Mat 10 | MMX | STEP | Iesu ga xup buru ka nedi lasangaun legepura luvuttadi loklok ka anasa ren saparav i la ni ga raba di mi lololos kusu dina riki asu lubunggas basinge limixin la dina lox aroo luvuttadi mi levenanmeres ga lox abinis labantuxu atdi, la levenasen anmeres bok basinge limixin.

bMai 7:6

‏ Matthew 10

Iesu Ga Riki Asu Lasangaun Mi Legepura

(Mk 3:13-19; Lu 6:12-16)

1 Iesu ga xup buru ka nedi lasangaun legepura luvuttadi loklok ka anasa ren saparav i la ni ga raba di mi lololos kusu dina riki asu lubunggas basinge limixin la dina lox aroo luvuttadi mi levenanmeres ga lox abinis labantuxu atdi, la levenasen anmeres bok basinge limixin.

2 Ni levenasen atnedi na lasangaun legepura luvuttadi vavang; avot tinotno ne Simon (laasen bok teren ne Pita), la ne Endru neni neton; la ne Jems eburu mi neton laasen teren ne Jon, nedu lumdak at ne Sebedi; 3 Pilip la ne Batolomiu; Tomas la ne Metiu, neni laradi loklok ka pilas; Jems, nitna ne Alpias, la ne Tadias; 4 Simon, neni at libinam tadi me Selot, la ne Judas Iskariot, neni mo laradi ga song araba ne Iesu ri limixin bilinga.

Iesu Ga Vaase Asu Lempanga Luvuttadi Vavang Dinaba Lox I

(Mk 6:7-13; Lu 9:1-6)

5 Iesu ga riki asu na lasangaun legepura luvuttadi mi levelinga xeretna; “Nemen gat nimi gutat pas uto at tenep at limixin kopmen di me Judaia kopla uto at temenemen at leme Samaria. 6 Mina vosiga mene limixin boro Israel, di lok ngan laxasipsip di soogong. 7 At lavatpas atnimi, mina vavang ti limixin do Linintoo boro vana at laxalibet monga ira auret! 8 Mina lox avukat levenanmeres, la mina lox arooro amlong luvuttadi met, la mina lox avukat nedi levenanmeres gu ik lok atdi, la mina riki asu lubunggas basinge limixin. Nia ara raba gamasa vam nimi mi lololos ti lok na leven gugu; kuren la mina gugu min la nemen gat mita ro unun tin. 9 Nemen gat mita xip ka tempilas eburu minimi. 10 Nemen mita xip kaka teventat eburu minimi at lavatpas atnimi, kopla tavanga singsiga ri vetara xun; kopla tuvanga vatpas, kopla takdak tit pas, mila laradi gugu at ne Moroa i epovo na lok ka lempanga anan tin boro at limixin neni i vavang tidi.”

11 La ne Iesu ga lok bok tidi xeretna, “La do mina vas pot at temenemen silok kopla temenemen lixilik, mina puse ri taradi avukat la mina nemen eburu min se mina vas kaxat basinge mo lemenemen. 12 Do mina vubeles ukeneng at tara toogu, mina lok tidi xeretna, ‘Limila nak lox eburu minimi.’ 13 Do limixin ap mo loogu di siam ka nimi, mina ke limila atnimi nak lox eburu midi. Ket do dixo siam ka nimi, mina ke limila namlong mu nimi. 14 La do tara ixo siam ka nimi kusu na ronga ka levelinga atnimi, mina semla xepe laxakup basinge lengkangkedek atnimi at loxonaleng mina vas kaxat basinge mo loogu kopla mo lemenemen silok. ^{▼▼Na loklok i lox asuusu i do ne Moroa naba raba lumumuat ti limixin ap mo lemenemen.} 15 A tong tuturun i rinimi do at laaleng ete, ne Moroa naba lox asuusu lumumuat ti limixin boro Sodom la Gomora, ketla neni naba lox asuusu lumumuat silok tinotno ri limixin ap mo lemenemen tongtonga xepe!”

Levenmumuat La Levesongsongot Naba Vot

(Mk 13:9-13; Lu 21:12-17)

16 La ne Iesu ga lok tidi, “Mina ronga i na! Ana riki aonon nimi ngan laxasipsip kantubu at laxanman sio. Mina lok tatao avukat nimi i ngan lisii neni ikleklen solo la minak lox atnaasan ngan levenamno. 17 Mina reven avukat, mila lentaba luvuttadi mo diba ranga alis nimi la dina lok ka nimi ri lavapaase; la dibak pixis nimi ro xeneng at laraugu singising atdi. 18 Diba vaxaru nimi ro melamgo at luvuttadi amgomgo la to bok melamgo at lavaorong silok mila mi mumu asu ia, la miba tong asu Lagale Lavavang tidi la ti limixin kopmen di me Judaia. 19 Do dina lok li nimi at lavapaase, nemen gat mita bulu do miba tong lavanga salai la mina vaase xereva. Se at loxonaleng na vot tinimi do ri vaase, ne Moroa axa naba raba nimi mi levelinga kusu mina vaase asu i, 20 mila levelinga mina vaase i kopmen atnimi axa; ketla Loroonan Kaala at ne Moroa, ne Temen nimi naba paase asuusu i at levenngusno atnimi.

21 Lara koeton axa diba etaba tuntuna mi luvutneton di ri lanmet; la luvuttemen laxamdak diba etaba tuntuna mi laxamdak la laxaalik atdi; la laxamdak mi laxaalik dibang tonga xepe levelinga at luvuttemen di mi luvutnen di la diba lok li di at lanmet. 22 Limixin axap diba belemamao nimi mila mi mumu asu ia. Ketla lara do i tu lolos keneng at levesongsongot ise at laxavaxap ap mo levenaleng, ne Moroa naba lox arooro i. 23 Do dina lox asongot nimi at tara temenemen, mina sixiro uto at tara temenemen petpes. A tong tuturun i rinimi do nenia, Laradi Mevana, anaba vot la kovisi mi noxo lok axap lugugu atnimi ap mo laramenemen at lenep silok Israel.

24 Kopmen tamdak loklox ase na silok ti leeme loklox ase ren; kopla tasaxaruki na silok ti laradi gomgo ren. 25 I epovo do lamdak loklox ase na ngan mun leeme loklox ase ren; la lasaxaruki na ngan mun laradi gomgo ren. Mo do limixin dina so asen laamgomgo at lixitkis koetemen mi ne Belsebul, diba so asen gilipu levenasen atdi axap di nemen keneng ap mo loogu mi levenasen kapmek!”

Nemen Mita Marat At Limixin

(Lu 12:2-7)

26 La ne Iesu ga lok bok keretna, “Nemen gat mita marat at limixin di munepen minimi; mila levenai mo nga di se bopbop li i, naba men at lasaxaven, la lempanga sai mo dik lox alipe, naba ravasu at lasaxaven la limixin axap dibaklen i at laaleng ete. 27 Levenai nia a paase xusuk nimi min at lamain, mina vaase i at lemeren limixin axap. La levenai miga ronga i, aga vaase nemnem i rinimi, mina tu ro vana at lempatlak gu la mina tong asu i ri limixin axap. 28 Nemen mita marat atnedi dip sev amet labantuxu, ketla kopmen dina epovo ri sev amet loroonan; kusuk mun minak marat at ne Moroa, neni i ruuna lolos kusu ri sev amet labantuxu la na riki loroonan at laradi uto at lemenemen songsongot. 29 I epovo do mina un kaka tegepu natdik mi tegesuxuven peni mene; ketla kopmen tara atdu noxo met gamasa la ne Moroa xopmen naklen i. 30 La tinimi, lengkabinim at lempatlak atnimi ne Moroa iraklen axap pam i. 31 Kuren la nemen gat nemi mita marat; nemi mi nunuan aleng at lemeren ne Moroa!”

32 La ne Iesu ga lok bok tidi, “Nege do i tong asu i do neni laradi mumu asu ia, ro melamgo at limixin axap; at laaleng ete, anaba tong asu bok neni ro melamgo at lemeren ne Moroa to vana at laxalibet do neni na vaxaru limixin at leete. 33 Ket do tara na sok tixirixes ia ro melamgo at limixin axap, aba sok tixirixes kepe box i ro melamgo at ne Tamak to vana at laxalibet.”

Kopmen Luruburu, Ketla Leepeseves

(Lu 12:51-53; 14:26-27)

34 La ne Iesu ga lok bok tidi, “Nemen mita nua i do nia aga vot kusu ana raba limila ri na lavatbung menemen; kopmen, a goxo vot kusu ana raba limila; ketla aga vot kusu ri lox aepeseves limixin. 35 Aga vot kusu ana lok,

‘Laxamdak temes dina munepen mi luvuttemen di, la laxaalik diba munepen mi luvutnen di. La loxoenenen diba emunepen eburu. 36 La laradi naba munepen tinotno minedi di nemen at loogu ren.’ ^b

37 Do nege i balamu aleng ne temen kopla nenen la ixo balamu aleng ia, neni xopmen na epovo do na ravasu ngan laradi rak. Do nege i balamu aleng ne nitna xopla ne nitnono, la ixo balamu aleng ia, neni xopmen na epovo do na lok ngan laradi rak. 38 Do nege i xopara na xip ka levenmumuat, i lok ngan laradi na solok ka laxaba ren la ira mumu asu ia, neni xopmen na epovo do na nemen ngan laradi rak. 39 Do nege i vara i do na ranga alis lorooro ren, neni naba sang apkav i; ket do nege i soxope lorooro ren ti lok luvukat tarak, neni naba lok kaka lorooro avolo.”

Luunun Tinedi Di Momo Ka Luvuttadi Mumu Asu At Ne Iesu

(Mk 9:41)

40 La ne Iesu ga lok bok tidi, “Do nege i seega rangarang nemi, neni i seega rangarang ia; la do nege i seega rangarang ia, neni i seega rangarang ne Moroa mo ga riki ia ude at na lavatbung menemen. 41 Do nege i seega rangarang leeme vapaase alii mila neni leeme vapaase at ne Moroa, neni naba lok ka luunun ngan at leeme vapaase alii; la do nege i seega rangarang ka laradi nunuan, neni naba lok ka luunun ngan at laradi nunuan. 42 A tong tuturun i rinimi; do nege i raba ladan mumudut ti tara atdi na limixin tarak, mila neni laradi loklok ka anasa rak, neni naba lok kaka kobot luunun teren.”