Psa 51 | MMX | STEP | O Moroa, una lox asuusu lebelemulus taram tia, mumu nom labalamu lexen taram; una ves kepe leveloklok kakapmek tarak atla nenu u umsu mi langsangan lebelemulus.

‏ Psalms 51

Lisingising Ti Doxoma Xepe Libilinga

1 O Moroa, una lox asuusu lebelemulus taram tia, mumu nom labalamu lexen taram; una ves kepe leveloklok kakapmek tarak atla nenu u umsu mi langsangan lebelemulus. 2 Una gos kepe axap libilinga rak la una lox amaxar ia basinge leveloklok kakapmek tarak! 3 Nia ara ven kisip pam i do lavasuun teren atarak; la aklen i do nenia lavanga bilinga. 4 Nia agara lok pam libilinga ru, tu xusuk mun la aga lok lempanga ua nenu u tong i mi laxakapmek. Kuren la ik mokso do una ila mumu lorooro rak, la ik mokso bok do una tong i do nenia laradi xapmek. 5 Nia aga xapmek, tu ka xa i at laaleng diga visix ia ren; kovisi ne naga ga visix ia nia agara xapmek pam. 6 Nenu u vavara limixin kusu dina umsu mi lununuan mi levelinga ruturun taram; una suxa aumsu lodoxoma rak mi lodoxoma nunuan taram. 7 Una lok kepe libilinga rak, kusu nia aba dadat; una gos amaxar ia, kusu nia anaban bun tino ngan lusugao. 8 Nia a vara i xusu ana ronga limixin dina lok momo mi leklek; keke i do ugara lox asi vam ia, la uga lox amenemen pam lodoxoma rak, nia anaba momo manga. 9 Una vampe luxatli ram kusu unoxo ven libilinga rak, la una ves kepe axap laxakapmek tarak. 10 O Moroa, una lox amaxat labalak, la una lox aumsu lorooro rak mi lodoxoma maxat mo ik mokso. 11 Nemen gat uta sok gingin kepe ia, la nia ana nemen paxalom basinge u; nemen bok uta lok kepe Loroonan Kaala ram basinge ia. 12 Una raba amlong manga ia mi nom lomomo at loklok arooro ram, la una lok lodoxoma rak kusu ana vavara ri ronga res taram. 13 Melemu nia anaba lox ase limixin kapmek mi leventaangas taram, la dinaba rem gili bilong mu u. 14 O Moroa, una lok tooro ia xusu nia a noxo met la una lox asepsu ia basinge laniu; la nia anaba tong asu ba loklok manmanton taram mi lomomo. 15 Leeme Silok, una lok tooro ia ri paase asu levelinga ram, la nia anaba emi asu minu. 16 Nenia aba lok amomo ba u xereva, atla nenu xopmen una vavara ri levelaplavang? La kopmen bok una lok momo mi levempanga di kotos asonao i ru. 17 O Moroa, a lox akalik ia la a nemen maxopok taram; nom i ni laramtaba rak tu. Nia aklen i do, nenu uxo epovo una sok sisixe laradi i lox akalix i maxopok taram la i ven kibis libilinga ren. 18 O Moroa, una balamu limixin me Saion la una lok tooro di; una ii aurut amu levenngas uat to Jerusalem. 19 Kuren la unaba lok momo mi levelaplavang atnema manaba xotos axav i ru kerekngan uga tong i; la leven bulumaxao temes manabap lavang min tu rovana at loxonin laplavang.