Rev 12 | MMX | STEP | Lara loklok katling silok ga ravasu to vana at lamavangkap. Lara latkin ga rupot, laxangking ga itis i ngan lisingsigaara ren, la lagaaling gak lok to maxopok at luxangkedek teren, la ni ga siga lasangaun mi legepura larapenti ro at lavatlak teren ngan lavatbungorong.

‏ Revelation of John 12

Latkin La Ne Satan

1 Lara loklok katling silok ga ravasu to vana at lamavangkap. Lara latkin ga rupot, laxangking ga itis i ngan lisingsigaara ren, la lagaaling gak lok to maxopok at luxangkedek teren, la ni ga siga lasangaun mi legepura larapenti ro at lavatlak teren ngan lavatbungorong. 2 Neni ga balan madak, la ga auret ta do na visik, la losongsongot teren ga lolos la neni ga reng. 3 La lara loklok katling bok ga ravasu to vana at lamavangkap. Lara langsangan lavattulaava memele ga rupot. Ni ga ruuna lavanuti lempatlak la lasangaun lempatkom, la lavanuti lempatbungorong gak lok at nom lavanuti lempatlak teren. 4 Latketke ren ga rev asi lenep sepsev avantun at larapenti boro vana at laxalibet la ga lu asi midi ude xopok at lavatkangka. La na lavattulaava ga tu to melamgo at nom latkin kusu neni na anan lamdak teren do ni na visik asu i. 5 La neni ga visik lamdak temes, mo naba lok tatao limixin axap at na lavatbung menemen la loklok tatao ren naba lolos aleng. Ketla ne Moroa ga lok ka mo lamdak uto vana at loxonin orong teren. 6 La mo latkin ga sixiro uto at lamatbin at lara loxot ne Moroa ga lox agagas li i, la neni ba lok tatao i go at legesa abin sangsangaun kobot mi legepu sangaun kobot mi lavanna sangaun (1,260) aleng.

7 La lara leesep ga xatu kaxat to vana at laxalibet. Mikael, lara laangelo gomgo eburu mi lubungangelo teren diga esep eburu mi nom lavattulaava; la nom lavattulaava eburu mi lubungangelo ren diga esep tangarang di. 8 Ketla ne Mikael eburu mi lubungangelo ren diga sak tup mi mo lavattulaava, la neni eburu mi lubungangelo ren goxopmen bok ba toxot tidi xusu tik lok to vana at laxalibet. 9 La ne Mikael eburu mi lubungangelo ren diga lu asi mi mo lavattulaava eburu mi lubungangelo ren. Neni lavattulaava me gaxatnak, luasen teren ne Devel la ne Satan, mo i sasar asoogong limixin axap ti laxapmek; nedi diga lu asi midi ude xopok at na lavatbung menemen.

10 La aga ronga laxaka linga silok to vana at laxalibet ga lok keretna,

“Mo nga loklox arooro at ne Moroa la lololos teren eburu mi Linintoo ren naba ru asaxaven. La na nga Lanarong teren naba lox asuusu lololos teren to xopok at lavatbung menemen; mila ne Satan mo ga tu ro melamgo at ne Moroa xusu neni na babala raba luvutneton dik at levenaleng kangking la kanimin. La lubungangelo at ne Moroa digara lu asi vam min uto xopok. 11 La luvutneton nedik dira sak tup pam mi ne Satan mila diga nuunu at lada at Lanasip la at lempapaase ruturun at ne Moroa, mo levelinga diga tong asu i la di goxo marat mi lorooro atdi, diga gagas kusu dina met. 12 Kuren la mina momo, nemi limixin mik lok de vana at laxalibet. Ketla naba lolos aleng tinedi limixin di nemen to xopok at lavatbung menemen la to saparap laras; mila ne Satan ira si vam saparap nimi la i musak aleng tinotno, mila ikleklen i do neni noxo nemen abao ro xopok.” ^a

13 Nom lavattulaava ga ven kibis i do lubungangelo diga lu asi min ude xopok at lavatbung menemen, la neni ga xala mu mo latkin, no ga visik mo lamdak temes. 14 Ketla ne Moroa ga raba nom latkin mi legepu vapa at lamalom silok kusu rin ti rava basinge mo lavattulaava la uto at lamatbin. Mo go ne Moroa ga lox agagas li vam loxot tin, kusu ni bak lok tatao i go at lavantun mi loxonatat levenmaares. 15 La ladan sen silok ga rem sobang su boro at lungusno at lavattulaava, kusu ladanut naba suxu xepe nom latkin la na sev amer i. 16 Ketla lavatkangka ga lok tooro nom latkin, la lara lamamara ga rem suang la lavatkangka ga xanom mo ladan silok ga sixisu boro at lungusno at nom lavattulaava. 17 La melemu mo lavattulaava ga musak teng aleng mumu nom latkin, la ni ga vas kaxat basinge i, la ga onon uto at lenep petpes kusu na esep eburu mi livipisik li at nom latkin; nedi mo ding tonga res at levelinga at ne Moroa la di nuunu at levempapaase ruturun at ne Iesu. 18 La mo lavattulaava ga tu ro loxon at lisigege at laras.