain yo unuma-pa wia iirarikuan. Ne opor ononer aakunikuan. 18 Wi ifa samora opikuan-i e maa samora enimikuan-na me samor aawikuan. Wi napum mua mia-pa wapena wuiwkin sariarikuan.” Naap wia maakek.

Yeesus iinan urupok

(Luk 24.50-53, Aposel 1.9-11)

19 Yiena Maneka Yeesus opora wia maakep weesereya Mua Maneka-ke aawep iinan purupeya o aken ekeria-pa wiar pokap ikua. 20 Ne ona teeria-ke owow unowa ikiwep o opor eliwa nain wia maakem-miawemik. Ne yiena Maneka wiamiya ikok opora wiar kekanoweya maa miililina unowa onamik.