Psa 46 | MMX | STEP | Moroa ni loogu matmatkun atnedik la lolos atnedik; i gagas amisik tik lok tooro dik at levenaleng nedik ta ekip tangaarang mi levenmumuat.

‏ Psalms 46

Moroa Ik Lok Eburu Minedik

1 Moroa ni loogu matmatkun atnedik la lolos atnedik; i gagas amisik tik lok tooro dik at levenaleng nedik ta ekip tangaarang mi levenmumuat. 2 Kuren la dik ta noxo marat, keke i do lavatkangka axap nangne, la levem pattaavut na subu tup utou xopok at lebelen laras. 3 Keke i do laras na luulung aleng mi leretepit la lempattaavut nangne mumu leretepit at lara paxanao.

4 Lara ladan mo i nemen, im taba lomomo ri limixin at lemenemen silok at ne Moroa, ti loogu xaala at Leeme Avolo. 5 Moroa mo i nemen at mo lemenemen silok la kopmen tempanga noxo sele utut kepe i; atla ni naba rupot ti lok tooro mo limixin at larangubo, maxantamak suubu. 6 Limixin boro at levenbung mixin petpes dinaba rakdu mi lanmarat, levengkot silok nabangne. Moroa naba vaase butbutki, la lavatbung menemen naba sonao.

7 Leeme Silok, ni Lanaraavuk la i nemen eburu midik. Moroa at ne Jakop ni loxot loklok alipe atnedik. 8 Nemi limixin axap. Ude nimi la mina ven leveloklok Leeme Silok irak lok pam i, mina ven levempanga sangsangu ira lok pam i nade xopok at lavatbung menemen. 9 I lox axap levenesep to at levengkot axap at lavatbung menemen; im bapit levesoosoo eburu mi tevempanga sepsep, la i xotos asonao axap larapenban at laxao. 10 Moroa i lok keretna, “Lumulum! Na xap ta leesep, la mina xasep do nia ne Moroa. Nia Loorong Avolo mavana at larabung mixin axap, nia Loorong Avolo mavana at lavatbung menemen axap.”

11 Leeme Silok ni Lanaraavuk la i nemen eburu midik; Moroa at ne Jakop ni loogu matmatkun atdik.