‏ John 6

Iesu Ga Raba Luxa Buaang Limixin

(Mt 14:13-21; Mk 6:30-44; Lu 9:10-17)

1Melemu at nai Iesu gamlong polo manga at lavatdan kis Galili. (Laasen bok teren Tiberias.) 2La buaang nedi limixin diga mumu asu i, mila digara ven pam levempanga sangsangu neni ga lox i ri lox avukat nedi digak meres. 3Melemu ne Iesu ga vas urut uto vana at loxongkaana la ga xis eburu mi luvuttadi loklok ka anasa ren. 4Leluxa silok at limixin me Judaia diga so asen i do Lovovolo Pe mo nga ga auret.

5Iesu ga milik tangtagap la ga ven i do, buaang nedi limixin mo digat pas kusu dina vot pasa i, kuren la ni ga sue ne Pilip, “Ataba un kaka teveluxa ua xusu ba epovo ri na limixin?” 6Ni ga tong i na xusu ri lok tong pen ne Pilip; neni gaklen pam lai neni naba lox i.

7Pilip ga vorang i rin, “Ixo epovo xusu ata un kaka tevengkongkide mi tegepu sangaun kobot (200) denarias kusu ridi ri anan.”

8Laradi loklok ka anasa at ne Iesu, laasen teren ne Endru, neton ne Simon Pita ga lok, 9“Lara lamdak na, i ruuna lavalimo lengkongkide xakalik at levempiao bali la luemat kakalik. Ketla noxo epovo ri na limixin solo.”

10La ne Iesu ga lok ti luvuttadi loklok ka anasa ren, “Mina tong i ri limixin kusu dina xis kopok.”

Mo lenep ga umsu mi laxampivilis. Kuren la limixin diga xis kopok; nedi lavatlok axap diga epovo at lavalimo larabin sangsangaun kobot (5000). 11Iesu ga lok ka loxongkide, la ga tong loklox avukat, la digam taba mo limixin min digat kis. Ni ga tong avukat bok ti ne Moroa mi luemat la ga raba bok limixin min, la nedi axap diga an mais ga epovo at lavavara atnedi.

12Se diga an mais axap, Iesu ga lok ti luvuttadi loklok ka anasa ren, “Mina lok ka bubua lengkon atat luxa; nemen dik ata ke xepe tengkot.” 13Kuren la diga lok kaka bubua axap nom lengkon atat luxa, la diga suxa aumsu lasangaun mi legepura leventat min boro at nom lavalimo lengkongkide at lempiao bali, mo limixin diga anan i.

14Mo limixin go diga ven mo lavanga sangsangu ne Iesu ga lox i, la diga lok, “I ruturun aleng; neni mo leeme vapaase alii diga tong i do naba vot at na lavatbung menemen!” 15Iesu gaklen pam i do limixin mo diba vot pasa i la dina lok kaka i, kusu dina pu soso i ngan loorong silok tidi; kuren la neni xusuk ga vas kaxat uto at lengkongkaana vetpes.

Iesu Gat Pas To Mavana At Lavatdan Kis Galili

(Mt 14:22-33; Mk 6:45-52)

16Ga ukantinao bukbuxumin, luvuttadi loklok ka anasa at ne Iesu diga vas si uto xopok at lavatdan kis, 17la diga los kas at lesepang la diga sen bilong at lavatdan kis uto Kaprenaum. Lavanga mo garang bungmain ta, la ne Iesu goxovisi vosiga di. 18Langsangan lamanman lolos gat mas la ga lok ladan ga rem ekapus. 19Luvuttadi loklok ka anasa digatla uto vaxalom la diga ven ne Iesu gat pas to mavana at lavatdan kis uto saparap di. La diga marat aleng. 20Iesu ga lok tidi, “Nemen mita marat. Nenia mun na!” 21La diga mulus ka i uto at lesepang; la soso mun lesepang ga oso uto loxon ap mo loxot nedi diga sesen tin.

Limixin Diga Puke Ri Ne Iesu

22Ap mo manga lara laaleng petpes, limixin no diga nemen to ap mo lenep ne Iesu ga raba nedi mi leveluxa e, diga ven i do legesa sepang mun mo ga nemen. Digaklen i do ne Iesu goxo emu eburu mi luvuttadi loklok ka anasa ren ap mo lesepang, la luvuttadi loklok ka anasa xusuk mun diga sesen. 23Melemu leventaba lesepang boro Tiberias diga oso go saparap mo lenep limixin diga anan lengkongkide e, melemu at Leeme Silok ga tong avukat ti ne Moroa. 24Se limixin diga ven i do Iesu goxok lox e, la luvuttadi loklok ka anasa ren bok, diga los kas at levesepang la diga sen uto Kaprenaum, kusu dina reven tin.

Iesu Neni Lakde At Lorooro

25Se limixin diga long lenget ne Iesu to Kaprenaum, diga lok tin, “Leeme loklox ase, u vot de lingisa?” 26Iesu ga vorang i ridi xeretna, “A tong tuturun i rinimi. Mi reven pupuse ria mila miga anan levengkongkide la nemi axap miga an mais teren, ketla kopmen do miga xasep avukat at lavasuun at levempanga sangsangu nenia aga lox i. 27Nemen mita gugu ri leveluxa ua naba sonao soso; ketla mina gugu lolos ti leveluxa i nemen amisik ti lorooro avolo. Na leveluxa, nenia, Laradi Mevana, anaba raba nemi min, mila ne Moroa ne Temen dik ira soxolik ka vam ia.”

28Kuren la diga sue i, “Maba lok lavanga salai xusu manaba lox epovo lavanga ne Moroa i vara i do maba lox i?”

29Iesu ga vorang i ridi xeretna, “Lavanga ne Moroa i vara i xusu mina lox i, i lok keretna; mina nuunu ap mo lara ne Moroa ga riki i.”

30La diga sue rin keretna, “Lavanga sangsangu sala uba lox i xusu maba ven i la mana nuunu ba ram? Uba lok lavanga salai? 31Lavalabat atnama diga anan leveluxa at ne Moroa ro at lamatbin laasen teren lamaana, kerekngan Lovoang Kaala i tong i do, ‘Ni ga raba nedi mi levengkide boro vana at laxalibet.”

32Iesu ga lok tidi, “A tong tuturun i rinimi. Ne Moses goxo raba nemi mi lakde boro vana at laxalibet, ketla ne Tamak axa im taba nemi mi lakde ruturun boro vana at laxalibet. 33Mo lakde ne Moroa i raba i, neni i ngan mo lara ga si boro vana at laxalibet la im taba lorooro ri limixin at na lavatbung menemen.”

34Diga lok, “Leeme Silok. I ru ka nga i mo lingina la melemu una raba amisik nema mi nom lakde.”

35Iesu ga lok tidi, “Nenia lakde at lorooro. Mo do tara na vosiga ia, neni noxo roxo bok ba; la neni do i nuunu rak, neni noxo minu bok ba. 36A tong i rinimi do mira ven pam ia, ketla kopmen mina nuunu rak, kerekngan a tong pam i rinimi. 37Nedi axap ne Tamak i raba ia midi, dinaba vosiga ia. La do tara na vosiga ia, nenia noxo sok tixirixes i. 38Nenia agoxo si boro vana at laxalibet do ti mu asu lavavara rak, ketla ti lox epovo lavavara ap mo lara ga riki ia ude. 39Lavavara ap mo lara ga riki ia, i lok keretna; nenia noxo ke asoogong tegesara atdi limixin neni ga raba vam ia midi, la anaba lox aroo xat di at laaleng ete; 40mila lavavara at ne Tamak i lok keretna, nedi do di ven kisip ne Nitna ne Moroa la di nuunu ren, dinaba lok ka lorooro avolo, la nia anaba lox aroo xat di at laaleng ete.”

41Limixin amgomgo diga epaase xuxurung mumu ne Iesu, mila neni ga lok do, “Nenia lakde aga si boro vana at laxalibet.” 42Diga lok, “Neni mun ne Iesu, nitna ne Josep la ne Maria. Nedik taklen ne temen mi nenen. I lok kereva la neni i tong i do ni ga si boro vana at laxalibet?”

43La ne Iesu ga vorang i ridi xeretna, “Na xap ta nimi at lavapaase xuxurung kantubu atnimi. 44Kopmen tara i epovo na vosiga ia, se do ne Tamak na sat ka i ude saparav ia; la nia aba lox aroo xar i at laaleng ete. 45Lavaeme vapaase alii diga malagan li levelinga xeretna,

‘Limixin axap, ne Moroa naba anasa di.’ ^a

Nedi axap do di ronga ne Tamak la dia lok kaka loklox anasa ren, nedi diba vosiga ia. 46Kovisi tara na ven ne Tamak; nenia aga laa boro at ne Moroa, nenia xusuk mun agara ven pam ne Tamak. 47A tong tuturun i rinimi; do tara na nuunu rak, neni naba ruuna ka lorooro avolo. 48Nenia lakde at lorooro. 49Lavalabat atnimi diga anan leveluxa at ne Moroa ro at lamatbin, la diga met. 50Ketla na lakde ga si boro vana at laxalibet, ni i lok petpes; la do tara na anan teren, neni noxo met. 51Nenia lakde at lorooro la aga si boro vana at laxalibet. Do tara na anan at na lakde, neni naba rooro amisik. Na lakde, ni levenuut tarak. Aba raba i ri limixin axap kusu diba rooro.”

52Anai levelinga ga vaxaru kaxat ka lavapaase mukmusak kantubu at luvuttadi amgomgo la diga esue xeretna, “Na laradi ba raba dik mi levenuut teren kereva xusu ri anan?”

53Iesu ga lok tidi, “A tong tuturun i rinimi. Do mi noxo anan at levenuut tarak, Laradi Mevana, la mi noxo inin at lada rak, mi noxo ruuna ka lorooro. 54Do tara na anan at levenuut tarak la na inin at lada rak, neni ira ruuna ka vam lorooro avolo, la nia anaba lox aroo xar i at laaleng ete. 55Levenuut tarak ni leveluxa ruturun, lada rak ni laxadan tuturun ti inin. 56Do tara na anan at levenuut tarak la na in at lada rak, neni i nemen tarak la nia a nemen teren. 57Ne Tamak neni im taba lorooro, neni ga riki ia, la keneng mun teren, la nenia bok a rooro. Kuren la, do tara na anan at levenuut tarak, neni naba ruuna ka lorooro xeneng mun tarak. 58Anai ni lakde ga si boro vana at laxalibet; ixo lok ngan lakde, lavalabat atdik diga anan i, ketla melemu diga met. Do tara na anan at na lakde, neni naba rooro amisik.” 59Iesu ga tong asu mo levelinga at laaleng neni ga anasa ro at loogu singising to Kaprenaum.

Luvuttadi Loklok Ka Anasa Diga On Basinge Ne Iesu

60Buaang atnedi luvuttadi loklok ka anasa at ne Iesu diga ronga i na la diga lok, “Anai levenanasa i lolos tinotno. Nege i epovo na siam ka i?”

61Iesu gaklen pam i do luvuttadi loklok ka anasa ren diga paase kuxurung mumu na levelinga ren. La ni ga sue di, “Kereva, na levelinga i lok kapmek lebelen nimi? 62Kereva, dola mina ven ia, Laradi Mevana, ana urut uto vana, minaba siam ka ba levenanasa rak? 63Loroonan Kaala im taba limixin mi lorooro; levenuut kusuk mun kopmen na epovo na lok tooro di. Levelinga nenia a vaase vam nimi min, neni levelinga at Loroonan kaala la at lorooro. 64Ketla leventaba atnimi move xopmen dina nuunu rak mi lunuunu atdi.”

At lavakpaxaru kaxat at lugugu ren, Iesu gaklen pam nege nedi leventaba di goxo nuunu ren, la nege mo lara naba song araba i ri limixin kapmek. 65La ni ga lok bok keretna, “Ni na levelinga neni lavasuun teren la nia ara tong i rinimi do tara noxo vosiga ia se ne Tamak na lox avolo i xusu neni na nuunu rak.”

66Melemu at nai, buaang atnedi luvuttadi loklok ka anasa ren digamlong basinge i la kopmen bok ba di goxo emu eburu min.

67La ne Iesu ga sue lasangaun mi legepura luvuttadi loklok ka anasa ren keretna, “La nemi bok mi vara i do minamlong?”

68Simon Pita ga vorang i rin keretna, “Leeme Silok, kopmen bok ba tara mabat kis esogo min. Nenu xusuk mun u ruuna levelinga im taba lorooro avolo. 69La monga ma nuunu la maklen i do nenu laradi melemelengan boro at ne Moroa.”

70Iesu ga lok tidi, “Nia aga soxolik ka nemi lasangaun mi legepura ngan luvuttadi loklok ka anasa rak. Ketla legesara atnimi ni lamdak at ne Satan.” 71Iesu ga tong asu i na mumu ne Judas, lamdak at ne Simon Iskariot; Judas neni lara atnedi lasangaun mi legepura luvuttadi loklok ka anasa, la ga song araba ne Iesu ri limixin kapmek.