‏ John 11

Lanmet At Ne Lasaro

1Lara laradi laasen teren ne Lasaro, ga nemen to Beteni, ga meres. Beteni ni lemenemen ua ne Maria mi ne Mata nedu lueton duga nemen go. 2La ne Maria neni lara no ga sobili laxadan mavak to at luxangkedek at Leeme Silok la ga ves amesemes i mi lavatkabinim at lavatlak teren. Ne Lasaro neni neinen du, mo gak meres. 3La na lueton duga lox aonon levelinga ri ne Iesu keretna, “Leeme Silok. Lentangas orong taram i meres.”

4Se ne Iesu ga ronga i na, neni ga lok, “Lanmet kopmen neni laxavaxap at nai ri ne Lasaro; na lavanga i vot kusu ri emi asu mi ne Moroa, la kusu Nitna ne Moroa naba ruuna ka leemi asu.” 5Iesu ga balamu aleng ne Mata du lueton, la ne Lasaro. 6Se ne Iesu ga lok ka levelinga do Lasaro ga meres, neni ga nemen avolo bok go ap mo lenep, neni gak lox e at legepu aleng bok.

7Melemu neni ga lok ti luvuttadi loklok ka anasa ren, “Atamlong uto Judaia.”

8Ketla diga lok tin, “Rabai. Ga merena luvuttadi amgomgo diga lok do dina lu var u, tila u lok do unamlong?”

9Iesu ga vorang i ridi, “Laaleng kangking i ruuna lasangaun mi legepu xon atat aleng. Kuren la, mo do taradi nat pas at laxangking tubu, neni xopmen nak sak kikixin, mila neni i ven laxasep at na lavatbung menemen. 10Ket do taradi nat pas at laxanimin, neni nak sak kikixin, mila kopmen taxasep na nemen keneng teren.”

11Iesu ga tong i na, la melemu ni ga lok bok, “Lentangas atdik ne Lasaro mo i unga, ketla abat pas la ana lox aus i.”

12La luvuttadi loklok ka anasa ren diga lok tin keretna, “Leeme Silok. Mo do neni go i unga, neni naba lox avukat.” 13Ketla lavasuun at levelinga at ne Iesu do Lasaro ga met; la luvuttadi loklok ka anasa diga nua i do Lasaro ga unga mene.

14Kuren la ne Iesu ga tong axasev i ridi do, “Lasaro mo ira met pam. 15Ketla a momo do nia goxok lox eburu min. La mumu mun i na, miba nuunu ba rak. Atat pas uto xusu tana vosiga i.”

16Tomas lara laasen bok teren ne Didimas ga lok ti mo luvuttadi loklok ka anasa xeretna, “Ata emu eburu min, kusu ataba met eburu min.”

Iesu Neni Laxakatu Kaxat Amlong La Lorooro

17Iesu ga vot, la neni ga long lenget ka i do limixin diga li vam ne Lasaro ro at lamaaut la lavanuet aleng gara volo vam i. 18Beteni goxo vaxalom boro Jerusalem, 19la buaang luvuttadi amgomgo at limixin me Judaia diga vot kusu dina ven ti ne Mata mi ne Maria xusu ri vaase amenemen du mumu lanmet at neinen du. 20Se ne Mata ga ronga i do ne Iesu mo ga vot, neni ga vas su xusu ri ekip tangarang min; ketla ne Maria ga men alu go xolonu.

21Mata ga lok ti ne Iesu, “Leeme Silok. Mo do nu gitak lok de, neinuk gi toxo met. 22Ketla akleklen i do monga ne Moroa naba raba u mi lavanga salai do una sing i min.”

23Iesu ga lok tin, “Neinum naba rooro xat amlong.”

24La ne Mata ga lok, “Aklen i do neni naba rooro xat amlong at laaleng kavaxap.”

25Iesu ga lok tin, “Nenia laxakatu kaxat amlong mi lorooro. Do tara i nuunu rak, neni naba rooro amlong do neni na met. 26La do tara i rooro la i nuunu rak, neni noxo met. Kereva, u nuunu at na levelinga?”

27La ne Mata ga lok, “I ruturun, Leeme Silok. A nuunu do nenu Lanarong, Nitna ne Moroa, la ne Moroa ga lok do nenu unaba si ude xopok at lavatbung menemen.”

Iesu Gang Teng

28Melemu at na levelinga at ne Mata, neni gamlong la ga vaase nemnem ti ne Maria, la ni ga lok, “Leeme loklox ase nga mo i auret la i susue ru do una vot pasa i.” 29Se ne Maria ga ronga i na, neni ga xatu kaxat la ga vas soso mun kusu ri vas tangarang ka i. 30Iesu goxovisi vot to xolonu, ketla neni move ga nemen ap mo lenep ne Mata ga xip tangarang ka i ve. 31Luvuttadi amgomgo mo digak lok go at loogu eburu mi ne Maria diga paase amenemen i. Se diga ven i ga xatu kaxat la ga vas su soso ukamang, diga mumu asu i. Diga nua i do neni mo gat pas uto at lamaaut, kusu nang teng go.

32Se ne Maria ga vot to at lenep ne Iesu ga nemen e la ga ven i, neni ga xis tiktikbu mi luvatgulom teren la ga lok, “Leeme Silok, mo do nu gitak lok nade, neinuk gi toxo met.”

33Iesu ga ven i gang teng, la luvuttadi amgomgo bok mo diga emu min digang teng, la lebelen ga lok tuntun aleng. 34La ni ga sue di xeretna, “Miga li i ua?”

La diga lok, “Atat pas la una ven i.”

35La ne Iesu gang teng.

36La luvuttadi amgomgo diga lok, “Mi ven ba i, neni i balamu aleng ne Lasaro.”

37Ketla leventaba atdi diga lok, “Neni ga lox arepalas luxatli at laradi luxatli ren ga main. La kereva, ni goxo epovo do na lox aroo ne Lasaro xusu ni noxo met?”

Iesu Ga Lox Axatu Amlong Ne Lasaro Basinge Lanmet

38Lebelen ne Iesu ga lok tuntun amu bok, la neni gat pas uto at lamaaut; mo lamaaut gak lok to at lubuang la lavaruat gak lok pe lungusungus ap mo lubuang. 39La ne Iesu ga lok tinedi xeretna, “Mina lok pes lavaruat basinge lubuang.”

La ne Mata, neinen ne Lasaro ga lok, “Leeme Silok, lorongan naba somao mila at lavanuet aleng ta, neni gak midi ro xeneng at lamaaut.”

40Iesu ga lok tin, “Kereva, nenia agoxo tong box i ru do uba ven lololos at ne Moroa mo do una nuunu?”

41Diga lok pes lavaruat, la ne Iesu ga milik urut upana la ga lok, “A tong aorong tu Tamak, do u ronga ia. 42Aklen i do amisik ung tonga ia, ketla a tong i na xusu na limixin diba nuunu do uga riki ia.”

43Melemu at na levelinga ren, neni ga xup lolos keretna, “Lasaro. Pas su.” 44La ne Lasaro ga vas su nga, la lukngen mi luxangkedek teren diga is i mi lentamon itis tongan; la labantamon bok diga is pe lavatlak teren min.

La ne Iesu ga lok, “Mina soxomus asu i, la mina soxepe i uto na onon.”

Luvuttadi Amgomgo Diga Lok Langas Linga Ri Sep Ne Iesu

(Mt 26:1-5; Mk 14:1-2; Lu 22:1-2)

45Buaang atnedi luvuttadi amgomgo mo diga vot kusu ri ven ne Maria, kuren la diga ven na lavanga ne Iesu ga lox i la diga nuunu ren. 46Ketla leventaba atdi digamlong uto at lubung Parisi la diga tong i ridi mumu mo lavanga sangsangu ne Iesu ga lox i. 47Kuren la lubung Parisi la lavamaasa silok diga vot buru la diga lok, “Ataba lok lavanga salai? Mina doma mumu levempanga sangsangu na laradi ik lox i. 48Mo do ata ke xepe i nak lok na levempanga, limixin axap diba nuunu ren, la limixin boro Rom diba musak dik la dina lok kapmek loogu laplavang la limixin atdik.”

49Lara atdi laasen teren ne Kaiapas, neni lamaasa gomgo ap mo lamaares ga lok, “Mixoklen tevempanga. 50Mina xasep do i lox avukat ti tegesa radi na met nop limixin la kusu limixin boro Rom noxo sev amet axap limixin atdik.”

51Ni goxo tong i na mi lodoxoma axa ren, ketla neni ga lamaasa gomgo ap mo lamaares, la neni ga paase alii do Iesu mo naba met nop limixin me Judaia, 52la kopmen tinedi xusuk, ketla tinedi bok limixin kopmen di me Judaia no diga epeseves la neni naba lox asi buru du ngan legesa bungmixin.

53Ga ru ka i ap mo laaleng luvuttadi amgomgo me Judaia diga puse ngas do ri sev amet ne Iesu.

54Kuren la ne Iesu goxot pas saxaven go Judaia. Ketla neni ga on basinge mo lenep la gat pas uto at loxot gak lok saparap lamatbin, uto at lemenemen laasen teren Epraem la gak lox eburu mi luvuttadi loklok ka anasa ren go. 55Leluxa at leme Judaia laasen teren Lovovolo Pe mo ga auret ta, la buaang limixin at lengkot axap at levennep Judaia digat pas uto Jerusalem, kusu ri lox adadat nedi at lemeren ne Moroa ri mo leluxa. 56Diga reven ti ne Iesu, la se diga vot go at loogu laplavang diga esue xa minedi getgesara, “Kereva, mi doxoma i do neni naba vot bok ti na leluxa?” 57Lubung Parisi mi lavamaasa silok diga raba linga vam di. Do tara na ven lenget ne Iesu go at toxot, neni naba tong i ridi xusu diba ranga alis i.