Hebrews 4
Anutu-te hil sawaah sil-ambe mando gaving yi
1Vakasin sen Anutu jôôy nambe yite hil e landukana yite taaku sawaasin-ato naahen neep, om yaningg oo jêênin yiiy in mak ham ti le na balup monaativak mando mop lavuun, de me-le dukana Anutu-te taaku sawaasin-atêêto le. 2Yiiy hango banye nivasa nambe sen hil Islel lango bôôy-ato, lemu banye nivasa sen Islel langôô-ju ond me-hôôvu sil e, in yoo lango malis amu, de me-lawii-having e. 3Nganjo yiiy sen yaawii-having-ato ond mem yiiy naalukala Anutu-te taaku sawaasin-atêêto. In bôôy Anutu nêêl nambe,- “Sa longgpayo nivaane be saanêêl keen lôôt nambe sil-ame le landukanaam sate taaku sawaasin-anjo le, malis lôôt.”
- “Anutu wiing yite kul pin-ambe lung la, tonde busin sen tu vindak yuuh-ato ond sawaah.”
- “Sil-ame le landukanaam sate taaku sawaasin-anjo le, malis lôôt.”
- “Peey-anjo naambe ham gango Anutu lava ond
- ham alompayo me-niwêêk jak lôôt e.”
12In Anutu-te vakasin ond metumin-ambe niwêêk neep. De Anutu-te vakasin yoo navu ngali lôôt, savok yipak diin sen navu vaalu vaaluu-to. In yipak diin ond lohvu nambe na ganggwang omaahonôôn alopayo be bayaalin lumandus osin taambelak, nganjo Anutu-te vakasin ond mem nala nanggwang omaahonôôn alondpayo keen-ambe nayaalin nôôn osin kanu. Yik Anutu-te vakasin yoo navu taato va pin sen yakangg navu hôôk yalonggpayôô-to langaah. 13De va pin sen Anutu hatung-ato ond ti me-lohvu nambe gôôpis in yi le, malis. Yik va pin katekin-ambe nando melangaah keen hôôk Anutu me, tombe yik yii-ju sen yale aambiing vakasin vu yii-to. - (3) Saam 95:11 Hiblu 3:11* - (4) Jen 2:2* - (5) Saam 95:11* - (7) Saam 95:7-8* - (8) Diu 31:7 Jos 22:4* - (10) Jen 2:2* - (12) 1 Pita 1:23 Epesas 6:17 Taato 1:16 19:15 Jon 12:48*
Yesu tu yate yêêv bop salivangin-ate keen
14Ke, yate yêêv bop salivangin-ate Yesu sen Anutu Noow-ato nando be lakala baandoni lôôt, om yik yiiy oo naanêêl vakasin sen yaawii-having-ato langaah lôôt, de yame gavuuh daka le. 15Yiiy ond yame aalohvu nambe yiiy daanggôôl va nipaya le, de yate yêêv bop salivangin-atêêto ond me-lohvu omaaho ango in nambe me-doosin yalonggpayo nipayaa-jo le, nganjo yoo lak ni lôôt, in palapin pin sen natovu yiiy-ato ond yik palapin-anju pin tovu yi having lung la, lemu yoo lakin yi in va nipaya. 16Om yik yiiy alonggpayo timu be yana ngaaho vu Anutu, de yame aanjêênin e, in yi omaaho samu samu. Ke, yana vu yi, ond le ka pasiv in yiiy-ambe biing samu samu vu yiiy, de dôôvu yiiy in nimeen sen natovu yiiy-ato. - (14) Hiblu 3:1 10:23* - (15) Hiblu 2:17* - (16) Hiblu 10:19*
Copyright information for
MMO