Joh 8 | MMX | STEP | La nedi digat pas uto xolonu atdi getgesara, ketla ne Iesu gat pas uto at Lakaana Olip.

‏ John 8

Diga Long Lenget Ka Latkin Ga Longka

1 La nedi digat pas uto xolonu atdi getgesara, ketla ne Iesu gat pas uto at Lakaana Olip. 2 Ga maxantamak suubu ap mo lara laaleng petpes, neni gat pas uto at loogu laplavang. La nedi limixin axap diga tu bubua kangkan i, la ni ga xis kopok la ga anasa di. 3 La luvuttadi loklox ase at Lenavolo eburu mi lubung Parisi diga lam abeles lara latkin, diga long lenget ka i ga longka; la diga vaxaru li i ro melamgo atdi axap. 4 Diga lok ti ne Iesu, “Laradi loklox ase. Na latkin neni i epot la ma long lenget ka i, i longka lara latlok kopmen ateren. 5 At Lenavolo, ne Moses ga raba lara lavapaase lolos do tara tatkin na lok na loklok, taba lu amer i mi laxanuat. Ua levelinga ram ti na loklok?” 6 Diga tong i na xusu ri lok tong ne Iesu mila diga vara i xusu dina bala raba i.

Ketla ne Iesu ga rikbu si la ga malagan to xopok at laxangka mi lisivisip teren. 7 Diga tu go la diga susue ne Iesu mi levesusue, la neni ga ru urut akmokso upana la ga lok tidi, “Do tara atnimi goxovisi lok taxapmek, neni na lok ka tuat la na lu avot na latkin.” 8 La neni ga rikbu manga la ga malagan manga ro xopok at laxangka.

9 Se diga ronga i na, digat pas kaxat sisi basinge mo loxot, luvuttadi mukun avot; la melemu ne Iesu xusuk mun ga nemen eburu mi latkin move ga tu go. 10 Iesu ga ru urut la ga lok tin, “Latkin. Ua nga di no? Kereva, tara gove i nemen kusu na vaxaru u at lavapaase?”

11 La mo latkin ga lok tin, “Kopmen teta, Leeme Silok.”

Iesu ga lok tin, “Nenia bok kopmen ana vaxaru u at lavapaase. Una onon, ketla nemen uta lok bok ba taxakapmek.”]

Iesu Ni Laxasep Ti Lavatbung Menemen.

12 La ne Iesu ga vaase manga ri limixin keretna, “Nia laxasep at na lavatbung menemen. Do tara na nuunu rak, neni naba ruuna ka laxasep at lorooro, la kopmen noxot pas at lamain.”

13 La lubung Parisi diga lok tin, “Nenu u paase aru axa u, la levelinga ram kopmen nak mokso.”

14 Iesu ga vorang i ridi xeretna, “Keke i do nia a paase aru axa ia, ketla levelinga rak i ruturun, mila nenia aklen lemenemen nenia aga vas kaxat meve la anabat pas bok uve. Kopmen minaklen lemenemen nenia aga vas kaxat teren la ti lenep nenia abat pas tin. 15 Nemi mi ila mumu limixin mi lodoxoma at na lavatkangka, ketla nia anoxo ila mumu loklok at tara. 16 Ket do nia ana ila mumu loklok at tara, levelinga rak naba ruturun; mila kopmen nenia xusuk a tong mo levelinga, ketla ne Tamak ga riki ia, neni ik lox amumuat levelinga rak. 17 Levelinga ro xeneng at Lenavolo atnimi i lok keretna; do legepu radi dina siam at tevelinga, mo levelinga i ruturun. 18 Nenia a paase aru axa ia, la ne Tamak bok ga riki ia, i paase aru box ia.”

19 Diga sue i, “Ne Tamam ua?”

La ne Iesu ga lok, “Mixoklen ia la ne Tamak. Mo do minaklen ia, mibaklen bok ne Tamak.” 20 Iesu ga tong na levelinga at loxonaleng neni ga anasa limixin to xeneng at loogu laplavang, to at loxot, levempanga lili pilas ga nemen e. Ketla kopmen tara goxo ranga alis i, mila loxonaleng tin goxovisi epovo.

Mi Noxot Pas Ti Mo Lenep Nenia Anabat Pas Uve

21 Iesu ga lok manga ridi xeretna, “Anaba onon basinge nimi, la miba reven tia; ketla miba seeve nop laxakapmek atnimi, la mixo epovo do minat pas ti mo lemenemen nenia anabat pas uve.”

22 Luvuttadi amgomgo diga lok tidi xa xeretna, “Neni i lok do, ‘Nedik dixo epovo rit pas ti mo lenep neni nabat pas uve.’ Ua lavasuun at na levelinga? Agut i lok do neni naba sev amet axa i.”

23 Iesu ga vorang i ridi xeretna, “Nemi limixin mede xopok, nenia boro vana; nemi limixin at na lavatkangka, ketla nenia xopmen mede xopox ia. 24 Kuren la a tong i rinimi do nemi miba seeve mumu laxakapmek atnimi. Do mixo nuunu do nenia mo a tong pam i rinimi, miba seeve mumu laxakapmek atnimi.”

25 La diga sue i, “Nenu nege?”

Iesu ga vorang i ridi xeretna, “Nia ara tong pam i rinimi. 26 At laaleng ete nenia aba ruuna laxampapaase solo mumu laxakapmek atnimi. Mo lara ga riki ia ude, neni luruturun, la mo levelinga ni ga raba ia min, nia a tong asu i ri limixin axap at na lavatbung menemen.”

27 Di goxo xasep do ne Iesu ga paase ridi mumu ne Temen. 28 Kuren la ne Iesu ga lok tidi, “Se do mina xip aurur ia, Laradi Mevana, ro vana at laxaba, mibaklen ba i do nenia nege la mibaklen ba i do nenia axo lok levempanga mi lavavara axa rak, ketla a vaase mun mo levelinga ne Tamak ga raba ia min. 29 La mo laradi ga riki ia ude, mo ik lox eburu minia, ixo ke xepe xusux ia, mila nenia ak lok amisik levempanga i lox amomo i.” 30 Buaang atnedi limixin diga ronga ne Iesu ga tong asu na levelinga diga nuunu ren.

Nege Laxamdak At Ne Abaram?

31 Kuren la ne Iesu ga lok ti leme Judaia mo diga nuunu vam teren, “Dola minam tebeng levenanasa rak, ba ruturun do nemi luvuttadi loklok ka anasa rak. 32 La kerepmo mibaklen levelinga ruturun at lorooro, la mo levelinga naba lox asepmus nemi.”

33 La diga lok, “Nema livipisik li at ne Abaram, la kovisi toxonaleng ma nemen ngan lavaanat saxaruki at teta. Ua lavasuun at nom levelinga ram u tong i do, maba sepmus?”

34 Iesu ga lok tidi, “A tong tuturun i rinimi. Do tara i lok laxapmek, neni lasaxaruki at laxapmek. 35 Lasaxaruki neni noxo epovo xusu neni lara xeneng ap mo lixitkis koetemen, ketla neni i gugu mene ridi. Ketla lamdak ap mo loxoetemen, neni i nemen amisik keneng at lixitkis koetemen. 36 Do nenia, ne Nitna na lox asepmus nemi, nemi miba sepmus tuturun. 37 Aklen i do nemi livipisik li at ne Abaram. Ketla nemi move mi doma i do mina sev amer ia, mila levelinga rak kopmen na nemen aulis keneng at lorooro atnimi. 38 A paase mumu levempanga ne Tamak ga lox ase ia min, ketla nemi mik lok levempanga ne temen nimi ik lox i.”

39 Diga lok tin keretna, “Temen nema ne Abaram.”

Iesu ga vorang i ridi xeretna, “Do nemi laxamdak tuturun at ne Abaram, miba lok leven gugu nunuan kerekngan ne Abaram ga lox i. 40 Nenia a tong asu mun levelinga ruturun aga ronga i boro at ne Moroa la mi vara aleng i do mina sev amer ia; ne Abaram goxo lok tevempanga xerepmo. 41 Nemi mik lok levempanga ngan ne temen nimi ik lox i.”

Diga lok, “Ne Moroa xusuk mun neni ne temen nama. La nema laxamdak tuturun teren.”

Luvutnitna Ne Satan

42 Iesu ga lok tidi xeretna, “Dola ne Moroa ne Temen nimi, nemi minaba balamu ia mila nenia aga laa boro at ne Moroa la monga nenia ak lok de. A goxo vas kaxat mi lodoxoma axa rak, ketla ne Moroa ga riki ia. 43 Tila mixo xasep at levelinga rak? Lavasuun teren keretna, nemi mixo epovo do mina siam ka levelinga rak. 44 Nemi laxamdak at ne temen nimi, ne Satan. La mi vavara i do mina mumu asu lavavara at ne temen nimi. Ga ru ka i at lurutu kaxat neni laradi sepsev amet tadi. La neni xopmen na tu at luruturun, mila kopmen turuturun keneng teren. Do neni i vaase laxaxarang, neni ik lok mene levempanga i epovo rin, mila neni laradi xaxarang, la neni lavasuun at laxaxarang. 45 A paase ruturun, kuren la mixo nuunu rak. 46 Kopmen tara atnimi i epovo na lox asuusu i do nenia aga bixurun mi laxakapmek. Dola a paase ruturun, tila ba mi xopara na nuunu rak? 47 Laradi i laa boro at ne Moroa, neni nang tonga levelinga at ne Moroa. Nemi xopmen boro at ne Moroa, mila kopmen minang tonga levelinga ren.”

Iesu La Ne Abaram

48 Luvuttadi amgomgo diga lok ti ne Iesu xeretna, “Nenu laradi boro Samaria la lagas i nemen taram.”

49 Iesu ga vorang i ridi xeretna, “Lagas kopmen na nemen tarak, a lok ngangao at ne Tamak, ketla nemi mixo lok ngangao rak. 50 Axo vara i do ana lox asilox ia xusu limixin diba lok ngangao rak. Ketla ne Moroa i vara i do limixin na lok ngangao rak la neni leeme rongtonga linga. 51 A tong tuturun i rinimi. Do tara na ronga res at levelinga rak, neni noxo seeve.”

52 Luvuttadi amgomgo diga lok tin, “Anaa maklen ba i do lagas i nemen taram. Abaram ga met, la lavaeme vapaase alii bok diga met, la u lok keretna, do tara na ronga res at levelinga ram, kopmen noxo met. 53 Temen nema ne Abaram ga met, la nenu u tong i do u silok ti ne Abaram, la lavaeme vapaase alii bok diga met. U doxoma ba i do nenu nege?”

54 Iesu ga vorang i ridi xeretna, “Dola nenia ana lok asilox ia, levelinga rak naba lok ngan lavanga gamasa. Ketla ne Tamak ik lox asilox ia. Nemi mi tong i do neni ne Moroa atnimi. 55 Nemi xa xopmen minat kis ekilen mi ne Moroa, ketla nenia at kis ekilen min. Dola nia gita tong i do nia xopmen anat kis ekilen min, nenia a lok ngan laradi xaxarang, kerekngan nimi. Ketla nenia at kis ekilen min, la ang tonga res at levelinga ren. 56 Temen nemi ne Abaram ga lok momo aleng do neni naba ven lovotpot tarak, neni ga ven i la ga lok momo.”

57 Luvuttadi amgomgo diga lok tin, “Nenu xovisi lavalimo sangaun maares taram. La tila u tong i do uga ven pam ne Abaram?”

58 Iesu ga vorang i ridi xeretna, “A tong tuturun i rinimi. Gano ne Abaram goxovisi vot, nenia mo aga nemen pam.” 59 Diga ranga ka laxanuat do ri lu ne Iesu; ketla neni ga vas ekula kaxat la ga on basinge loogu laplavang.