‏ John 4

Iesu Mi Latkin Boro Samaria

1Lubung Parisi diga ronga i do limixin solo diga mumu asu ne Iesu la ni ga sep susu di la kopmen bok ba timixin solo diga mumu asu ne Jon. 2Ne Iesu xa xopmen goxo sep susu tara; ketla luvuttadi loklok ka anasa mun teren digap sep susu limixin. 3Ne Iesu ga ronga i na levelinga la neni ga vas kaxat basinge nom lenep Judaia la gamlong manga uto Galili. 4At lavatpas teren ugo, ga epovo do neni nat pas keneng at lenep silok Samaria.

5Ni gat pas go Samaria la ga rupot to at lemenemen laasen teren Saikar; goxo vaxalom solo boro at lenep kangka ne Jakop ga raba lamdak teren ne Josep min. 6Lamamara dan at ne Jakop ga nemen e; la ne Iesu, ga molo ap mo lavatpas la ni ga xis go saparap lamamara dan. Taba ga xanangking.

7Lara latkin boro Samaria ga vas pot go xusu rintu dan. La ne Iesu ga lok tin, “Una raba ia mi toxondan ti inin.” 8Luvuttadi loklok ka anasa ren no nga di at lemenemen silok diga un panga anan.

9La nom latkin ga lok tin keretna, “Nenu laradi boro Judaia la nenia mede Samaria, tila u sing ia do anantu ka toxondan tu la una in?” Leme Judaia dixo inin at leventingtigon dan leme Samaria ding long tu ren.

10La ne Iesu ga vorang i rin, “Do uklen laramtaba at ne Moroa la mo laradi i sing u ri toxondan, i epovo do una sing i ri laxadan too, la ni naba raba u min.”

11La nom latkin ga lok tin, “Leeme Silok, uxo ruuna tavat buxom silok kusu rintu dan la ladan no xa ik lok kopok. Uba lok ka rinotno nom laxadan too ua? 12Lurubuno atnema ne Jakop ga xe na lamamara dan tinama, la neni eburu mi laxamdak teren, la lempanga mi lavanuet kangkedek atdi, diga inin de; la kereva u lok do nenu mo u silok ti ne Jakop?”

13La ne Iesu ga vorang i ri latkin keretna, “Do tara na in at nom laxadan neni naba minu amu bok. 14Ket do tara na inin at laxadan nenia ana raba i min, neni noxo minu bok ba. I ruturun do laxadan nia ana raba i min naba lok ngan loxodan i puvut su xeneng at lorooro ren, la naba raba i mi lorooro avolo.”

15La nom latkin ga lok tin, “Leeme silok, una raba ia mi nom ladan, kusu a noxok minu bok ba la anoxot pot amisik de kusu rin tuntu dan.”

16La ne Iesu ga lok tin, “Una onon be la una lam kaka latlok taram. La munamlong ba ude.”

17Latkin ga lok tin, “Axo ruuna tatlok.”

La ne Iesu ga lok tin, “Ik mokso levelinga ram do kopmen tatlok taram. 18Ugara epot pam at lavalimo lavatlok la ti latlok mo nga nenu u epot teren, kopmen neni latlok tinotno ram. Lavapaase ram tia i ruturun.”

19Latkin ga lok, “Leeme Silok, a ven kisip ba i do nenu leeme vapaase alii. 20Lavalabat atnama mede Samaria diga lotu parap ne Moroa at nai lakaana, ketla nemi leme Judaia mi tong i do lemenemen Jerusalem neni lenep ti lotu parap ne Moroa e.”

21Iesu ga lok tin, “Latkin, una nuunu at na levelinga rak; laaleng naba vot la limixin axap di noxo lotu parap ne Moroa at na lakaana kopla to Jerusalem. 22Nemi limixin boro Samaria mixoklen tinotno ne Moroa mi lotu parav i; nema limixin me Judaia maklen ne Moroa mila Laradi Loklox Arooro neni at lubungmixin me Judaia. 23Ketla mo laaleng naba vot, nanga ira vot pam, la limixin lotu ruturun diba lotu parap ne Temen di mi lusumsuma at Loroonan Kaala la mi luruturun. Nedi mo limixin lotu ruturun, ne Temen di i vara di do dina lotu saparav i. 24Moroa neni loroonan; la kerepmo nedi di lotu parav i dina lotu saparav i mi lusumsuma at Loroonan Kaala la mi luruturun.”

25Latkin ga lok tin, “Aklen i do Lanarong, ne Karisito, naba vot. Do neni na vot, ni naba re axasep axap dik mi lempanga axap.”

26Melemu ne Iesu ga lok tin, “Nenia vam na, mo nenu u epaase eburu min.”

Luvuttadi Loklok Ka Anasa Digamlong

27Ap mo mun loxonaleng luvuttadi loklok ka anasa ren digamlong; la diga rakdu mila ne Iesu ga epaase eburu mi nom latkin. Ketla kopmen tara atdi ga sue latkin do, “U vara lavanga salai?” Kopla gita sue ne Iesu do, “Tila u epaase eburu mi nom latkin?”

28Latkin ga vas kaxat basinge lavat buxom dan teren, la gamlong uto at lemenemen silok, la ga vaase ri limixin mego, 29“Ude nimi la mina ven lara laradi; neni i vaase axasev ia mi lempanga axap nenia agak lox i gano. Nenia a lok do neni vam Lanarong.” 30Kuren la diga on basinge lemenemen silok la diga vas kaxat uto ri ne Iesu.

31Ap mo mun loxonaleng luvuttadi loklok ka anasa at ne Iesu, diga lok tin, “Rabai, una anan be.”

32Ketla neni ga lok tidi xeretna, “Levempanga mo rak ik lok ti anan la nemi mixoklen i.”

33La luvuttadi loklok ka anasa ren diga esue xantubu atdi xeretna, “Kereva, tentaba go di raba i mi teveluxa?”

34Ketla Iesu ga lok lavapaase poovo ridi, “Leveluxa rak keretna, ana ronga res at lavavara at ne Moroa ga riki ia la ana lox axap lugugu neni ga raba ia min. 35Nemi mik lok do, ‘Lavanuet gaaling bok mo la melemu ba mina sep kin at laraamang;’ ketla a tong i rinimi do mina ven avukat at laraamang; levempeven panga mo nga ia mukun pam la monga i gagas. 36Mo laradi ik lok kaka bubua levempipisik at laraamang, i gu kaxat pam la ira lok kaka luunun tin, la mo levempipisik teren i lok ngan lorooro avolo; la kerepmo mo laradi itlotlo la mo laradi ik lok kaka bubua levempipisik at laraamang, du buru duba momo. 37I lox asorun na levelinga i lok keretna, ‘Lara itlotlo la lara vetpes ik lok kaka bubua levempipisik at laraamang.’ 38La kerepmo aga riki vam nimi xusu ri lok ka lempanga anan at laraamang, nemi xa xopmen mi goxotlotlo li i; lentaba vetpes digatlotlo li i go la nemi mik lok kaka levempipisik teren.”

Buaang Limixin Me Samaria Diga Nuunu

39Buaang atnedi limixin me Samaria ap mo lemenemen diga nuunu at ne Iesu mila latkin ga lok do, “Neni ira tong axasep pam ia mi lempanga axap nenia agak lox i.” 40Kuren la ap mo loxonaleng mo limixin diga vot pasa i, diga sing i xusu na nemen eburu be midi; la ne Iesu ga nemen eburu midi go at legepu aleng.

41Buaang bok atnedi diga nuunu at ne Iesu, mumu levelinga ap mo latkin, 42la diga lok tin keretna, “Ma nuunu ba, kopmen do at levelinga uga tong i, ketla mila nema axa mara ronga ba i, la maklen ba i do neni Laradi Loklox Arooro ruturun ti limixin at na lavatbung menemen.”

Iesu Ga Lox Aroo Lamdak At Laradi Gomgo

43Melemu at legepu aleng Iesu ga nemen go Saikar, neni ga vas kaxat basinge di la gat pas uto Galili. 44Ganoxa ne Iesu ga lok, “Laradi vapaase alii, kopmen di noxo lok ngangao ren to at lenep axa ren.” 45Se neni ga vot go Galili, limixin mego diga lok momo aleng min, mila at loxonaleng nedi digat pas uto Jerusalem ti leluxa at Lovovolo Pe, diga ven lempanga axap ne Iesu ga lox i ap mo leluxa.

46Iesu gamlong uto Kena at lenep Galili, lemenemen neni ga ba gili laxadan ti lavaen e.

La lara laradi gomgo at la gavaman ga nemen to Kaprenaum la lamdak teren ga meres. 47Se neni ga ronga i do ne Iesu ga vot boro Judaia la uto Galili, ni ga vosiga i la ga sing i xusu nat pas uto Kaprenaum la na lox aroo lamdak teren; monga gak midi ameremet. 48Iesu ga lok tin, “Kopmen tara atnimi noxo nuunu se do mina ven lempanga sangsangu.”

49Laradi gomgo ga lok tin, “Leeme Silok, una emu eburu minia; dola kopmen, lamdak tarak naba met.”

50Iesu ga lok tin, “Una onon, lamdak taram naba roo.”

Laradi gomgo ga nuunu at levelinga at ne Iesu la ga vas kaxat. 51At lavatpas teren uto xolonu lavasaxaruki ren diga xip tangarang kaka i la diga lok tin keretna, “Lamdak taram mo naba roo.”

52La neni ga sue di mi loxonaleng salai lamdak teren ga lox avukat kakalik, la diga lok, “At legesa xonaleng itinongo xanangking mo liplivi ita repes basinge i.” 53La temen lamdak ga doxoma bilong ti levelinga at ne Iesu ga vaase i rin at loxonaleng kerepmo do, “Lamdak taram naba roo.” Kuren la neni eburu minedi axap limixin diga nemen at loogu ren diga nuunu at ne Iesu.

54Na lavanga sangsangu, ni lugugu sepsev agepura at lempanga sangsangu ne Iesu ga lox i melemu at laaleng ni ga vas kaxat boro Judaia la uto Galili.