Heb 10 | MMX | STEP | Lenavolo at leme Judaia ni lampoovo mun ti mo leveloklox anarong at ne Moroa mo naba vot. Lenavolo ni xopmen mo leveloklox anarong. Kuren la mo leveloklok tiplavang diga lox amisix i at levenmaares axap, goxo epovo rinotno xusu na lox adadat nedi diga vosiga ne Moroa kusu dina lotu saparav i.

bJer 31:33

cJer 31:34

dLen 32:35

eLen 32:36

fAbk 2:3,4

‏ Hebrews 10

Karisito Ga Raba Lorooro Ren

1 Lenavolo at leme Judaia ni lampoovo mun ti mo leveloklox anarong at ne Moroa mo naba vot. Lenavolo ni xopmen mo leveloklox anarong. Kuren la mo leveloklok tiplavang diga lox amisix i at levenmaares axap, goxo epovo rinotno xusu na lox adadat nedi diga vosiga ne Moroa kusu dina lotu saparav i. 2 Do gita epovo na lox adadat di, na loklok tiplavang to gita xap pam. Mila mo langas i epovo giba lox adadat tinotno limixin, la kerepmo di gitoxo epovo na suma lainmangan bok ba mumu laxakapmek atdi. 3 Ketla mo levelaplavang ga lox adoxoma mun limixin mi laxakapmek atdi la kerepmo digam suma lainmangan, 4 mila ixo epovo do lada at laxanbulumaxao la laxanme na lox adadat limixin basinge leveloklok kakapmek atdi.

5 Kuren la ap mo loxonaleng ne Karisito ga lok do na si ude at lavatbung menemen, neni ga lok ti ne Moroa xeretna,

“Labalam goxo ru levelaplavang la leventamtaba, ketla ugam doma gagas kusu uba riki asi ia la anaba vee radi ngan limixin kusu anaba raba u minia ngan laplavang. 6 U goxo lok momo mi leventamtaba diga xotos i ro at laxao la leventamtaba diga etaba min ti lok kepe laxakapmek at limixin. 7 Kuren la aga lok keretna, ‘Moroa. Nenia na. A vot pam ti mu asu lavavara ram kerekngan mo levelinga keneng at lugun linga ram diga malagan i mumu ia.” ^a

8 Avot be ne Iesu ga lok keretna; “Labalam goxo ru levelaplavang la leventamtaba gamasa eburu bok mi leventamtaba diga xotos i ro at laxao la leventamtaba diga etaba min ti lok kepe laxakapmek atdi. La u goxo lok momo mi na loklok.” Keke i do Lenavolo at ne Moses ga tong i do limixin dina mu asu mo loklok. 9 La neni ga lok bok, “Nenia na; a vot pam ti mu asu lavavara ram.” Kerepmo la ne Moroa ga lok kepe mo leveloklok tiplavang megano la ga lox ekun i mi mo laplavang i sev agepura, ne Karisito xa ga lox i mi lada ren. 10 Ne Karisito ga mu asu lavavara at ne Moroa, la neni ga raba lorooro ren ngan laplavang at legesa xonaleng mun kusu na lox adadat limixin basinge laxakapmek atdi.

11 At levenaleng axap lavamaasa diga tu ro xeneng at loogu kadis la digak lok lugugu at lotu; at levenaleng axap diga etaba mi leges asen panga laplavang mun, mo levempanga goxopmen tinotno na epovo xusu ri lox adadat limixin basinge laxakapmek atdi. 12 Ketla Lamaasa Avolo ga etaba mi legesa laplavang mun ti laxakapmek, u ningina la amisik bok, la melemu neni ga xis to saparap lekngen tino at ne Moroa. 13 Ga ru ka i ap mo laaleng neni ga ngangais ne Moroa na lok li limixin munepen teren ngan loxot burubut ti luxangkedek teren. 14 Karisito ga raba lorooro ren ngan laplavang, kuren la ni ga lok langas kusu limixin dina dadat amisik la na nga ne Moroa ik lok kepe laxakapmek at limixin di nuunu ren.

15 Loroonan Kaala bok i tong asuusu i na; i lok keretna,

16 “Melemu nia anaba lok lekabus maxat mi limixin tarak; anaba buradong levelinga rak keneng at lebelen di la nia anaba lox adoxoma di mi levelinga rak.” ^b

17 La i lok bok,

“Nia a noxo domangke rinotno bok ba at laxakapmek atdi.” ^c

18 La do ne Moroa ira doxoma xepe vam laxakapmek at limixin, kopmen dinak pakes bok ba ri lok laplavang kusu ri lok kepe laxakapmek.

Langas Maxat Tim Taba Lorooro

19 Luvutnetak mi luvurinuk. I epovo do ata vosiga ne Moroa ap mo loxot i xaala aleng, mila ne Iesu gara suang pam mo langas mi lada ren. 20 Mo langas neni langas maxat im taba lorooro, Iesu ga suang pam i ridik ap mo laaleng neni ga raba labantuxu ren kusu na uu at laxaba. Lavattamon silok to xeneng at loogu kadis ga ru katling labantuxu at ne Iesu la mo lavattamon ga rem lais tubu, i ngan ta do ga suang mo langas tidik. 21 La nedik ta ruuna Lamaasa Avolo, neni lamgomgo ri limixin at ne Moroa. 22 Kuren la mina vosiga ne Moroa do lebelen nimi irak mokso vam la lunuunu atnimi irat matkun pam la lebelen nimi xopmen tusumsuma xapmek teren mila ne Moroa ga lox adadat pam nimi kerekngan di gos labantuxu atdik mi ladan i nunuan. 23 Minam tebeng lolos lunuunu atnimi ri mo leveloklox anarong mo naba vot mila ne Moroa naba lox asorun levempapaase alii ren. 24 La mina doxoma ka teventaangas kusu mina lox axatu lebelen nimi ri elok tooro ela la lorooro atnimi na umsu mi labalamu la leveloklok i nunuan. 25 Nemen mita ke xepe mo leveloklok tit pot buru, kerekngan leventaba atnimi dira ke xepe vam i. Ketla nemi xa mina epang aru xusu lunuunu atnimi naba lolos; la mina lox amisix i na, mila laaleng ete i auret na vot.

26 Do tara atnimi ga siam ka vam luruturun at Lagale Lavavang, ketla iramlong ti laxakapmek, i lok ngan ta do i raba arulu ne Moroa la kopmen tavanga laplavang bok ba kusu ba lox arooro i. 27 Ketla neni ba suma mun lanmarat silok at lebelemamao at ne Moroa at laaleng ete mila laxao bokbolot mo naba anan limixin di munepen mi ne Moroa. 28 Do tara ga los polo lenavolo at ne Moses, la do tegepu radi xopla tavantun tuvuttadi diga venemet mo laradi ga lok laxapmek, neni gaba met etaba mun. 29 Kerepmo la do tara na sok kepe lunuunu ren at ne Iesu, i lok ngan ta dola i vas axangka ne Nitna ne Moroa; la neni i lok lada at ne Iesu ngan ta lavanga gamasa, mo lada at lekabus maxat ga sen kusu na lok kepe laxakapmek teren, la ira vaase vupu vam ti Loroonan Kaala, mo i lox asuusu letaba nabalamu at ne Moroa ridik. Do tara na lok na leveloklok kakapmek, neni naba lok ka loklox asongot silok. 30 Ataklen i do ne Moroa xa ga lok keretna,

“Nenia xa anaba sepo laxakapmek at limixin.” ^d

La ga lok bok,

“Moroa naba vaxaru limixin teren at lavapaase, mo do dina soogong basinge levelinga ren.” ^e

31 Naba lok kapmek aleng do tara na ekip tangarang mi lebelemamao at ne Moroa, mo i rooro.

32 Mina doma amlong ti mo levenaleng miga lok ka avot lunuunu. Ap mo levenaleng miga ekip tangarang mi levenmumuat la leveloklox asongot mumu lunuunu atnimi. Ketla miga tu lolos la mi goxo subu. 33 At lentaba levenaleng diga sok taba nimi mi laxalinga xapmek la diga lox asongot nimi ro melamgo at limixin axap. At leventaba levenaleng bok miga ru eburu mi nedi diga xip mo levesongsongot. 34 Miga balamu nedi digak lok at loogu xokoxo la miga lok momo mene nga do limixin diga sak paxat ka levempanga atnimi mila migaklen i do nemi xa miba ruuna lapnovos i lox avukat aleng no vana at laxalibet, mo lapnovos naba nemen amisik.

35 Kuren la nemen mita soxepe lunuunu atnimi; do minam tebeng lolos teren, Moroa naba raba nimi mi leveloklox anarong i nunuan aleng. 36 Do mina suma levenmumuat at lorooro atnimi, mina tu lolos at lunuunu atnimi xusu minaba ruuna ka mo leveloklox anarong ne Moroa ga vaase alii min tidik, mo do mina mu asu lavavara ren. 37 Kopmen noxo lox abao la Lanarong nabamlong kerekngan ne Moroa ga tong i xeretna,

“Mo lara diga tong i do naba vot, neni naba vot tuturun, neni noxok lok sila. 38 Ket do nege laradi do luruptuvuk teren ik mokso, neni naba ruuna ka lorooro avolo, mo do neni nat pas eburu mi lunuunu. La do neni na raba arulu ia, labalak noxo lox avukat tin.” ^f

39 Ketla nedik kopmen na lok ngan nedi di raba arulu ne Moroa la dira seeve, ketla nedik ta lok ngan nedi di nuunu at ne Moroa la dira ruuna ka vam lorooro avolo.