Rev 19 | MMX | STEP | Melemu at nai, aga ronga laxaka linga atnedi buaang limixin to vana at laxalibet, digap kup lolos keretna, “Ata emi asu mi ne Moroa, neni Leeme Loklox Arooro atdik, la i ruuna lisisixam la lololos teren i silok aleng,

aAis 34:10

‏ Revelation of John 19

Ata Emi Asu Mi Ne Moroa

1 Melemu at nai, aga ronga laxaka linga atnedi buaang limixin to vana at laxalibet, digap kup lolos keretna,

“Ata emi asu mi ne Moroa, neni Leeme Loklox Arooro atdik, la i ruuna lisisixam la lololos teren i silok aleng, 2 mila lodoxoma ren ti raba limixin mi levesongsongot ik mokso aleng la i ruturun. Moroa ira lok li vam lumumuat at latkin ngarangat, mo ga lox abilinga limixin at na lavatbung menemen mi loklok ti elongka. La ne Moroa ira vorang pam laxakapmek ap mo latkin ga sev amet lavasaxaruki at ne Moroa.”
3 La digap kup bok,

“Ata emi asu mi ne Moroa. Neni ga sele utut lemenemen Babilon la lusuxa ren i urut uto vana la mo laxao noxo xap.” ^a

4 La mo legepu sangaun mi lavanuet loxongkulao amgomgo la lavanuet levempanga rooro diga xis tiktikbu mi lempatgulom atdi la diga lotu parap ne Moroa. La diga lok,

“I ruturun, ata emi asu mi ne Moroa.”
5 La nia aga ronga laxaka linga ga laa boro at loxonin orong at ne Moroa la ga lok keretna,

“Ata emi asu mi ne Moroa. Nemi lavasaxaruki ren, la nemi mi lok ngangao ren la nemi limixin gamasa la nemi limixin silok, mina emi asu mi ne Moroa.” ^b

Loklox Epot At Lanasip

6 La aga ronga laxaka linga at limixin buaang ga ninni ngan ladan silok i sesen lolos la ga lok ngan bok leretepaavat boro vana at laxalibet i tit; la mo laxaka linga ga ravasu xeretna,

“Ata emi asu mi ne Moroa, mila Leeme Silok atdik ne Moroa, neni i silok aleng la naba nemen amisik ngan lamgomgo at lempanga axap. 7 Ata momo la ata sosoro la ata emi asu min, mila laaleng loklox epot at Lanasip mo ia vot ta la loono rin mo nga ira gagas li vam i. 8 La ni ira lok ka vam labantamon avukat in bun aleng, in tanan la im games aleng.”
Na labantamon bunbun i ru katling leveloklok nunuan at limixin at ne Moroa.

9 La mo laangelo ga lok tia, “Una malagan i na, ‘Luvukat tinedi limixin ne Moroa ba xup ka di ri leluxa at loklox epot at Lanasip.”

La ni ga lok bok tia, “Anai, ni levelinga ruturun boro at ne Moroa.”

10 Nia aga ronga i na la aga xis tiktikbu mi luvatgulom tarak to saparap luxangkedek teren kusu ana lotu parav i, ketla ni ga lok tia, “Nemen gat uta lotu parav ia. Nenia lasaxaruki mun at ne Moroa kerekngan nenu eburu mi luvutnetam, mo mim tebeng levelinga ruturun at ne Iesu. Una lotu parap ne Moroa. Mo levelinga ruturun ne Iesu ga tong asu i, ni lavasuun at levempavang at luvuttadi vapaase asu levelinga.”

Laradi Ruturun Gat Kis At Lavaros Bunbun

11 La nia aga ven laxalibet ga rem suang la aga ven lara lavaros bunbun. La mo laradi gat kis go mavana ren, laasen teren, ne Luruturun. Lodoxoma ren ik mokso la kerepmo neni laradi ing tonga linga la ik paxaru kaxat levenesep. 12 Luxatli ren i soosoo ngan laxao i ngangao, la ni ga xua buaang lempatbungorong to at lavatlak teren. La lara laasen ik lok teren la kopmen teta naklen lavasuun teren, ketla neni xusuk mun iklen i. 13 La mo lavanga singsigaara ren i umsu mi lada la laasen ap mo laradi ne ‘Levelinga at ne Moroa.’ 14 La limixin esep boro vana at laxalibet di mumu asu i, dit kis at lemparos bunbun la di sigaara mi levesingsiga i nunuan la in bun aleng la i dadat. 15 Lavarise sengsen i sixisu boro at lungusno ren kusu ri sak tup minedi limixin at levennep silok. La neni naba lok tatao di ngan lamgomgo atnedi, la loklok tatao ren ba lolos aleng. Neni naba lox asuusu lebelemamao silok at ne Moroa i lolos aleng. 16 La lara langas linga ik lok to at lisingsigaara ren la to bok at laaon teren; nom langas linga i lok keretna, “Loorong Silok mavana at lavaorong silok la Leeme Silok mavana at lavaeme silok.”

17 La nia aga ven lara laangelo ga tu ro mavana at laxangking. La ni ga xup lolos ti lavapixa axap dip tava de vana at lamavangkap keretna, “Ude nimi la mina vot buru ri langsangan leluxa at ne Moroa. 18 Ude nimi la mina anan levenbaaxin at lavaorong silok la luvuttadi amgomgo at limixin esep, la levenbaaxin at luvuttadi lolos, la levenbaaxin at lemparos eburu minedi limixin dit kis teren, la levenbaaxin atnedi limixin sepmus eburu mi limixin saksaxaruki, la atnedi bok limixin gamasa la loxongkulao silok.”

19 La aga ven bok lavatpanga sio eburu mi lavaorong silok at na lavatbung menemen eburu mi limixin esep atdi, diga vot eburu xusu dina esep eburu mi nom laradi gat kis at lavaros bunbun la limixin esep teren. 20 La nedi diga ranga alis lavatpanga sio eburu mi leeme vapaase alii xaxarang, mo gak lok lempanga sangsangu ri sar asoogong limixin kusu dina lox asilok laasen at lavatpanga sio. Ni ga lok mo lempanga sangsangu xusu na bala arup buaang nedi limixin la diga ruuna ka loklok katling at lavatpanga sio la diga lotu parap lavatpoovo vanga ren. La diga lu arup mi lavatpanga sio la leeme vapaase alii xaxarang, move duga rooro, ro at lemet kao, mo i tos amisik mi lasalpa. 21 La mo lavarise sepsep ga sixisu boro at lungusno ap mo lara gat kis at lavaros bunbun, la ga sep kutkut axap limixin esep at lavatpanga sio. La lavapixa axap diga anan tino at levenbaaxin atdi.