Rom 15 | MMX | STEP | Nedik lunuunu atnedik i lolos, ata xip tooro nedi dixo lolos mi levenaknixip atnedi. La nemen gat dik guta doma xusuk mene nedik la ata lox amomo dik.

cLen 32:43

eAis 11:10

fAis 52:15

‏ Romans 15

Mina Momo Mi Leventaba Vetpes La Kopmen Do Nemi Axa

1 Nedik lunuunu atnedik i lolos, ata xip tooro nedi dixo lolos mi levenaknixip atnedi. La nemen gat dik guta doma xusuk mene nedik la ata lox amomo dik. 2 Ketla ata lox amomo luvutneton nedik la ata lok tooro di, kusu ri lox aru alolos lunuunu atnedi. 3 I ngan ne Karisito goxo momo axa min. Ketla loklok teren i lok ngan Lovoang Kaala i tong i xeretna,

“Levelinga xapmek atnedi diga tong asu i ru, ga subu mavana rak.” ^a

4 Levempanga axap ik lok at Lovoang Kaala, diga malagan i gano xusu ri lox ase nedik, kusu nedik ataba lok kaka lodoxoma voovo xeneng at Lovoang Kaala mo im taba dik mi loklox atnaasan la lavapaase tooro.

5 La a vara i do ne Moroa at loklox atnaasan la at lavapaase tooro na raba bok nemi mi luruburu xantubu atnemi xa na ngan langas ne Iesu Karisito gara lok pam i, 6 kusu minaba ruuna mun legesa doxoma la nemi eburu minaba emi asu mi laasen at ne Moroa la neni ne Temen Leeme Silok atnedik ne Iesu Karisito.

Lagale Lavavang Ti Limixin Kopmen Di Me Judaia

7 Kuren la mina esiam ela xaka atnaasan nemi getgesara, i ngan bok ne Karisito gara siam kaka vam nemi kusu mina lox asuusu leemi asu ri ne Moroa. 8 Nenia a tong i rinemi do ne Karisito i lok ngan lasaxaruki at leme Judaia kusu ri lox asuusu i do ne Moroa neni i ruturun mi levelinga ren la ti lox asorun bok levengkakaape at ne Moroa eburu mi loxongkulao silok me gano, 9 la ti lox avolo limixin kopmen nedi me Judaia xusu dina epovo ri emi asu mi laasen at ne Moroa mumu lebelemumu ren. I ngan Lovoang Kaala i vaase i xeretna,

“Ni lavasuun teren la anaba tong loklox avukat tu xantubu at limixin kopmen di me Judaia, la anak pixan ti emi asu mi laasen taram.” ^b

10 La i vaase bok keretna,

“Nemi limixin kopmen nemi me Judaia mina momo eburu mi limixin at ne Moroa.” ^c

11 La i vaase bok keretna,

“Nemi axap limixin kopmen nemi me Judaia, mina emi asu mi Leeme Silok, la limixin axap dinak pixan emi asu bok min.” ^d

12 La ne Aisaia i vaase bok keretna,

“Lara at livipisik li at ne Jesi naba vot; la neni naba ravasu xusu ri lok tatao limixin kopmen nedi me Judaia, la dinaba lok li levendoxoma atnedi ren.” ^e

13 A ngising do ne Moroa at levendoxoma voovo axap, na suxa aumsu nemi mi lomomo la limila mumu lunuunu atnemi saparav i, kusu levendoxoma voovo atnemi naba su silok eburu mi lolos at Loroonan Kaala.

Levelinga Loklox Alolos At Ne Pol

14 Luvutnetak mi luvurinuk. Nenia a suma rinotno i dola nemi mi umsu mi luvukat, la mi umsu bok mi lakleklen, la mi epovo xusu mina elox ase ela. 15 Ketla keneng at na lovoang a malagan levelinga lolos kusu ri lox axasep levendoxoma atnemi ri levempanga nenia agara vaase vam nemi min. Nenia a epovo ri paase lolos tinimi mila gano ne Moroa ga raba ia mi na lugugu, 16 i ngan laradi gugu at ne Iesu Karisito ti gugu ri limixin kopmen nedi me Judaia. A vavang mi Lagale Lavavang boro at ne Moroa ngan lamaasa, kusu ne Moroa naba siam kaka limixin kopmen di me Judaia ngan laramtaba at Loroonan Kaala ga gagas min tin.

17 Nenia at kis esogo eburu mi ne Iesu Karisito, kuren la nia a epovo xusu ana momo at lugugu rak ti ne Moroa. 18 Anaba paase xusuk mun at levempanga ne Karisito gara lok tooro vam ia min la ti lam kaka limixin kopmen di me Judaia xusu dina ronga res at ne Moroa xeneng at levelinga rak la leven gugu rak, 19 la keneng bok at lolos at leveloklok katling la levempanga sangsangu, la at lolos at Loroonan Kaala. La at lempatpas tarak boro Jerusalem uto Ilirikam la mo levenmenemen kantubu, agara vaase asu avukat pam Lagale Lavavang at ne Karisito. 20 Lodoxoma amisik tarak kusu ana paase asu Lagale Lavavang to at levenmenemen di goxovisi gita ronga ka na Lagale Lavavang, kusu a noxo ru mun pana at lugugu laradi vetpes gara lok pam i. 21 I ngan Lovoang Kaala i vaase i xeretna,

“Nedi di goxo tong i ridi, dinaba ven kibis i, la nedi di goxovisi gita ronga i, dinabaklen i.” ^f

22 Neni lavasuun teren la buaang levenaleng nenia goxo epovo agita vot saparap nemi.

Lodoxoma At Ne Pol Kusu Tit Pas Uto Rom

23 Ketla amo ba ara lox axap ba lugugu rak at na levenmenemen, la agara vavara amisik at laxanmaares kusu anabat pas la ana ven nemi. 24 La a doma i do anaba lox epovo ba i mo. A vara i do anaba ven nemi at loxonaleng nenia ana lok lavatpas tarak uto Spein, la minaba lok tooro box ia rit pas ugo melemu at loklok tarak eburu minemi at lentaba levenaleng. 25 Ketla amo nga, anat pas be uto Jerusalem kusu ri lok lugugu at ne Moroa xeneng at limixin teren go. Nia anabat pas ugo, 26 atla limixin at ne Moroa boro Masadonia la boro Grik di vara i xusu dina raba leventamtaba loklok tooro atnedi ri limixin banbalo dik lok kantubu at limixin at ne Moroa ro Jerusalem. 27 Nedi xa diga doma i do dina lox i, atla di suma i do diga lok kaka laxaloklox anarong solo xeneng at Lagale Lavavang ga ravasu at levenngusno at limixin nuunu boro Jerusalem. Kuren la limixin kopmen nedi me Judaia di doma i do di gugu porang ti leme Judaia mi leveloklox anarong at labantuxu. 28 Do ana lox epovo axav i na la ana raba axap levempilas diga gagas li i xusu rinedi, ana gagas ba rit pas uto Spein, la ap mo lavatpas tarak uto, anaba ven ba nemi. 29 Do nenia ana vot posiga nemi, aklen tinotno i do anabat pas eburu mi loklox anarong silok tinotno at ne Karisito.

30 Luvutnetak mi luvurinuk, a sing nemi xeneng at laasen at Leeme Silok ne Iesu Karisito la labalamu at Loroonan Kaala im taba i. A vara i xusu mina lok tooro ia mi levesingising ti ne Moroa ri loklok tatao ren tia. 31 Mina ngising ti ne Moroa xusu neni nabak lok tatao ia at lavatpas tarak keneng at limixin dixo nuunu dik lok keneng at lenep Judaia, la lugugu bok tarak keneng at lemenemen silok Jerusalem kusu limixin at ne Moroa mego dinaba siam kaka i. 32 Kuren la nenia anaba vot pasa nemi mi lomomo, do lavavara at ne Moroa xuren, la anaba lok kaka lolos eburu bok minemi. 33 A vara i do ne Moroa at limila nak lox eburu minemi axap. I ruturun.