Psa 59 | MMX | STEP | O Moroa, nenu ne Moroa rak. Una lox asepsu ia basinge limixin di munepen minia; una rupe ia at mo limixin di lok do na sep amer ia.

‏ Psalms 59

Lisingising Ti Loklok Aratao

1 O Moroa, nenu ne Moroa rak. Una lox asepsu ia basinge limixin di munepen minia; una rupe ia at mo limixin di lok do na sep amer ia. 2 Una lox asepsu ia basinge di nom limixin kakapmek, la una lok kaka amlong ia at leven tikngen di nom limixin sepsev amet.

3 Pen ba i, di kuxut ngais ia kusu dina sev amer ia; na limixin esep di vot buru kusu dina esep eburu minia. Kopmen dola nia aga lok taxakapmek kopla aga lok tavanga goxo nunuan, 4 la kopmen bok do at tosoogong tarak. O Leeme Silok, dit pas soso uto at levengkot alipe kusu dina kuxut tia. 5 Leeme Silok, nu Lanaraavuk. Una ronga ia; ude u la una lok tooro ia; Moroa at limixin me Israel, nenu xa una ven ba loklok at lavamolon. Una beleku kaxat la una lox asongot di; nemen gat uta belemumu nedi di raba arulu limixin axa atdi.

6 Dimlomlong at levengkantino bungbung main uto at lemenemen silok, la dip kup saasa ngan lubungman, do dit pas saasa go. 7 Una ronga ba lavapaase aksaksa la levelinga xikiilu atdi. Leven gam atnedi i lok ngan lemparise esep keneng at levenngusno atnedi; ketla dim doma i do ne Moroa kopmen nang tonga di.” 8 Ketla Leeme Silok, nenu ung longon atnedi, u lok kalise mun di lavamolon.

9 O Moroa, nu Lanaraavuk tarak; nia a nuunu saga at lolos taram. Nenu mun loxot loklok alipe rak. 10 Moroa rak i balamu ia, la naba lox asepsu ia basinge limixin munepen minia. La ni naba keke ia kusu anaba ven i na sak tup midi. 11 O Moroa, nemen gat uta sev amet di, kusu limixin tarak dina ven mo levesongsongot dinap kiv i la di noxo domampe nom levempanga. Una sak epeseves di mi lolos taram la una sak tup midi. O Leeme Silok, nenu Lurutu See Pe atnema. 12 Laxakapmek i nemen mene at levenngusno di; levelinga axap atnedi i lok kapmek. I lox avukat do dina onon at larapelixo mumu latlas atnedi. Di paase xapmek la di xaxarang; 13 kuren la una sele utut kepe di mi lebelemamao ram, una sele utut kepe axap di, kusu limixin axap dinabaklen i do ne Moroa ni lamgomgo at leme Israel. La im gomgonga limixin axap at na lavatbung menemen.

14 Limixin munepen minia dimlomlong at levengkantinao bungbung main la dip kup saasa ngan lubungman; la dit pas saasa ro at lemenemen silok. 15 Di lok ngan lubungman dik sixit pupuse panga anan, la di booro do kopmen dina anan mais. 16 Ketla nia anaba vixan loxompixan i tong asu lolos taram; amisik at leven maxantamak suubu anabak pixan asu labalamu lexen taram. Nenu u lok ngan loxot loklok alipe rak, la u kua pe ia at levenaleng mo do nia a ekip tangarang mi levenmumuat.

17 Nia anaba emi asu minu, nenu lentupe rak.

Ne Moroa, neni loxot loklok alipe rak, ni ne Moroa i balamu ia.