‏ Acts 16

Timoti Ga Emu Eburu Mi Ne Pol La Ne Sailas

1Pol ga vas kaxat basinge mo lunep silok, la gat pas uto Debi la Listra. Lara laradi nuunu laasen teren ne Timoti ga nemen go Listra; nenen bok, ni latkin nuunu at lubungmixin me Judaia, ketla ne temen neni at lubungmixin me Grik. 2Luvuttadi nuunu ro Listra la Aikoniam diga tong i do ne Timoti neni laradi avukat. 3Pol ga vara i do ni na lok ka ne Timoti eburu min, kuren la ni ga vit kepe loxontuxu ren. Ni ga lox i na mila lentaba limixin me Judaia digak lok ap mo lemenemen, digaklen i do ne temen ne Timoti at limixin kopmen di me Judaia. 4Pol, la ne Sailas eburu mi ne Timoti digat pas kantubu ap mo laramenemen la diga tong asu mo leventaangas, luvuttadi vavang la loxongkulao silok diga tong li vam i ro Jerusalem; la ne Pol midi diga tong i ri limixin nuunu do dina mumu asu i. 5Kuren la limixin nuunu ap mo lengkot ga su lolos at lunuunu atdi la leexes atnedi limixin nuunu ga uturut amisik keneng at levenaleng getgesara.

Pol Ga Ven Lisilimet To Troas

6Pol mi larapen tangas teren digat pas epolo maxeneng at lunep silok Pirigia la Galesia, mila Loroonan Kaala goxo siam do dina vaase asu Lagale Lavavang ap mo lenep Asia. 7Diga rupot to at lapdopdo at lenep Misia, la diga lok tong pen i do dina beles at lenep mogo Bitinia, ketla Loroonan at ne Iesu goxo siam do dina beles. 8Kuren la digat pas kantubu at lengkot Misia la diga rupot to Troas. 9Ap mo laxanimin Pol ga ven lisilimet la ni ga ven laradi boro Masadonia ga tu, la ga sing i, “Unat pas ude Masadonia la una lok tooro nama!” 10Melemu at ne Pol ga ven na lisilimet, soso mun nema maga gagas kusu manat pas uto Masadonia, mila magaklen i do Moroa ga ro ka vam nama kusu mana vaase asu Lagale Lavavang ti limixin me go.

Lidia Ga Ven Kibis Leeme Silok To Pilipai

11Maga los kas at lavattaaxup la maga on basinge mo lemenemen Troas, la maga sen akmokso epolo uto Samoteres; la ap mo lara laaleng petpes melemu maga sen uto Neopolis. 12Maga vas kaxat mego uto Pilipai, lemenemen silok avot at lenep silok Masadonia; ni lemenemen buaang limixin boro Rom diga nemen go. Maga nemen ap mo lemenemen silok at lentaba levenaleng.

13At laaleng kaala maga vas kaxat basinge lemenemen silok uto at lisigege at ladan; maga nua i do toxot mo go at limixin me Judaia digat pot buru e la diga ngising. Maga xis kopok la maga paase ri lavakin mo diga rupot eburu go. 14Lara atdi mo digang tonga nama, laasen teren ne Lidia, neni boro Taiataira; neni ga sesep mi lempanga singsiga nunuan. Ni latkin ga lotu saparap ne Moroa; la Leeme Silok ga suang lebelen kusu ni na siam kaka mo lavapaase at ne Pol. 15Neni eburu minedi diga nemen min ap mo loogu ren diga lok ka lesep susu; melemu ni ga xup kaka nama, “Ude nimi la mina nemen to at loogu rak, mo do nemi mi doxoma i do nenia latkin nuunu ruturun at Leeme Silok.” La ni ga vaase lolos tinama la maga beles.

Pol Mi Ne Sailas At Loogu Xokoxo To Pilipai

16At lara laaleng magat pas uto at loxot singising, maga ekip tangarang mi lara loolik, ni lasaxaruki la lagas ga nemen teren la ga lox epovo i do na paase alii umelamgo. La kerepmo ni ga lox asuusu laxampilas solo ri lamgomgo ren; mila ni ga tong levempanga salai naba rupot at levenaleng mo i tu migo ridi.

17Ni ga mumu asu nema mi ne Pol, la gap kup keretna, “Na luvuttadi nedi luvuttadi gugu at ne Moroa i silok aleng! Di tong asu langas at lorooro rinimi!” 18La buaang levenaleng, ni ga lox i na; se ne Pol gara molo nga, la ni ga rem gili la ga lok ti mo lagas, “At laasen at ne Iesu Karisito, a tong i ru do una vas su basinge i!” Ap mo mene loxonaleng lagas ga on basinge i.

19Mo limixin digak lok tatao mo loolik diga ven i do langas atnedi rik lok ka pilas ga xap ta, diga ranga alis ne Pol mi ne Sailas la diga sat kaka du uto at luvuttadi gomgo at loxot tongtonga linga. 20Duga ru ro melamgo at luvuttadi silok boro Rom. La nom limixin digak lok tatao mo loolik diga lok, “Na luradi nedu boro Judaia, la nedu du lok kaxat lekarakat de at lemenemen silok atdik. 21Duk lox ase limixin mi leveloklok no xopmen na epovo at loklok atdik; nedik at lubungmixin me Rom la ixo epovo do tana siam ka i la tana lok tong pen i.” 22Buaang limixin diga beles ap mo leedak silok la diga ru buru mi limixin amgomgo la luvuttadi amgomgo diga lok kepe lempanga singsiga at ne Pol mi ne Sailas, la diga tong i ri limixin esep do dinabak pixis du mi lubuso. 23Digak pixis aleng nedu mi lubuso la diga lok ka du uto at loogu xokoxo, la diga tong i ri mo laradi loklok tatao loogu xokoxo, kusu na lok pe avarang du la kopmen du noxo sixiro. 24Laradi loklok tatao loogu xokoxo ga ronga na levelinga, la ni ga xoxo palaga lengkangkedek atdu kantubu at lempatkonuna mumuat. 25At laxanimin tubu Pol mi ne Sailas duga lok lising la dugak pixan momo saparap ne Moroa, la lentaba luvuttadi bok mo diga xoxo nedi, digang tonga du. 26La soso mun langsangan langne silok ga vot la gak ma mo loogu xokoxo axap. Ap mo mene loxonaleng lumusaragu ga rem suang la lemparoos sen ga remus basinge nedi axap go xeneng at loogu xokoxo. 27Laradi loklok tatao at loogu xokoxo ga rakdu tuang la ni ga ven i do laramusaragu ap mo loogu xokoxo ga rem suang axap pam, la ni ga nua i do limixin kokoxo digara sixiro vam; kuren la ni ga rev asu ka lavarise sepsep teren la ni ga lok do na bo bang amer i min. 28Ketla ne Pol ga xup lolos keretna, “Nemen uta sev u! Nema axap na ma nemen.” 29Laradi loklok tatao loogu xokoxo ga xup do ti tababao, ni ga sixit beles ukeneng, la ni ga xis tiktikbu mi luvatgulom teren la ga dede saparap lengkangkedek at ne Pol mi ne Sailas.

30Ni ga lam asu du ukamang la ga lok, “Luave, ana lok lavanga salai xusu anaba lok ka lorooro maxat?”

31Duga lok, “Una nuunu at Leeme Silok ne Iesu, la nenu ba lok ka lorooro maxat, la nedi axap nom di nemen at loogu ram diba lok ka lorooro maxat.” 32La duga tong Lagale Lavavang at Leeme Silok tin la tinedi bok mo diga nemen ap mo loogu ren. 33Ap mo mene laaleng at laxanimin laradi loklok tatao loogu xokoxo ga sat kaka du la ga gos levenin kooxing atdu; la neni eburu minedi diga nemen at loogu ren diga lok ka lesep susu ap mo mene loxonaleng. 34Ni ga lok ka ne Pol mi ne Sailas uto at loogu ren la ga raba nedu mi leveluxa ri anan. Neni eburu minedi diga nemen at loogu ren diga umsu mi lomomo, mila diga nuunu ba at ne Moroa.

35Ga maxantamak luvuttadi amgomgo diga sak tiki lavasaxaruki mi levelinga xeretna, “Mina soxomus asu du nom luradi uto.” 36Kuren la laradi loklok tatao at loogu xokoxo ga tong i ri ne Pol, “Luvuttadi amgomgo di lox aonon levelinga rinumu mi ne Sailas kusu mana soxomus asu numu. Muna onon ta, la munat pas keneng at lenmila.”

37Ketla Pol ga lok ti mo lavasaxaruki xeretna, “Di goxo vuse ka taxakapmek maxeneng atnama’; diga vixis nema’ at lemeren limixin, la kopmen nak mokso, mila nema’ na lunat boro Rom. Melemu diga lok li nama’ at loogu xokoxo. La at na dia lok do dina lox aonon nemnem nama’. Kopmen tinotno! I epovo do luvuttadi amgomgo axa dibat pas ude la dina soxomus asu nama’.”

38Diga tong i na levelinga ri luvuttadi amgomgo; la diga ronga i do ne Pol mi ne Sailas nedu lunat boro Rom la kopmen luradi gamasa, la diga marat aleng. 39Kuren la digat pas la diga vaase loklok bukbulu ridu; la diga lam asu du basinge loogu xokoxo la diga sing du do duna vas kaxat basinge mo lemenemen. 40Pol mi ne Sailas duga on basinge loogu xokoxo, la dugat pas uto at loogu at ne Lidia. Mogo duga ekip tangarang mi limixin nuunu, la duga lox alolos di mi levelinga la duga onon ta.