Act 14 | MMX | STEP | Pol mi ne Banabas duga lok mun lugugu ro Aikoniam kerekngan diga lox i ro Antiok. Duga beles to at loogu singising at limixin me Judaia la duga vavang avukat tinotno; kuren la buaang nedi limixin me Judaia eburu mi limixin bok kopmen di me Judaia diga nuunu.

‏ Acts 14

Pol Mi Ne Banabas Duga Vavang To Aikoniam

1 Pol mi ne Banabas duga lok mun lugugu ro Aikoniam kerekngan diga lox i ro Antiok. Duga beles to at loogu singising at limixin me Judaia la duga vavang avukat tinotno; kuren la buaang nedi limixin me Judaia eburu mi limixin bok kopmen di me Judaia diga nuunu. 2 Ketla lentaba limixin me Judaia no di goxo nuunu, diga lox axatu lodoxoma at lentaba limixin kopmen di me Judaia la diga vaase pe lusumsuma atnedi basinge luradi nuunu. 3 Pol mi ne Banabas duga nemen go at lentaba leven gaaling. Du goxo marat la duga paase lolos atla Leeme Silok ga lok tooro levelinga atdu mumu letaba nabalamu mila ni ga lok lempanga sangsangu at levengkikngen du. 4 Nedi mo limixin ap mo lemenemen diga epes nedi, lentaba ri leme Judaia la lentaba ri luradi vavang.

5 Melemu mo limixin kopmen di me Judaia la limixin me Judaia eburu mi luvuttadi amgomgo atdi, diga vaxaru kaxat kaka i xusu dina lok kapmek luradi vavang la dina lu amet du mi laxanuat. 6 Ketla luradi vavang duga ronga i na la duga sixiro uto at lenep Likonia. Mo go duga vavang mi Lagale Lavavang to at lumenemen Listra la Debi, la to at lengkot petpes bok ap mo lenep.

Pol Mi Ne Banabas Duga Vavang To Listra La Debi

8 Lara laradi ga nemen to Listra, luxangkedek teren ga molo axap, ni ga molo kaxat at laaleng nenen ga visik asu xa i xuren; la ni goxo epovo do nat pas. 9 Gat kis go la gang tonga levelinga at ne Pol. Pol ga saga xatli ren la ga ven kibis i do mo laradi ga nuunu do ne Moroa ga epovo ri lox aroo i. 10 La ni ga vaase lolos tin keretna, “Katu kaxat upana mi luxangkedek taram.” La soso mun mo laradi ga xatu kaxat upana la gat pas tangtagap.

11 Nedi mo limixin diga ven i, la di ga vaxaru kaka i do dina xup at lavapaase Likonia xeretna, “Na legepu radi du lok ngan ta levenmoroa, duga si ude xopok saparap nedik!” 12 Diga raba ne Banabas mi lara laasen Sius, la ne Pol laasen Eemes, mila neni laradi vapaase. 13 Lamaasa at lomoroa Sius, loogu laplavang teren ga nemen go maxamang ap mo lemenemen, ni ga lok ka leven bulumaxao eburu mi levesisinang uto at lumusaragu ap mo lemenemen. Ni eburu mi nom limixin diga vara i do dinaplavang mi teventamtaba saparap luradi vavang.

14 Ketla Banabas mi ne Pol duga ronga i nom, la duga lolos kusu duna lok pe di. Kuren la duga ba koxorop lempanga singsiga atdu la duga sixit uto xantubu at limixin la duga xup keretna, 15 “Nemi limixin, tila mi lox i na? Nema mun luradi, luradi xerekngan nimi! Nema na ma nemen de xusu mana tong asu Lagale Lavavang la mina ba gili lorooro atnimi basinge lempanga gamasa xerepmo. La mina mumu asu ne Moroa mo i rooro, ga rudum li laxalibet, laxangka, laras la lempanga axap mo di nemen maxeneng atdi. 16 Ganoxa ni ga mulus do limixin axap dina mumu xa lavavara atdi. 17 Ketla neni i lox asuvos amisix i ap mo lempanga ni ga rudum li i; la im taba nimi mi larakabu boro vana at laxalibet, la ga lok katling levenaleng tik lok li bubua leveluxa at levenaleng axa ren. Ni im taba nemi mi leveluxa solo la ik suxa umsu lorooro atnimi mi lomomo.” 18 Limixin diga lok do naplavang saparap du, la ga lolos aleng kusu luradi vavang duna lok pe di mi na levelinga.

19 Lentaba limixin me Judaia diga la boro Antiok at lenep Pisidia la boro bok Aikoniam. La diga lox axatu kaxat lodoxoma at limixin me go Listra la diga lu ne Pol mi laxanuat, la diga sar asu i basinge mo lemenemen; diga nua i do ni mo ga met. 20 Ketla luvuttadi nuunu diga ru kangkan i, la ni ga xatu kaxat, la gamlong bok uto ap mo lemenemen. Ap mo laaleng melemu nedu mi ne Banabas dugat pas uto Debi.

Pol Mi Ne Banabas Dugamlong Uto Antiok

21 Pol mi ne Banabas duga tong asu Lagale Lavavang to Debi, la duga lok ka buaang luvuttadi diga lok ka lunuunu maxat. Dugamlong bok uto Listra, la uto bok Aikoniam, la melemu dugat pas uto Antiok at lenep Pisidia. 22 Duga lox alolos lunuunu at luvuttadi nuunu, la duga vaase alolos di xusu dina tu tuxuruxun at lunuunu atnedi. Duga lok, “Nedik ataba ekip tangarang mi laxanmumuat solo, la kerepmo ataba beles at Linintoo at ne Moroa.” 23 At laraugu lotu getgesara luradi vavang duga sok katling loxongkulao silok ti lok tatao limixin; duga ngising la duga mun anan la duga lok li di maxopok at loklok tatao at Leeme Silok, mo diga nuunu ren. 24 La nedu duga vas kaxat la dugat pas kantubu at lenep silok Pisidia, duga rupot to at lenep silok Pampilia. 25 Duga vavang mi Lagale Lavavang to at lemenemen Pega, la melemu duga vas kaxat uto Atalia.

26 La duga los kas at lavattaaxup go Atalia la duga sen uto Antiok; ap mo lemenemen no limixin nuunu diga raba nedu maxopok at letaba nabalamu at ne Moroa ri lugugu mo duga lox axap pam i. 27 Duga rupot to Antiok la duga ro bubua limixin axap at lotu, la duga tong asu lempanga ne Moroa ga lox i at levengkikngen du; la duga tong i do ne Moroa ga suang langas ti limixin kopmen di me Judaia xusu dina nuunu. 28 La buaang leven gaaling duga nemen go eburu mi limixin nuunu.