‏ 1 Corinthians 14

Leventamtaba At Loroonan Kaala

1Mina lolos kusu lorooro atnimi na mumu asu loklok at labalamu. La lebelen nimi na ngaongao xusu mina lok kaka leventamtaba at Loroonan Kaala, ketla mo laramtaba ri paase asu levelinga at ne Moroa, mina lolos ti lok ka i. 2Lara do i paase mi levempapaase vetpes, neni xopmen na paase ri limixin, ketla i paase ri ne Moroa, la kopmen tara na xasep nunuan at levempapaase neni i paase min. Neni i ngan ta do i paase mi levelinga lipe boro at loroonan teren la levempapaase ren ixo xasep at levendoxoma at limixin. 3Ketla mo laradi i paase asu levelinga at ne Moroa, ni i paase ri limixin, la kerepmo bok i lok tooro di, la i lox alolos di, la i lox aulis levendoxoma atdi. 4Laradi i paase mi levempapaase vetpes, neni i lok tooro xusuk mene i; ketla lara i paase asu levelinga at ne Moroa, ni i lok tooro limixin axap kusu lunuunu atdi naba lolos. 5I lox avukat do nemi axap mina paase mi levempapaase vetpes, ketla lavanga i silok ti na, a vara i do nemi axap mina lok ka laramtaba ri paase asu levelinga at ne Moroa. Laradi do i paase asu levelinga at ne Moroa, mo levelinga ren i mumuat aleng ti lara i paase mi levempapaase vetpes, la mo levelinga ren i epovo na xasep ti limixin; ketla i lox avukat mene do tara go i nemen la i ruuna bok laramtaba boro at Loroonan Kaala xusu ri soxomus avukat lavasuun ap mo levempapaase vetpes, kusu na lok tooro limixin at lotu.

6Kuren la luvutnetak mi luvurinuk, do nenia ana vot pasa nimi la ana paase rinimi mi levempapaase vetpes, mo lavapaase rak naba lok tooro nimi xereva? Kopmen tinotno. Ketla do ana tong asu levelinga boro at ne Moroa rinimi kopla ana raba nemi mi tavapaase axasep at Lovoang Kaala, kopla ana vavang tinimi mi levempapaase alii, kopla ana anasa nimi, nom i naba lok tooro aleng nimi. 7Lavapaase poovo mumu i na, i lok keretna; mina doxoma mumu be levempanga rengteng i ngan laxaatu dit mas i la loxontaaleng dip sev i. Do laradi xopmen nat mas avukat laxatu, ata ba ronga xibis mo loxompixan kereva? La do lara ip sep loxontaaleng, la kopmen nap sep avukar i, ataba ronga xibis mo loxompixan kereva? 8La mo do laradi it mas luru ri leesep la kopmen na mas aonon avukat lerengteng teren, limixin esep di noxo gagas avukat ti leesep. 9La i lok mun kuren tinimi. Do mina tong asu levelinga at ne Moroa mi levempapaase vetpes, kopmen tara naba xasep nunuan teren. Levelinga atnimi naba ngan lamamas gamasa. 10Buaang laxampapaase axap at na lavatbung menemen, la na levempapaase axap, levempasuun mo ren i nemen. 11Ketla mo do nia xopmen anaklen lavapaase lara i vaase asu i, mo laradi i paase na levelinga, naba lok ngan laradi xadiong tia la nenia bok aba lok ngan laradi xadiong tin. 12La i lok bok kuren tinimi. Nia aklen i do nemi mi vara aleng i xusu mina ruuna ka leventamtaba at Loroonan Kaala; kuren la mina lolos kusu mina lok kaka leventamtaba i epovo xusu ri su auru lotu.

13Ni lavasuun teren la do laradi i paase mi levempapaase vetpes, neni na sing bok ne Moroa ri laramtaba xusu ri soxomus avukat lavasuun ap mo levempapaase vetpes. 14Dola nia ana sing mi levempapaase vetpes, mo levelinga i ravasu at loroonan tarak, ketla mo levelinga xopmen na xasep at lodoxoma rak. 15Kuren la nia aba lok ba lavanga salai? Do nenia a sing saparap ne Moroa, a vara i xusu lisingising tarak na ravasu at loroonan tarak la naba ravasu bok at lodoxoma rak; la a vara box i xusu mo levengkompixan abak pixan i, naba ravasu at loroonan la at lodoxoma bok tarak. 16Do mina emi asu mi ne Moroa mi levempapaase vetpes boro xeneng at loroonan kusuk mun atnimi, la do taradi go xopmen na lotu i nemen eburu minimi ap mo lixitkis buru, la neni ixo xasep at levempanga salai mo mi paase asu i. La ni naba tong i do “I ruturun!” kereva, do mina lox axap lisingising loklox avukat atnimi? 17Keke i do lisingising loklox avukat atnimi ri ne Moroa mo i lox avukat, ketla nom lisingising atnimi xopmen noxo lok tooro mo laradi kopmen na lotu.

18Nenia a tong avukat ti ne Moroa mila a paase aleng mi levempapaase vetpes, la nemi kopmen. 19Ketla to at levempotpot buru at limixin keneng at lotu, i lox avukat do ana tong mene tavalimo tengkolinga i xasep kusu ri lox ase limixin. Ixo lox avukat do ana paase mi taxalinga solo at levempapaase vetpes la kopmen na lok tooro limixin.

20Luvutnetak mi luvurinuk, nemen levendoxoma atnemi na lok ngan loklok at laxamdak lixilik, ketla mina ke xepe laxakapmek kerekngan laxamdak lixilik. La mina doma mumu avukat na leventamtaba ngan limixin mukun. 21Keneng at Lenavolo i lok keretna,

“Moroa ga lok, ‘Nia aba paase ridi na limixin tarak mi levempapaase vetpes at limixin kadiong, la aba paase ridi mi levelinga at limixin kadiong, ketla di noxo ronga res tarak.” ^a

22Kuren la laramtaba ri paase mi levempapaase vetpes ni i lox asuvos ne Moroa ridi limixin kopmen dina nuunu la kopmen tidi limixin di nuunu; la laramtaba ri tong asu levelinga at ne Moroa i nemen ti limixin teren, la kopmen tidi limixin kopmen dina nuunu. 23Mo do limixin lotu axap dina vot buru la nedi axap dina ru ka i do dina paase mi levempapaase vetpes la do teventaba tuvuttadi gamasa go kopla tuvuttadi xopmen dina nuunu, dina vubeles, nedi diba nua i do nemi mo mi baulang. 24Ketla mo do mina paase mi levelinga at ne Moroa la do luvuttadi gamasa xopla tuvuttadi kopmen dina nuunu, dina vubeles ukeneng, nedi dinaba ronga xibis mo levelinga nedi di ronga i. La mo levelinga nedi di ronga i, naba vuk gili lodoxoma atdi; 25la dinaba ven kibis levempanga xakapmek i nemen keneng at lorooro atnedi; at na mun i loklok dinaba xis tiktikbu la dina lok ngangao ri lotu saparap ne Moroa, la dina tong asu i do, “I ruturun tinotno, Moroa i nemen eburu minimi.”

Loklok Ti Mumu Asu I Xeneng At Lotu

26Luvutnetak mi luvurinuk. Ti lox axap na levelinga rak a vara i xusu ana tong axasep nimi keretna. Do minat pot buru ri lotu, lara na ruuna loxompixan; lara ri loklox ase mi levelinga at ne Moroa; la lara mi levelinga loklox axasep boro at ne Moroa, la lara ri levempapaase vetpes, la lara ri soxomus mo levempapaase vetpes. Na levempanga axap mina lox i xusu ri lox alolos limixin at lotu. 27Do teventaba di lok do dina vaase mi levempapaase vetpes, nemen dita epaase at legeso xonaleng, ketla dina epangan asu. I lox avukat do tegepura xopla tavantun mene dina vaase. La tara vetpes bok naba ba gili mo levempapaase vetpes. 28Ketla do xopmen tara go i nemen kusu ri soxomus lavasuun ap mo levelinga, i lox avukat do, mo laradi i paase mi levempapaase vetpes, nat kis atnaasan la ni na emaangun pilo mene mi ne Moroa.

29Legepura xopla lavantun mo dira gagas pam kusu dina vaase asu levelinga at ne Moroa, la leventaba vetpes dinat kis atnaasan la dina ila mumu mo levelinga do ni levelinga ruturun pam at ne Moroa xopla xopmen. 30Ketla do tara go it kis ap mo lixitkis buru i lok ka tevelinga boro at ne Moroa, mo lara i paase, neni na vamngus be. 31Ixo epovo do nemi axap mina vaase asu levelinga at ne Moroa at legeso xonaleng; mina epangan asu xusu nemi axap miba elox ase la mina elok tooro ela. 32La nedi di ruuna laramtaba ri paase asu levelinga at ne Moroa dina lok tatao avukar i. 33la kerepmo lotu atnimi nabak sixit nunuan. Mina lox i xuren mila ne Moroa ga xup kaka dik kopmen do rik lox angtang gamasa, ketla ni ga xup kaka dik kusu lotu atdik nabak sixit nunuan, atla neni ne Moroa at limila.

To at laraugu lotu at limixin at ne Moroa, 34lavakin dinat kis pilo ro xeneng at levempotpot buru at lotu. Kopmen nak mokso ridi do dina paase; la di noxo gomgo, kerekngan Lenavolo at ne Moses i tong i. 35Mo do lavakin di vara i xusu dinaklen ka tavanga, i lox avukat do dina sue be lavatlok atdi min to at laraugu atdi. Lavanga mamangan aleng do latkin na vaase kaxat to xeneng at lovotpot buru at lotu.

36Kereva, levelinga at ne Moroa ga vas kaxat medom atnimi? Kopmen. Kereva, nemi xusuk miga lok kaka levelinga at ne Moroa? Kopmen.

37Mo do tara i doxoma i do neni laradi vavang at ne Moroa xopla i ruuna laramtaba at Loroonan Kaala, neni na ven kisiv i do na levelinga rak nia a malagan i, ni levelinga lolos at Leeme Silok. 38Ketla do xopmen dina ven kisiv i do na levelinga rak boro at ne Moroa, nemen mita ronga res at levelinga ren.

39Kuren la luvutnetak mi luvurinuk, lebelen nimi na ngaongao xusu mina paase asu levelinga at ne Moroa, ketla nemen mita ru pe tara i ruuna laramtaba xusu ri paase mi levempapaase vetpes. 40Ketla levempanga axap minak lox i mi lomokmokso xusu lotu nak sixit nunuan.