‏ Acts 15

Lovotpot Buru To Jerusalem

1Lentaba luvuttadi nuunu diga la boro Judaia uto Antiok la diga lok ti luvuttadi nuunu mego keretna, “Nemi xopmen mi noxo lok ka lorooro do xopmen mi noxo vit kepe lengkontuxu atnimi xerekngan Lenavolo at ne Moses i tong i.” 2Pol mi ne Banabas duga ronga i na la duga vaase mukmusak aleng la duga etep mi levelinga minedi; kuren la limixin nuunu ro Antiok diga lok katling ne Pol mi ne Banabas la lentaba bok kusu dibat pas uto Jerusalem la dina vot pasa luvuttadi vavang la loxongkulao silok la dina paase mumu na lavanga. 3Luvuttadi lotu me go Antiok diga sak tiki nedi uto Jerusalem, la digat pas maxeneng at lengkot Pinisia la Samaria la diga tong asu i ri limixin nuunu go, do limixin kopmen di me Judaia, mo diga leeng la diga nuunu at ne Iesu; lavavang at na ga lox amomo buaang nedi luvuttadi nuunu. 4Se diga rupot to Jerusalem, limixin at lotu me go la luvuttadi vavang la loxongkulao silok diga seega rangarang di, la ne Pol mi ne Banabas duga tong mo lempanga ne Moroa ga lox i xantubu at lugugu at nedu.

5Ketla lentaba luvuttadi nuunu, nedi lubung Parisi diga xatu kaxat la diga vaase lolos keretna, “Nedi mo limixin kopmen di me Judaia dina rivit kepe lengkontuxu atnedi la ata tong box i ridi do dina mumu asu Lenavolo at ne Moses.”

6Luvuttadi vavang eburu mi loxongkulao silok diga vot eburu xusu dina paase mumu loklok ti rivit kepe lengkontuxu. 7Melemu at laxampapaase solo atdi ga xap, Pita ga xatu kaxat upana la ga lok, “Luvutnetak, mikleklen i do gano migomgo Moroa ga soxolik ka ia xantubu atnimi xusu ana tong asu Lagale Lavavang tinedi limixin kopmen di me Judaia kusu dina ronga i la dina nuunu ren. 8La ne Moroa no ikleklen luruptuvuk at limixin, ga lox asuusu i do ni ga siam ka limixin kopmen di me Judaia keretna; ni ga raba di mi Loroonan Kaala xerekngan ni ga raba dik min. 9Moroa ga lok legesa ngas mun ti lorooro rinedik limixin me Judaia la tinedi limixin kopmen di me Judaia; ni ga gos amaxat lebelen di mila diga nuunu ren. 10Kuren la nemen dik ta lok tong pen ne Moroa la nemen dik ta raba limixin nuunu mi na lumumuat ti rivit kepe lengkontuxu kusu dina lox epovo Lenavolo at ne Moses; mila no migo lavalabat atdik la nedik ta goxo epovo ri lox epovo na Lenavolo. 11Nedik taga lok ka lorooro maxat keneng mun at letaba nabalamu at Leeme Silok ne Iesu, kerekngan bok nedi.”

12Nedi axap mo diga xis pilo at loxonaleng ne Banabas mi ne Pol duga tong asu lempanga sangsangu ne Moroa ga lox i at levengkikngen du kantubu atnedi limixin kopmen di me Judaia. 13Melemu at lavapaase atdu, Jems ga lok keretna, “Luvutnetak, mina ronga ia! 14Ana vam ne Simon ira soxomus pam i do ganoxa ne Moroa ga lox asu labalamu ren saparap limixin kopmen di me Judaia la ga lok kaka lentaba atnedi xusu tin. 15Na levelinga rak i sixit epovo mi levelinga at lavaeme vapaase alii, lara atdi ga lok;

16‘Leeme Silok ga lok keretna. Melemu at na, anabamlong; la nia anaba vaxaru amlong bok loogu at ne Devit no ga subu. Anaba lok li amlong lengkot to ap mo loogu ga lok kapmek la ana vaxaru amlong box i. 17Nia anaba lox i na xusu limixin kopmen di me Judaia bok diba puse ria; nedi mo, nia ara ro ka vam di do atarak. 18Nenia, Leeme Silok atnimi, a tong i na la aba lok epovo na levelinga kerekngan aga tong li i gano migomgo.” ^a

19Jems ga lok bok keretna, “At lodoxoma rak do nemen dik ta lox asoogong nedi limixin kopmen me Judaia mo dit pas saparap ne Moroa. 20Ketla ata malagan tevelinga ri vaase axasep nedi do kopmen di noxo anan leveluxa no diaplavang pam min ti laxampoovo moroa; la dina ke loklok kakapmek maxamang at lixitkis epot, la di noxo anan lempanga mi lavanuet kangkedek no diga xur amer i la lada ren goxo sen su ukamang, la lempanga bok mi lada atnedi. 21La kerepmo diba lok ngangao at leme Judaia, no di utus lenavolo at ne Moses to xeneng at laraugu singising at levenaleng kaala ga ru ka i gano migomgo i se lingina; la mo levelinga ren dira vavang pam min at levenmenemen axap.”

Levelinga Ri Limixin Kopmen Di Me Judaia Di Nuunu

22La luvuttadi vavang la loxongkulao silok eburu mi limixin axap at lotu, diga doma i do dina soxolik ka lentaba luvuttadi ap mo libinam tadi la dina sak tiki nedi uto Antiok eburu mi ne Pol la ne Banabas. Diga soxolik ka ne Judas, laasen bok teren ne Basabas, la ne Sailas; nedu luradi silok kantubu at limixin nuunu. 23Diga raba nedu mi mo lovoang ga lok keretna;

“Nema na luvuttadi vavang la loxongkulao silok, luvutneton nimi; ma lox aonon lomomo atnama rinemi limixin kopmen nemi me Judaia mo mi nemen to Antiok, Siria, la Silisia. 24Maga ronga i do lentaba atnama digat pas udo saparap nimi, la diga lox ekarakat nimi la diga lox abulu nimi mumu loklok ti rivit kepe lengkontuxu; di xopmen di goxo lok ka tevelinga atnama xusu ri lox i mo. 25Kuren la nema ma vot eburu la ma siam do mana soxolik ka teventaba tuvuttadi vapaase la mana riki nedi udom tinemi. Dibat pas eburu mi larapen tangas atnama, ne Banabas mi ne Pol, 26no duga raba lorooro atdu ri lugugu at Leeme Silok, ne Iesu Karisito; la kopmen du goxo marat at lanmet. 27Ma riki bok nedu lura rinimi, ne Judas mi ne Sailas kusu duba vaase asu levelinga at lungusno atdu xerekngan nema ma malagan i. 28Loroonan Kaala la nema mara siam pam do ma noxo lok li bok ba teventaangas mavana atnimi, ketla mina ronga res at na levelinga. 29Mi noxo anan teveluxa no diraplavang pam min ti lempatpoovo moroa; mi noxo anan lempanga mi lada atnedi, mi noxo anan tempanga mi lavanuet kangkedek no diga xur amer i la lada ren kopmen goxo sen su, la mina ke loklok kakapmek maxamang at lixitkis epot; naba lox avukat tinotno rinimi do mina ke xepe na lempanga. Atnimi bok be.”
30Limixin lotu diga riki mo luvuttadi vapaase asu levelinga uto Antiok. Diga rupot la diga ro bubua ka mo axap limixin nuunu la diga raba nedi mi levelinga loklox axasep keneng ap mo lovoang. 31Limixin diga utus i mo levelinga, la diga umsu mi lomomo ti mo levelinga loklox alolos. 32Judas la ne Sailas, nedu vam luradi vapaase alii, duga vaase abao aleng eburu mi luvuttadi nuunu, la duga lox alolos nedi. 33Melemu at lentaba levenaleng mo go, diga lox aonon du mi lenmila atnedi mo luvuttadi nuunu; la dugamlong uto saparap nedi mo limixin no diga sak tiki avot be du. 34[Ketla Sailas ga doxoma i do na nemen go.]

35La ne Pol mi ne Banabas duga nemen go Antiok; nedu eburu mi lentaba buaang diga anasa limixin la diga vavang mi levelinga at Leeme Silok.

Pol Mi Ne Banabas Duga Epeseves

36Lentaba levenaleng ga volo la ne Pol ga lok ti ne Banabas, “Atamlong la ata ven luvuttadi nuunu ro at levenmenemen axap no neda taga vavang mi levelinga at Leeme Silok e, la ataba ven i do nedi mo diak lok ta xereva.” 37Banabas ga vara i do na lok ka ne Jon Mak eburu midu. 38Ketla ne Pol ga doma i do goxo lox avukat do neni na emu eburu midu; mila gano ne Jon Mak goxo nemen eburu minedu ap mo lugugu, ketla ni gamlong kot mene atdu ro Pampilia. 39Duga vaase lolos aleng mumu i na xantubu atnedu, la duga epeseves; Banabas ga lam kaka ne Mak la duga mu lavattaaxup uto Saipras. 40Ketla ne Pol ga soxolik ka ne Sailas. La luvuttadi nuunu diga song araba ne Pol mi ne Sailas ti loklok tatao at Leeme Silok la duga vas kaxat. 41Dugat pas maxeneng at lunep silok Siria la Silisia, la duga lox alolos luvuttadi nuunu.