‏ Acts 7

Levelinga At Ne Stiven

1La lamaasa gomgo ga sue ne Stiven, “Kereva na levelinga di lox i ru, i ruturun?”

2La ne Stiven ga vorang i ridi xeretna, “Luvutnetak la luvuttamak. Mina ronga be levelinga rak. Moroa at laxasep ga rupot saparap ne Abaram ne temen dik ap mo laaleng neni ga nemen to Mesopotemia, la avot ti laaleng neni gat pas uto Aran; 3la ne Moroa ga lok tin, ‘Una on basinge lemenemen taram eburu mi libibinat taram; la unat pas ti mo lemenemen nia anaba lox ase u min.’

4Kuren la ni ga vas kaxat basinge lenep laasen teren Kaldia la ni gat pas kusu ri nemen to Aran. Melemu at lanmet at ne temen ne Abaram, Moroa ga ro ka i xusu na on basinge mo lemenemen la na vubeles at na lenep, monga nemi mi nemen teren. 5Moroa xopmen goxo raba ne Abaram mi tenep at nai laxangka do tin axa, kopmen tinotno tekot go at na laxangka; ketla ne Moroa ga xaape min tin do ni naba raba i min la ateren axa, la mo livipisik li bok teren melemu. Ap mo laaleng ne Moroa ga lok na laxakaape ri ne Abaram, Abaram goxovisi ruuna taxamdak. 6Ketla ne Moroa ga lok tin, ‘Livipisik li ram diba nemen to at lenep petpes, ap mo lenep diba lok ngan lavasaxaruki la diba xip buaang laxanmumuat at lavanuet sangaun kobot (400) levenmaares. 7Ketla melemu aba song araba langsangan levengkokoxo rinedi limixin do dina lox asongot limixin tarak. Melemu bok diba vas kaxat basinge mo lenep la diba lotu saparav ia at na lenep.’ 8La ne Moroa ga raba ne Abaram mi leretere ri rivit kepe lengkontuxu, i ngan loklok katling ti limixin me Israel. Kuren la ne Abaram ga vit kepe loxontuxu at ne Aisak, melemu at lavanuan aleng latkin at ne Abaram ga visik asu i. Aisak ga vit kepe loxontuxu at ne Jakop, la ne Jakop ga vit kepe loxontuxu at lasangaun legepura nedi lavalabat atdik.

9Nedi na laxamdak at ne Jakop, diga reven peves at neton di, ne Josep; la diga sesep min ngan lasaxaruki uto Isip. Ketla ne Moroa ga nemen eburu min, 10la ni ga lox asepsu i basinge mo laxanmumuat gat pot saparav i. Ap mo loxonaleng ne Josep ga ru ro melamgo at ne Parao, loorong silok me Isip, Moroa ga raba ne Josep mi lodoxoma avukat la loklok nunuan. Parao ga ven kibis i la ga lok li ne Josep kusu neni lamgomgo ap mo lenep silok la keneng bok at loogu at loorong silok teren.

11Ketla loroxo silok ga vot ap mo lunep silok, Isip la Kanan, la ga lox asu buaang laxanmumuat. Goxopmen bok tempanga anan ti lavalabat atdik. 12La ne Jakop ga ronga i do leveluxa mo gak lok to Isip, la ni ga sak tiki mo laxamdak teren uto; ni lavatpas avot atdi ugo. 13At lavatpas sepsev agepura atdi, ne Josep ga tong asu i ri luvutneton dola neni neton di; la ne Parao gaklen ba limixin at ne Josep ap mo laaleng. 14La ne Josep ga lox aonon lavapaase uto ri ne temen, ne Jakop, la ga tong i rin eburu mi libibinat teren kusu dinat pas uto Isip; nedi axap diga epovo at lavanuti sangaun mi lavalimo. 15La ne Jakop ga vas kaxat eburu mi limixin teren uto Isip; ap mo lenep neni eburu mi lavalabat atnedik diga nemen e, se diga met. 16Diga xip kaka amlong labarongan atnedi uto Sekem la digak mit di at loxot ne Abaram ga un kaka i at libibinat at ne Emo mi levempilas.

17Mo laaleng ga sixit auret kusu ne Moroa na lox epovo laxakaape ren ga lox i ri ne Abaram; lexekexes at lubungmixin me Judaia ga uturut aleng upana. 18Melemu lara loorong silok petpes, kopmen goxokleklen ne Josep, neni gam gomgo ri limixin me Isip. 19Ni ga bala vukpuk lavalabat atdik la ni ga musak di, ga lok nedi xusu dina lok pes laxamdak atdi uto kusu mo laxamdak lixilik atdi diba met.

20Ap mo levenaleng lavalabat atdik digap kip levenmumuat, la lara latkin ga visik ne Moses, neni lagale lamdak la ga lox avukat at lemeren ne Moroa. Ni ga nemen maxopok at loklok tatao at ne temen at lavantun gaaling. 21Ketla ne temen mi nenen duga lok li i ro xamang la loolik at ne Parao ga lok ka i xusu ni na lox asilox i ngan lamdak tin. 22Ni ga lox ase ro Isip la ga umsu mi lakleklen at leveloklok atdi, la ni ga silok aleng at levempapaase la at lempanga axap ni gak lox i.

23Moses ga lavanuet sangaun maares teren la ni ga vara i do na ven limixin teren me Israel. 24Ni ga ven lara atnedi, lara me Isip gap sev i; kuren la ni gat pas la ga lok do na lok tooro mo laradi me Israel, la ni ga sev amer i xusu ri sepo i. 25Ni ga nua i do limixin teren mo digaklen pam i do ne Moroa ga soxolik ka i xusu ni naba soxomus asu di at loxokoxo; ketla nedi xopmen di goxo xasep teren. 26Ap mo lara laaleng melemu ni ga ven manga legepu radi me Israel duga esep, la ni ga lok do na lok lumulum kantubu atnedu; ni ga lok, ‘Muna ronga i na. Nemu vam nom leton; tila nemu mu esep?’

27Ketla mo lara ga vaxaru kaxat mo leesep ga so asu ne Moses la ni ga lok, ‘Nege ga lok li u xusu nenu lamgomgo atnama la unang tonga linga atnama? 28U vara manga i do una sev amer ia xerekngan nenu uta sev amet mo laradi me Isip itinongo?’ 29Moses ga ronga i na la ga sixiro boro Isip la ni gara nemen to Midien ngan laradi xadiong. Mo go neni ga ruuna ka legepu madak.

30Ni ga nemen go Midien at lavanuet sangaun maares la melemu at na, laangelo at ne Moroa ga rupot saparav i ro at lamatbin, gak lok at lakaana, laasen teren Sinai. Mo laangelo gak lok to at lara luuna lixilik; laxao gak lok ap mo luuna, ketla kopmen goxo rin kotos levempavaxan una ren. 31Moses ga sangu aleng teren, la ni ga vas saparap mo luuna xusu na ven avukar i. La ni ga ronga laxaka at Leeme Silok ne Moroa; 32‘Nenia ne Moroa at lavalabat atnemi, Moroa at ne Abaram, Aisak la ne Jakop.’ Moses ga dede mi lanmarat la ni goxo lok do na ven bok ba i.

33Moroa ga lok tin, ‘Una lok pes luvanga vatpas taram, mila na loxot nenu u tu ren, ni i xaala aleng. 34Nia ara ven pam levenmumuat limixin tarak di suma i ro Isip. Nia ara ronga vam lerengteng atnedi la nia ara si xusu ana lok tooro di. Ude nga u la nia aba sak tiki u uto Isip.’

35Moses neni laradi limixin me Israel di goxopara rin. Diga sue i, ‘Nege ga lok li u do nenu lamgomgo atnama la laradi rongtonga linga atnama.’ Ketla ni laradi ne Moroa ga sak tiki i ngan lamgomgo la laradi loklox asu, kerekngan laangelo ga tong i ro ap mo luuna, laxao gak lok teren. 36Neni ga lam asu ka limixin basinge lenep Isip, ga lok lempanga sangsangu ro Isip, la to bok at loxontas laasen teren, Laras Memele, la to bok at lamatbin at lavanuet sangaun maares. 37Moses neni laradi ga paase ri limixin me Israel do ‘Moroa naba riki taradi vapaase alii xerekngan neni ga riki ia; la neni at tara xa atnimi.’ 38Neni mo laradi ga nemen eburu mi limixin me Israel to at lamatbin, neni ga nemen eburu mi lavalabat atdik la laangelo bok mo ga paase rin to at lakaana Sinai; neni ga lok ka Lenavolo at ne Moroa xusu na raba i ri nedik limixin me Israel.

39Ketla lavalabat atdik goxopara na ronga res teren, diga sok tixirixes xepe i la diga lok do dinamlong uto Isip. 40Diga tong i ri ne Aron, ‘Una lok tevempoovo moroa rinama xusu namgo rinama at langas. Nema xopmen manaklen i do lavanga salai ga rupot saparap mo laradi, ne Moses mo ga lam asu nama boro Isip.’ 41Ap mo loxonaleng mun diga lok lovoovo bulumaxao mi levengkikngen di la digaplavang saparav i mi leventamtaba la diga lok leluxa silok ti lok katling i. 42La ne Moroa ga lox abulubun kepe nedi, la ga ke xepe nedi xusu dina lotu saparap lempanga i nemen to vana at laxalibet. I lok ngan levelinga i nemen keneng at lubuk at lavaeme vapaase alii i lok keretna,

‘Limixin me Israel! Kopmen mi goxoplavang mi lempanga mi lavanuet kangkedek tia la miga lok letaba min ti lara vetpes ap mo lavanuet sangaun maares to at lamatbin. 43Ketla miga lok tatao loogu at lomoroa ne Molok, la lovoovo at lenti, ne Repan; nedi axap nom laxampoovo vanga nom nemi miga lox i do ri lotu ren. Kuren la aba riki xepe nimi uto melemu at lenep silok Babilon.’ ^a

44Lavalabat atnedik diga lok tatao loogu kadis at ne Moroa ro at lamatbin. Diga gugu i ngan ne Moroa ga lox ase ne Moses min to at lakaana Sinai. 45Melemu lavalabat atnedik no diga lok kaka mo loogu boro at luvuttemen nedi la diga xip kaka i eburu minedi at laaleng diga emu mi ne Josua; la diga lok kaka lara loxongkangka basinge lara libibinat petpes no ne Moroa ga lok kepe di ve, avot ti lovotpot atdi. La mo loogu ga nemen go se at levenaleng at ne Devit. 46Moroa ga vara aleng ne Devit la ne Devit ga sue ne Moroa kusu na siam avolo i ri xip toogu laplavang ti Lomoroa at ne Jakop. 47Ketla ne Solomon axa ga xip mo loogu ri ne Moroa.

48Ketla ne Moroa neni i lolos la i silok, kopmen na nemen at leven gu limixin dip kiv i; i lok ngan leeme vapaase alii ga tong i xeretna,

49‘Moroa ga lok keretna, laxalibet neni loxot kitkis tarak, la laxangka ni loxot burubut at luxangkedek tarak. Toogu xereva nemi miba xiv i ria? Ua ba toxot tia ri lox amas? 50Kereva, nia a goxo rudum li na lempanga axap?” ^b

51La ne Stiven ga lok bok tidi, “Miba baulang alika? Lingisa ba minaba siam ka levelinga at ne Moroa ukeneng at lebelen nimi? La lingisa ba nemi miba ronga res at levelinga at ne Moroa? Nemi mi lok ngan pam lavalabat atnimi; nemi bok na mi xopara ri Loroonan Kaala! 52Lavalabat atnimi diga lox asongot lavaeme vapaase alii axap. Digap sev amet luvuttadi at ne Moroa, no gano migomgo diga paase asu lovotpot at laradi mokmokso la lasaxaruki ren. Ketla nanga nemi miga song araba i ri limixin esep la miga sev amer i. 53Nemi vam na miga lok ka Lenavolo at ne Moroa no lubung angelo diga song araba nemi min. Ketla nemi xopmen mina mumu asu i.”

Diga Lu Uat Ne Stiven

54Mo luvuttadi amgomgo at loogu laplavang diga ronga i nom la diga musak aleng la diga atat etang levesangsa atdi ri ne Stiven mi lumukmusak. 55Ketla ne Stiven ga umsu mi Loroonan Kaala, neni ga milik aurut upana at laxalibet la ni ga ven lisisixam at ne Moroa, la ne Iesu ga tu at lekngen tino. 56Ni ga lok, “Mina ven i! Nia a ven laxalibet i rem suang; la Laradi Mevana i tu ro at lekngen tino at ne Moroa.”

57Digap kup lolos la diga lok pe levenbaalung atnedi mi levengkikngen di. La diga sixit eburu uto saparap ne Stiven, 58diga sar asu i basinge mo lemenemen silok, la diga lu uar i. La mo luvuttadi diga lu uat ne Stiven diga lok li levempanga singsiga atdi ro at lara laradi, laasen teren ne Sol.

59Nedi move diga lulu uat ne Stiven la ni ga sing keretna, “Iesu, Leeme Silok, una lok ka loroonan tarak!” 60Ni ga xis tiktikbu mi luvatgulom teren la ni ga sing silok keretna, “Leeme Silok. Nemen uta doxoma na laxakapmek atnedi di lox i ria.” Ni ga tong i mo la ni ga met ta.