Heb 6 | MMX | STEP | Kuren la nemen mitam tebeng mun mo levenanasa miga lok ka avor i, i lox avukat kusu mina lolos ti lok kaka levenanasa at ne Karisito kusu miba ravasu ngan limixin mukun. Mina ke be mo levenanasa avot, i lok keretna, laanasa mumu loklok ti leeng basinge laxakapmek kusu mo laxakapmek noxo lox asuusu lanmet; laanasa mumu lunuunu ri ne Moroa;

‏ Hebrews 6

1 Kuren la nemen mitam tebeng mun mo levenanasa miga lok ka avor i, i lox avukat kusu mina lolos ti lok kaka levenanasa at ne Karisito kusu miba ravasu ngan limixin mukun. Mina ke be mo levenanasa avot, i lok keretna, laanasa mumu loklok ti leeng basinge laxakapmek kusu mo laxakapmek noxo lox asuusu lanmet; laanasa mumu lunuunu ri ne Moroa; 2 laanasa ri lesep susu; laanasa ri loklok ti sa li levengkikngen mavana at teventaba rik lox anarong di; laanasa ri laxakatu kaxat basinge lanmet; la laanasa ri lugugu at ne Moroa ngan laradi rongtonga linga at laaleng ete. 3 Do ne Moroa na mulus, mina ke be na levenanasa la mina lok kaka be mo levenanasa mumu.

4 Nedi limixin diga ronga Lagale Lavavang la diga nuunu ren la digara suma vam lomomo at lorooro avolo la digara lok ka vam Loroonan Kaala, la digaraklen pam lorooro nunuan ne Moroa ga vaase alii min ti limixin, la digara ven pam ne Moroa ga lok levempanga sangsangu; do mo limixin dina raba arulu ne Moroa, ixo epovo xusu dina leeng basinge mo laxakapmek mila ap mo mun loklok i lok ngan ta do nedi xa dira vaxarem amu manga ne Nitna ne Moroa ro at laxaba, la kerepmo dira lok li manga i at lainmangan to at lemeren limixin.

7 Lavapaase poovo mumu i na loklok i lok keretna. Laxantaamang do larakabu it pot amisik teren la i lox asuusu levempipisik nunuan naba lok tooro nedi di gugu i, la mo laxantaamang naba ruuna ka loklox anarong at ne Moroa. 8 Ketla do livin gagas mi laxampivilis kapmek kusuk mun na su ap mo laxantaamang, mo laxantaamang i lok kapmek axap, la i nemen maxopok at lebelemamao at ne Moroa, la kopmen bok ba tara noxotlo tevempanga go.

9 Larapen tangas tarak. Ma paase lolos tinimi xetla nemen mita doma solo i nom, mila ma nuunu ruturun do leveloklok i nunuan naba ravasu atnimi, mo levempanga naba lox asuusu i do mira lok ka vam loklox arooro. 10 Moroa neni laradi mokmokso la neni noxo domampe leveloklok nunuan nemi miga lox i, la mo labalamu nemi miga lox asuusu i at laasen teren ap mo levenaleng miga lok tooro limixin teren la move mik lok tooro di. 11 Nema ma vara i do nemi getgesara mina lox asuusu leveloklok kerepmo se at laxavaxap at lorooro atnimi, la kerepmo miba ruuna ka ruturun mo leveloklox anarong mim doma ngangais tin. 12 Ma xopara i do mina molo at lunuunu atnimi xetla mina mu asu loklok atnedi lavalabat atnimi diga tu lolos amisik at lunuunu atdi la digat kis tangais mo leveloklox anarong ne Moroa ga paase alii min tidi.

Lavapaase Alii At Ne Moroa Naba Sorun

13 Ap mo laaleng ne Moroa ga lok lavapaase alii ren ti ne Abaram, neni ga vara i do na lox amumuat levelinga ren, ketla goxopmen tara ga silok tin kusu neni naba vangpe min; kuren la neni ga vangpe xa mi laasen teren. 14 Mo lavapaase alii ren ga lok keretna, “At laasen tarak nia anaba lox anarong u, la livipisik li ram dinaba umsu aleng.” 15 La ne Abaram gat kis atnaasan mun la ga ngangais ne Moroa, se ni ga lox asorun mo lavapaase alii rin.

16 Do tara i vara na vangpe, neni na vangpe mi laasen at laradi i silok tin; la mo lavangpangpe naba lox amuat levelinga ren. Lavangpangpe i epovo ri lox axap leven ekarakat. 17 La ne Moroa ga vara i do limixin teren dibaklen tuturun i do neni naba lox epovo levelinga ren tinedi la diba ruuna ka leveloklox anarong neni ga vaase alii min tidi; kuren la neni ga lox amuar i mi lavangpangpe. 18 Legepu vanga mo ik lok kusu na lox amuat levelinga ren, i lok keretna; lavapaase alii ren la lavangpangpe ren, la ixo epovo do ne Moroa na xarang limixin. Kuren la ne Moroa ga lox i na xusu na lox alolos lunuunu atnedi diga on basinge laxakapmek kusu dina rebeng kaka mo levempanga nunuan ne Moroa ga vaase alii min. 19 Nedik takleklen i do ne Moroa naba lox asorun levempapaase alii ren, kuren la lebelen dik it kis aulis ngan lesepang it kis aulis do di sepkaa alis i ro xopok at lavaruat. La kerepmo bok i epovo do nedik tana xis esogo mi ne Moroa no vana at laxalibet; i lok ngan gano lamaasa ga vubeles at loxot i xaala aleng, mo loxot gak lok to melemu at lavatbantamon silok to xeneng at loogu laplavang. 20 La kerepmo bok ne Iesu gamgo ridik uto vana xusu na lok lugugu ngan Lamaasa Avolo kerekngan ne Melkisedek, la lugugu at Lamaasa Avolo noxo xap.