‏ Hebrews 11

Limixin Diga Nuunu At Ne Moroa

1Lunuunu neni loklok tim doma ngangais ti leveloklox anarong ne Moroa naba raba limixin teren min; la lunuunu ik lox aklen dik ti mo levempanga nedik kopmen ta reven tu ren. 2Kerepmo la ne Moroa ga emi asu minedi lavalabat atdik gano, mila diga ruuna lunuunu.

3Nedik ta ruuna lunuunu, kuren la ataklen i do ne Moroa ga rudum li levempanga axap mi levelinga ren, la ataklen i do levempanga nedik di ven i mi levengkatli atdik ga ravasu at levempanga nedik goxo ven i.

4Abel ga ruuna lunuunu, kuren la neni ga raba ne Moroa mi laplavang ga lox avukat ti laramtaba at ne Kaen. Abel ga ruuna lunuunu, kuren la ne Moroa ga emi asu min la ga raba i mi laasen do laradi mokmokso, ap mo laaleng ne Moroa ga siam ka leventamtaba ren. Lunuunu ren move i ngan lampoovo ridik kusu ata mumu asu i, keke i do neni ga met pam.

5Enok ga ruuna lunuunu, kuren la neni goxo met, ketla ne Moroa ga lok ka i uto vana at laxalibet, la limixin diga puse rin la di goxo vuse ka i, mila ne Moroa ga lam ka vam i uto vana. Avot at na, Moroa ga emi asu min, mila loklok teren ga lox amomo i. 6La mo do tara xopmen tunuunu ren, ixo epovo ni na lox amomo ne Moroa, mila do tara i vara na vot pasa ne Moroa, neni na nuunu do ne Moroa mo i rooro la neni i epovo naba lox anarong nedi lebelen di i ngaongao xusu dinaklen ne Moroa.

7Noa ga ruuna lunuunu, kuren la at laaleng ne Moroa ga tong i rin do laran naba vot, ni ga ronga res la ga lok lavattaaxup silok kusu na lox arooro nedi loxoetemen. Neni ga ruuna lunuunu la kerepmo ga lox asuusu i do loklok at limixin ap mo levenaleng ga lok kapmek, la neni ga ravasu ngan laradi mokmokso at lemeren ne Moroa mila neni ga ruuna lunuunu saparap ne Moroa.

8Abaram ga ruuna lunuunu. Kuren la at lara laaleng ne Moroa ga tong i rin do na on basinge lemenemen teren kusu nat pas ti lara lemenemen to vaxalom; Moroa ga vaase alii rin do neni naba raba i min melemu ngan lemenemen tino rin. La ne Abaram ga ronga res teren la ga vas kaxat, neni goxoklen i do mo lemenemen gak lok ua. 9Neni ga ruuna lunuunu la ga lox araut lemenemen tin ap mo loxot ne Moroa ga vaase alii min tin. Ketla ap mo lenep neni ga nemen ngan laradi xadiong, gak lok mun at loogu kadis, la melemu ne Aisak, nitna ne Abaram, la ne Jakop, tubuno ne Abaram dugak lok bok at laraugu kadis. Nedu bok duga ruuna mo lavapaase alii boro at ne Moroa ngan ne Abaram. 10Neni ga ronga res mila neni gam doma ngangais ti mo lemenemen silok, bak lox amisik la ne Moroa ga lox agagas mo lemenemen silok ti limixin teren.

11Abaram ga ruuna lunuunu, keke i do gara sioxo vam, la latkin bok teren ne Sera goxo epovo do na visik, ketla nedu duga visik lara lamdak. Kuren la ne Abaram ga ravasu ngan ne temen mo lamdak, mila ne Abaram ga nuunu do ne Moroa naba lox asorun lavapaase alii ren. 12La ne Abaram, neni lasioxo nga, ketla ga buaang aleng livipisik li ren, ga umsu aleng ngan laxampenti mede vana la laxangkaneng to loxon, nedik taxo epovo ri exes di, na livipisik li ga ravasu at na legesa radi mun.

13Nedi axap luvuttadi diga ruuna lunuunu at lorooro axap atdi se at loxonaleng diga met. Nedi goxo ruuna ka mo levempanga ne Moroa ga vaase alii min tidi, ketla diga ven avaxalom ka mo levempanga la diga momo ka i, keke i do di goxovisi ruuna ka i. La diga siam ka mun lorooro alua at na lavatbung menemen. 14Limixin di paase xerepmo, i lox asuusu i do temenemen aulis gove di puse rin. 15Do nedi gove gitam doma amlong ti mo lemenemen no nedi diga on basinge i, nedi ro gitamlong pam ti mo lemenemen atdi. 16Ketla lodoxoma atdi move ga vara ri temenemen avukat tinotno, mo lemenemen ik lok to vana at laxalibet. Kuren la ne Moroa i lok momo xusu dina soxor i do ne Moroa atdi mila neni ga lox agagas lemenemen tidi.

17Abaram ga ruuna lunuunu, kuren la ap mo laaleng ne Moroa ga lok tong pen i, neni ga ronga res la ga raba ne Aisak ngan laplavang. Abaram neni mo laradi ne Moroa ga vaase alii rin do livipisik li ren naba umsu aleng. Ketla melemu manga ni ga gagas kusu naplavang mi mo legesa nitna. 18Ne Moroa gara tong pam i rin do, “Aisak neni laradi ba lox asilok livisik li ram.” 19Abaram gaklen i do ne Moroa i epovo na lox arooro luvuttadi met; ketla ne Moroa ga sep pepe i la ni goxo sev amet ne Aisak. I lok ngan ta do ne Moroa ga lox arooro ne Aisak basinge lanmet.

20Aisak ga ruuna lunuunu, kuren la neni ga lox anarong ne Jakop mi ne Esao mi levelinga mumuat mumu mo levempanga naba ravasu at lorooro atdu la at livipisik li bok atdu melemu at levenaleng at lanmet teren.

21Jakop ga ruuna lunuunu, kuren la neni ga lox anarong lumdak at ne Josep la ga lotu saparap ne Moroa, ap mo loxonaleng neni ga sox auru i mi lakdak teren, mila neni gara sioxo vam la ga auret levenaleng kusu neni na met.

22Josep ga ruuna lunuunu, kuren la ga auret ti lanmet teren, neni ga vaase alii do at tara taaleng limixin me Israel diba vas kaxat basinge lemenemen Isip la neni ga vaase alii bok at limixin teren kusu dinaba xip ka levesi ren do dina vas kaxat uto Kanan.

23Temen ne Moses mi nenen duga ruuna lunuunu, kuren la duga lipe ne Moses at lavantun gaaling melemu at livipisik teren, mila duga ven i do mo lamdak goxopmen lamdak gamasa, ketla lamdak ga lok petpes tino, la du goxo marat at lavapaase lolos at loorong silok, ga tong i do dina sev amet axap levengkadede remes at limixin me Israel do dina visik asu di.

24Moses ga ruuna lunuunu, kuren la neni ga silok, la ni ga xopara i xusu limixin dina soxor i do lamdak at loolik at ne Parao. 25Ketla neni ga vara i xusu na xip laxasongsongot eburu mi limixin at ne Moroa la neni ga xopara i xusu na lox amomo lorooro ren mi laxakapmek, mo naba xap asonao mun. 26Moses ga doma i do ik mokso do neni na lok ka lainmangan eburu mi limixin teren at lugugu at Lanarong. Mo lainmangan ga lox avukat aleng ti lapnovos boro Isip, mila neni ga reven ti mo luunun move ne Moroa ba raba i min. 27Neni ga ruuna lunuunu, kuren la neni ga vas kaxat basinge lemenemen Isip la goxo marat at lumukmusak at loorong silok me go, ketla neni ga tu lolos at lunuunu ren, mila neni ga ven kibis ne Moroa, mo limixin di goxo epovo na ven i. 28Moses ga ruuna lunuunu, kuren la neni ga tong i ri limixin me Israel kusu dina sep ka tevempatnat sipsip la dina saba li lada ap mo laxasipsip to at laramusaragu at laraugu atdi, na loklok ga lok kaxat mo leluxa diga soxor i do Lovovolo Pe. Diga lox i na xusu mo laangelo sepsep noxo sev amet lavaanat meren at limixin me Israel. Ketla Moroa ga riki i do na sev amet lavaanat meren at limixin me Isip.

29Limixin me Israel diga ruuna lunuunu, kuren la diga vas korop Laras Memele, digat pas mun at laxangka mesemes. Ketla at loxonaleng limixin esep boro Isip diga lok tong pen i xusu dina vas polo, laras gak mit di la diga xong axap.

30Limixin me Israel diga ruuna lunuunu, kuren la lara langas uat lolos mo ga tu xangkan lemenemen silok Jeriko ga rebubuxup si ukopok. Mo lavanga ga vot melemu at lavanuti aleng limixin me Israel digat pas kangkan mo lemenemen.

31Raap, latkin ngarangat ga ruuna lunuunu, kuren la neni goxo uu eburu minedi limixin boro Jeriko diga ronga viribang, mila neni ga lok tooro luradi esep at leme Israel mo dugakling lemenemen at laaleng ne Josua ga riki du xusu dunakling mo lemenemen Jeriko.

32Aba tong ka bok ba lavanga salai? Nia xopmen ana epovo xusu ana vaase bok ba mila loxonaleng kopmen na epovo kusu aba tong asu axap lorooro atnedi loxongkulao nuunu kerekngan ne Gidion, Barak, Samison, Jepita, Devit, Samuel, la leventaba vetpes bok eburu mi lavaeme vapaase alii; 33diga ruuna lunuunu, kuren la leventaba atdi diga sep kepe levenabung mixin, leventaba atdi diga lok tatao limixin atdi mi loklok mokmokso, la kerepmo ne Moroa ga lok tooro di xerekngan neni ga vaase alii min tidi; la leventaba atdi, lavamolon diga lu arup midi uto at laramet laion la lubung laion di goxo epovo na anan di, mila ne Moroa ga vamngus lubung laion. 34Leventaba atdi lavamolon diga lu arup midi uto xeneng at laxao ketla laxao goxo epovo na rin di; leventaba atdi diga ves avolo levemparise sepsep at limixin esep; la leventaba atdi levengkot atdi ga molo xetla ne Moroa ga lox alolos di; la leventaba diga ravasu ngan luvuttadi lolos tino, kuren la diga xala xepe limixin esep boro at levengkot petpes. 35Leventaba lavakin diga ruuna lunuunu kuren la leventaba atnedi digara met pam, ketla ne Moroa ga lox aroo amlong bok di.

Leventaba atnedi luvuttadi nuunu, diga lok ka losongsongot kapmek tinotno, lavamolon diga lok mo leveloklok ti lok kepe lunuunu atdi, ketla diga tu lolos la diga siam ka mo laxanmumuat, mila diga nuunu do melemu diba lok ka lorooro avolo. 36Lavamolon diga lok kalise xapmek leventaba atdi la digak pixis kapmek tino di, la diga koxo alis leventaba bok la diga lox abeles di at laraugu xokoxo. 37Diga lu amet leventaba atdi mi laxanuat, la diga soo xorop avu leventaba atdi mi lempasoo, la diga sev amet leventaba atdi mi lemparise.

Leventaba atdi luvuttadi nuunu diga siga mun levenbantuxu sipsip la levenbantuxu me, mila kopmen tevempanga singsiga avukat atdi la di goxo ruuna tevempanga at lorooro atdi, diga xip laxasongsongot la lavamolon diga lok kapmek tinotno di. 38Lavamolon diga doma i do mo limixin nuunu diga lok kapmek aleng, ketla at lemeren ne Moroa nedi limixin mokmokso, la ixo epovo do dina nemen at na lavatbung menemen. Digat pas tangtagap to at lamatbin la to at levempatkaana la diga nemen to xeneng at laxantabuang la at laramamara ro xeneng at laxangka, mila goxopmen taramenemen atdi.

39Diga ruuna lunuunu, kuren la ne Moroa ga emi asu midi, ketla tara atdi goxo lok ka mo leveloklox anarong at lekabus maxat ap mo levenaleng diga rooro ren. Mo leveloklox anarong ne Moroa ga vaase alii min ti limixin teren. 40Moroa ga lox agagas lekabus maxat kusu neni na lox adadat dik. La kerepmo bok neni ga lox adadat nedik eburu minedi na limixin digap kip laxasongsongot.