Romans 12
Lorooro Xeneng At Lugugu At Ne Moroa
1Luvutnetak mi luvurinuk. I vasuun mun at lebelemumu silok at ne Moroa rinedik, kuren la a sing nemi xeretna; mina raba axap nemi ngan laramtaba i rooro ri ne Moroa ri lok lugugu ren la ti lox amomo i. Neni na langas i lox asuusu lotu ruturun, mina raba i min. 2Nemen gat mita reven seo at laxaloklok at na lavatbung menemen, ketla mina ke ne Moroa na lox ekun levendoxoma atnemi mi lodoxoma ren kusu miba ravasu ngan luvuttadi maxat at levempanga mik lox i, la minaba epovo ba xusu mina long lenget ka lodoxoma at ne Moroa ri levempanga i lox avukat la ik lox amomo i la ik mokso.3La mumu mun letaba nabalamu at ne Moroa ria, a vaase i na rinemi axap keretna; nemen gat nemi miguta mi aurut nemi do mi silok ti mo lentaba vetpes, ketla mina viila mumu avukat lorooro atnimi la mina ven nimi do lunuunu atnimi i epovo mun mi lodoxoma at ne Moroa tinemi xuren. 4Nedik di ruuna levenasen kot axap at labantuxu atnedik, la mo levenasen kot axap di ruuna levenasen gugu vetpes. 5I lok ngan pam nedik axap na nedik di buaang, ketla nedik di lok ngan legesa bantuxu mene xeneng at ne Karisito la nedik dik lox eburu ngan levenasen kot axap at legesa bantuxu mun. 6Nedik di ruuna leventamtaba vetpes; kuren la nedik atana gugu mi leventamtaba vetpes atnedik i ngan letaba nabalamu ne Moroa ga raba nedik min. Do laramtaba atnedik ti paase levelinga at ne Moroa, ata lox epovo i ngan lunuunu atnedik di ruuna i xuren. 7Do laramtaba atnedik tik lok tooro, atak lok tooro. Dola ti lox ase, atak lox ase. 8Mo dola ti paase tooro lentaba vetpes, ata lox epovo box i xuren. Mo dola tim taba, ata raba solo mi lempanga atdik; mo dola ti lok tatao limixin, ata lok tatao avukat di; mo dola ti belemumu leventaba vetpes, ata lox epovo i mi lomomo.
Labalamu
9Nemen gat miguta voovo mene i do mi ruuna labalamu, ketla mina balamu rinotno limixin axap. La mina sok tixirixes kepe leveloklok kapmek, la minam tebeng alolos at leveloklok avukat. 10Mina balamu rinotno leventaba vetpes i ngan loxoeton tinotno xeneng at ne Karisito, la mina lolos amisik kusu ri lox asuusu loklok ngangao atnimi ti leventaba vetpes. 11Mina gugu lolos, la nemen gat migutak molo. Mina gugu taba Leeme Silok mi lebelen nimi la lodoxoma axap atnimi. 12Lodoxoma voovo atnemi na umsu mi lomomo. Minak lok atnaasan at levenaleng mi ekip tangarang mi levenmumuat, la mina ngising amisik. 13Mina lox epovo lavakpakes at limixin at ne Moroa, la mina lok maraose mi limixin petpes.14Mina ngising ne Moroa xusu neni naba lox anarong nedi di raba nemi mi losongsongot la nemen gat mita tong taba di mi lasaxaek. 15Mina lok momo minedi di momo la minang teng buru minedi ding teng. 16Mina nemen eburu mi limixin axap at limila. La nemen gat mita xip aurut axa nemi, ketla mina siam kaka leven gugu ik lok kopok. Nemen gat miguta doma i do lakleklen atnimi i volo aleng.
17Do tara na lok laxakapmek tinemi, nemen gat miguta vorang i mi laxakapmek. Mina lok tong pen tinotno i xusu mina lok levempanga ik mokso ro melamgo at limixin axap. 18Mina lok lempanga avukat i epovo atnimi, kusu minabak lok at lenmila eburu mi limixin axap. 19Larapen tangas tarak, nemen gat miguta belemamao kaxat kusu ri vorang tavanga, ketla mina ke xepe ne Moroa na lok asuusu lebelemamao ren; atla Lovoang Kaala i vaase i xeretna,
“Leeme Silok ne Moroa i vaase xeretna, ‘Nenia anaba ru kun la ana lok lugugu rak, la nenia anaba lok lovoporang at levempanga.” a
20Ketla nemi mina lox i ngan Lovoang Kaala i tong box i xeretna,
“Dola taradi munepen atnemi na roxo, mina raba luxa i; do neni na minu, mina raba i mi taxadan tin; la mo do mina lox i na loklok, i ngan ta do mim subunga li laxao liplivi ro at lavatlak teren.” b
21Nemen gat miguta ke xepe laxapmek na sev asi nemi; ketla mina sev asi laxapmek mi loklox avukat.
Copyright information for
MMX