Joh 15 | MMX | STEP | Iesu ga lok bok ti luvuttadi loklok ka anasa ren, “Nenia luuna vaen tuturun, la ne Tamak neni laradi loklok tatao at laraamang.

‏ John 15

Iesu Neni Luuna Vaen Tuturun

1 Iesu ga lok bok ti luvuttadi loklok ka anasa ren, “Nenia luuna vaen tuturun, la ne Tamak neni laradi loklok tatao at laraamang. 2 Neni i tara xepe mo lengkakan una rak, do kopmen dina pisik. La ip sep susudun mo lengkakan una do di pisik avukat, kusu dinaba pisik aleng. 3 Mo levelinga aga vaase i rinimi gara lox adadat pam nimi. 4 Mina nemen tarak, la nia anaba nemen atnimi. Laxakan una xopmen na epovo na visik do ni xopmen na nemen sogo at luuna. Nemi xopmen mina epovo ri visik lempeven una se do nemi mina nemen tarak.

5 Nenia luuna vaen, la nemi mi ngan lengkakan una. Do nege i nemen tarak, la nenia a nemen teren, neni naba visik buaang tempeven una; kopmen mina epovo do mina visik tempeven una do nemi mixo nemen tarak. 6 Do nege xopmen na nemen tarak, neni i lok ngan laxakan una dinaba ra korop pes i la dina lu asu min kusu na mang, la dina sigi bubua li i la dina xotos kepe i at laxao. 7 Do mina nemen tarak, la do minam tebeng lolos levelinga rak, mina sing ti levempanga salai mi vara rin, la miba ruuna ka i. 8 Do mina visik aleng, miba lox asuusu ba i do nemi luvuttadi loklok ka anasa rak, la miba lox asilok laasen at ne Tamak.

9 A balamu nimi xerekngan mun ne Tamak i balamu ia; mina nemen keneng at labalamu rak. 10 Do mina ronga res at levelinga rak, miba nemen keneng at labalamu rak, kerekngan mun nia agang tonga res at levelinga at ne Tamak la aga nemen keneng at labalamu ren. 11 A tong na levempanga rinimi xusu lomomo rak naba nemen keneng at lorooro atnimi, la nom lomomo atnimi naba silok. 12 Lavapaase rak keretna, mina ebalamu ela minimi xerekngan nia a balamu nimi. 13 Do tara na soxepe lorooro ren ti lok tooro larapen tangas teren, nom i lox asuusu i do labalamu ren i silok aleng. 14 Do mina lok levempanga nia aga tong i rinimi, nemi larapen tangas tarak. 15 Axo tong bok ba nimi do lavasaxaruki, mila lasaxaruki xopmen naklen levempanga, lamgomgo ren ik lox i. Ketla, a tong nimi do larapen tangas tarak, mila agara vaase vam nimi mi levempanga axap ne Tamak ga tong i ria. 16 Nemi xopmen mi goxo soxolik ka ia; nenia xa aga soxolik ka nimi xusu mina lok lugugu rak la mina visik asu tevempeven una nunuan, nom lempeven una nunuan kopmen noxop sopso, ketla naba nemen amisik. Kuren la ne Tamak naba raba nimi mi tevempanga salai mina sing tin keneng at laasen tarak. 17 Lavapaase rak tinimi xeretna; mina ebalamu ela minimi xa.

Lebelemamao At Limixin At Na Lavatbung Menemen

18 Do limixin at na lavatbung menemen dina belemamao nimi, minaklen i do nedi ga belemamao avor ia. 19 Ketla nia aga soxolik ka nimi basinge na lavatbung menemen. Do nemi mede at na lavatbung menemen, limixin diba vara aleng nimi. Ketla kopmen nemi mede; kuren la limixin at na lavatbung menemen diba belemamao nimi. 20 Mina doxoma levelinga nia aga tong i rinimi i lok keretna, kopmen tasaxaruki na silok ti laradi gomgo ren. Do dina lox asongor ia, diba lox asongot bok nimi; do dina ronga res at levelinga rak, diba ronga res bok at levelinga atnimi. 21 Diba lok na levempanga rinimi mila mi nuunu rak la dixoklen mo lara ga riki ia. 22 Do nia gita vot la gita vaase ridi, nedi xa gitoxo bixurun mu laxakapmek atdi. Ketla monga, dixo epovo na tong i do xopmen dina ven kibis laxakapmek. 23 Do nege taradi i xopara ia, neni i xopara bok ne Tamak. 24 Do nia gi toxo lok teven gugu silok kantubu atdi, ua kopmen tara ga lok teven gugu xuren, ixo epovo xusu nedi gita bixurun mi laxapmek, ketla monga digara ven pam levempanga sangsangu nia aga lox i, la nedi move di xopara ia la ne Tamak. 25 Ketla anai i lox asorun levelinga ik lok keneng at Lenavolo atdi i lok keretna.

‘Kopmen tavasuun at lebelemamao atdi saparav ia.” ^a

Laradi Loklok Tooro Naba Vot

26 La ne Iesu ga lok bok tidi, “Laradi loklok tooro naba vot; neni Loroonan at luruturun, la ni naba si boro vana at ne Tamak. Aba sak tiki i saparap nimi boro at ne Tamak, la neni naba tong asu levelinga mumu ia. 27 La nemi bok, miba paase asuusu minia, mila nemi migara nemen eburu vam minia; ga ru ka i at laaleng nenia aga ru ka lugugu rak.