Act 11 | MMX | STEP | Luvuttadi vavang la luvuttadi nuunu at lengkot axap Judaia diga ronga i do limixin kopmen di me Judaia bok mo diga siam ka vam levelinga at ne Moroa.

‏ Acts 11

Pita Ga Vaase Asu Lugugu Ren To Jerusalem

1 Luvuttadi vavang la luvuttadi nuunu at lengkot axap Judaia diga ronga i do limixin kopmen di me Judaia bok mo diga siam ka vam levelinga at ne Moroa. 2 La ne Pita gamlong uto Jerusalem. La nedi limixin nuunu diga lok do ik mokso ri rivit kepe lengkontuxu, diga musak aleng ne Pita. 3 Diga lok, “Nenu loose mun keneng at loogu atnedi limixin kopmen di me Judaia, kopmen dina rivit kepe lengkontuxu atnedi; la nenu uga anan eburu minedi.”

4 La ne Pita ga tong axasep nedi mi mo lempanga ga ravasu. 5 Ni ga lok keretna, “Nia aga ngising to Jopa la nia aga ven lisilimet; la aga ven lavanga ga si boro vana la ukopok, ga lok ngan lavattamon silok diga lox asi i boro vana at laxalibet ga ruuna lavanuet mesuluk; la ni ga los kis saparav ia. 6 Nia aga ven avukat keneng teren la nia aga ven lempanga mi lavanuet kangkedek, limixin di lok tatao nedi la lentaba kopmen limixin dina lok tatao nedi, la lempanga axap di vokaxao mi lebelen di la levenasen pixa axap. 7 La nia aga ronga laxaka at ne Moroa ga lok tia xeretna, ‘Pita, una xatu upana, una sep di la una anan i.’

8 Ketla nia aga lok, ‘Kopmen tinotno, Moroa. Nenia a goxovisi an tepempanga i bilinga.’

9 La ne Moroa ga vaase manga ria boro vana at laxalibet keretna, ‘Nemen uta tong tavanga do i bilinga, mila nenia ara lok pam do i lox avukat.’ 10 Na lavanga ga ravasi ga vantun, la melemu nom lempanga axap garamlong bok nga uto vana at laxalibet.

11 Ap mo mene loxonaleng lavantun luvuttadi diga rupot boro Sisaria; nedi diga rupot ap mo loogu nenia aga nemen teren. 12 La Loroonan Kaala ga tong i ria xusu anat pas eburu midi uto Sisaria la nemen nia ta doma solo i. La nedi na lavanna luvuttadi nuunu boro Jopa, nedi diga emu eburu minia uto Sisaria; la nema axap maga beles ukeneng at loogu at ne Konilias. 13 Ni ga tong i rinama do ni ga ven laangelo ga tu ro xeneng at loogu ren la ga lok tin keretna, ‘Una riki tentaba uto Jopa kusu dina lam kaka lara laradi, laasen tinotno ren ne Simon Pita. 14 Ni ba vaase tevelinga ru la nenu minedi axap na di nemen at loogu ram miba roo suu.’

15 La nia aga vaxaru xaka i do ana vaase, la Loroonan Kaala ga vubeles atnedi getgesara kerekngan ap mo laaleng Loroonan Kaala ga beles atdik. 16 La nia aga doxomangke at levelinga at Leeme Silok ga lok keretna, ‘Jon ga sep susu limixin mi ladan mene, ketla nemi miba lok ka lesep susu at Loroonan Kaala.’ 17 I xasep do ne Moroa ga raba limixin kopmen di me Judaia mi Loroonan Kaala, kerekngan ni ga raba nedik min; nedik taga lok ka lorooro maxat at ne Iesu Karisito. Nenia nege la ana lok tong pen i do ana lok pe lugugu at ne Moroa.”

18 Diga ronga i na la lodoxoma atdi ga lok mulus la diga emi asu mi ne Moroa. Diga lok, “Moroa ira suang pam langas ti lorooro xusu limixin kopmen di me Judaia, dina leeng basinge laxakapmek atnedi la dina ruuna ka lorooro maxat.”

Luvuttadi Nuunu At Ne Iesu Diga Rupot To Antiok

19 Buaang nedi luvuttadi nuunu diga epeseves uto at levengkot Judaia la at lengkot petpes bok mumu levesongsongot limixin kakapmek diga ru ka i at loxonaleng diga sev amet ne Stiven. Lentaba atnedi digat pas upaxalom uto Pinisia la Saipras la Antiok, diga tong asu Lagale Lavavang at ne Iesu ti leme Judaia kusuk la kopmen ti levenabung mixin petpes. 20 Ketla lentaba luvuttadi nuunu boro Saipras la Sairini, digat pas uto Antiok la diga vavang go ri limixin kopmen di me Judaia; diga tong asu Lagale Lavavang at Leeme Silok ne Iesu. 21 La Leeme Silok ga lox alolos nedi la buaang nedi limixin diga nuunu la diga leeng basinge laxakapmek atdi la diga raba lorooro atdi ri Leeme Silok.

22 Levelinga mumu i na lavanga ga rupot ti limixin nuunu ro Jerusalem; kuren la diga riki ne Banabas uto Antiok. 23 Ni ga rupot la ni ga ven i do ne Moroa ga lox aumsu mo limixin mi letaba nabalamu ren. Ni ga lok momo la ga vaase lolos tinedi axap kusu dina tu lolos mi lunuunu la luruturun atnedi saparap Leeme Silok mi lodoxoma atdi axap. 24 Banabas ga lok tooro di mila neni lagale laradi ga umsu mi Loroonan Kaala la lunuunu ren ga lolos. La buaang nedi limixin me Antiok diga raba lorooro atnedi ri Leeme Silok.

25 Melemu ne Banabas gat pas uto Tasas kusu na ven ti ne Sol. 26 La ne Banabas ga vosiga i la ni ga lam kaka i uto Antiok. At legesa maares kudun nedu dugat pot eburu minedi buaang limixin ap mo loxot la duga anasa di. Mo go mun Antiok limixin nuunu diga lok ka avot na laasen Kristen.

27 Ap mo levenaleng lentaba lavaeme vapaase alii diga vas kaxat boro Jerusalem la diga rupot to Antiok. 28 Lara atnedi ne Agabas ga xatu upana la at lololos at Loroonan Kaala ga vaase alii do lean kangking naba rupot at lavatbung menemen axap. Ga vot ap mo levenaleng ne Kolodias gam gomgo ri limixin me Rom. 29 Limixin nuunu boro Antiok diga vaase i do dina lok tooro limixin nuunu ro Judaia. Nedi diga ruuna lempilas buaang, diga raba i. 30 Diga lox i xuren la diga lox aonon lempilas at lukngen ne Banabas mi ne Sol, kusu duba raba luvuttadi gomgo at lotu min, go Jerusalem.