‏ 1 Chronicles 12

Benjamin hani dabe te Devitgo ami bidi dabe pedelali

1Te Sol, Kisgo ogwa, agai te Devit pobeasa bilibo sę ebaso, Devit pelama, te taun Siklakba bidigi pali. Devit te Siklakde bidibadi, tama te bomai ami bidi dabe meba aga dali bidagasali. Tama augwaligo aga te boi hwįbo tau siyu bidalio. 2Augwaligo te enesigigo ene enebo me te katapel tiwai naigo enebo mu konea pai bidi dabe da, te augwaligo dolo nogo badu enebo me pobase nogogo enebo te mu koneai baso tagala wali. Tama augwali te Benjamin hani bidi, Sol te hanidu bulasa asai dao.

3Augwaligo polalubo ofisa bidi, te Ahieser. Te aga ama, Joas, aga te tomo bidi da. Augwali si te Semago ogwa, te Gibea taun bidi. Te gasa bidi dabe nogi e tiwai elalubao, Jesiel me Pelet, te bidi si Asmavetgo ogwa, te Beraka, me Jehu te Anatot taun bidi da, 4te Ismaia te Gibeon taun bidi. Ismaia te bidi sese deli olama nogo si 30 te Devitgo ami bidi dabede polalubo ofisa bidi da, tama aga te wiegi yai ami bidi mu da. Te Benjamin hanide te gasa bidi dabe augwali nogi e tiwai elalubao, Jeremaia, me Jahasiel, me Johanan, me Josabat, aga te Gedera taun bidi me deli dao, 5tama te Elusai, me Jerimot, me Bealia, me Semaria, me Sefatia, te Harip bulu bidi da, 6tama Elkana, me Isia, me Asarel, me Joeser, me Jasobeam, augwali te bulu Kora bidi da, 7tama Joela me Sebadaia, te Jerohamgo ogwa si, te Gedor bulu bidi dao.

Te Devitgo ami pedelali te Gat dabego nogi dabe

8Te Devit te geme duala sabo bomai bulu te tǫ wa pai bulude bidali sogo, te Gat hanigo bomai ami bidi mebago Sol tagalama, te Devit dali bidagasalio. Te bidi augwali te wiegi yai ami bidi dabe mu te sabele tulama, te sesemone enego enebo mu koneai. Te augwali boi hwįani sogo, augwa gesabi mu tuluga sali, te wi meni yai hasa laiongo gesabi tiwai yali. Tama augwa umagia mu udayu, te bulu dude bidibo uni hasa udabo tiwai yalio.

9Augwa nogi e tiwai elalubao. Hasia polalubo bidi Eser, namba 2 Obadia, namba 3 Eliap, 10namba 4 Mismana, namba 5 te Jeremaia, 11te namba 6 Atai, me namba 7 Eliel, 12namba 8 te Johanan, te namba 9 Elsabat, 13te namba 10 te gasa Jeremaia, te namba 11 Makbanai dao.

14Te Gatgo hani augwali te Devitgo ami polalubo ofisa bidi pedelai. Augwali te wiegi yai ofisa dabe mu da. Te boi bidi dali augwaligo hwįbo sogo, te augwali gasa me badugo te bidi sese nogo a naga 100 bidi aiyaba elalueibao, te gasa me badu augwaligo te bidi sese hauwa 1,000 boi bidi ela mubo dao.

15Te ami dabe augwaligo tama te wę Jordan asali genuai mu te ąį asobo dąį ela holai mu elalubadi, te kibu be me deli te polua deli wabode, te sogo te ąį nogealio. Te sogo augwaligo te ąį pąde te giliga asobo badu me giliga dega sabo badu tede bidali we bidi augwali dali boi hwįgi pali. Tama te we bidi augwali wi tedela sanama pela silai dao.

Te Benjamin hani me Juda hani augwali te Devitgo ofisa polalubo bidi pedelali

16Me sogo deli te gasa Benjamin hani me te Juda hani te bidi meba pelama, te Devit geme dualalubo bomai buluba sugi palio. 17Devitgo augwali dali deliba gesabi hanilibo sogo, agai augwaliba te po wali, “Te dage abagi tiwai homu elama, ena tau sainu asali wida, teda ena wiegi yai pemene eyu dagego abagi pedelaibao. Tiali digi eno dwai sę deli me ebeo, tama tialima dagego ena te eno boi bidi dabe nogoba muabo homu ebaso da, teda dena wąį nǫų dabego Godigo koneaibao, te agai dage po tų ilaibao, magi baso meni, eno dage dolo sę me ebeo,” Devitgo te po wai dao.

18Tialima, Godigo Mobo Noma Bidi te Amasaiba pedelali, te augwali me deliba, tama Amasaigo Devitba te tama po wali, “Devit, te Jesigo ogwa, da te nago hani bidabo homu ebao. Te naga Godigo nage tau sobaso, tama nage dali, te nage tau sabo hani dabego dali te sesemane sogo ugwaba ela holama te bugagia bidaibao,” wali. Tialima Devitgo augwali selama, tama augwali te agai ami dabego ofisa dabe pedelai. Te nosali, Amasai te nogi yai 30 bomai ofisa bidi dabe tomode aga te polalubo ofisa bidi pedelai dao.

Te Manase hani bidi meba te Devitgo ofisa bidi pedelali

19Devit te Filistia dabe dali pelama, te Sol dali boi hwįgi painu yali sogo, te Manase hanigo ami bidi mebago te Sol tagalama, te Devit dali bidigi pali. Tialima, Devitgo te Filistia dabe tau sabeo, magi baso meni, te Filistia kingo te Devit aga hani dabe dali sela sąwani. Augwaligo aga sela sąwani, magi baso meni, augwaligo koneani, polobadu Devit te Solgo sę bidi bidai, te augwa wi elama te homu yali, tiyu te hwįbo sogo Devitgo te Solgo hani tau selama, te Filistia dabe ela muidali da homu yali. Tibaso, te king dabe augwa po mia selama, te Devit aga tagala palai dao. 20Tama Devit te aga bidali taun Siklakba ma soali sogo, te Manasego ami hani bidi aga dali soalio. Augwa nogi e tama da, Atna, me Josabat, me Jediael, me Maikel, te me gasa Josabat, me Elihu, me Siletai. Te Manase hanigo amide augwali te bidi sese hauwa te 1,000 amigo ofisa bidi bidai dao. 21Te bidi dabe augwali te polalubo ami dabe mu tama Devitgo augwali agai amide te ofisa dabe pedalumainu ilali. Tama augwaligo Devit tau selama, te hwįyu nai wi siyu ebo bidi hani dabe dali boi hwįai dao. 22Tama tigidali side te bidi hauwa te Devitba asesa aselama, te agai ami pedelainu yali. Tialima agai ami bidi hani te genuai mu pedelai.

Tigidali Israelgo Devit tau selama te king pedalumainu yai

23Devit te Hebron taunde bidibadi, tama te ami bidi hani hauwa agaba aselama, aga te Israel king pedalumainu ilama te Solgo pesage hasegelimainu yali, te Genuai Bidigo wali po tiwai gilama yai. Augwaligo te augwa boi hwįbo doado bage dali sesalio. Te asali bidi dabego namba e tiwai dao.

24Te Juda hani ami bidi dabe bidi sese umabo te 6,800 ami bidi bidali, te augwa boi hwįbo sabele dabe me te bobage sesemone ene dali sesalio.

25Te Simeon hanigo ami bidi dabe te bidi sese hauwa mu te 7,100 ami bidalio. Augwali te boi hwįbo mu konea pai wiegi yai ami bidi dabe dao.

26Te Livai hanigo ami bidi sese umabo te 4,600 ami bidi elaluai. 27Te Jehoiada te Aron hanide tobolu bidi dabede te bidi sese umabo bidi mu te 3,700 ami bidi bidalio. 28Tama me Sadok, te gesi ogwa bidi me deli te wiegi yai ami bidi, aga deli hani te 22 bidi dabe dali asalio. Te bidi dabe augwali te ami ofisa bidi dao.

29Te Benjamin hani da, te augwali Solgo deli hani dabe da, augwaligo ami bidi dabe te bidi sese umabo mu 3,000 bidai. Hasia mu te hani bidi hauwa te Sol wali pali, tiali goli megi da augwali te Devitba asalio.

30Te Efraim hanigo bidi hauwa umabo mu te 20,800 ami bidi bidali. Augwali te wiegi yai ami dabe mu, te augwa deli hani tomode digi te genuai nogi elalualio.

31Te Manase hani me badu pedai te giliga dega sabo badu bidibo hani bidi, te bidi sese umabo 18,000 ami bidi bidai. Te augwa hani dabego digi augwali te Hebronba pelama, te Devit king pedalumainao po obaso, te augwali dąį ilibaso pai dao.

32Tama Isakar hanide te ofisa bidi te 200 bidi dali te Isakar hani ami tigidali badi te augwali dologode bidali. Te ofisa dabego homu kolesaga wiegi yai elalu, te mena tiwai nai pedalubo page me koneani, tama te Israel dabego mena tiwai sę yabo me koneai silai dao.

33Tama te Sebulun hani bidi dabe te bidi sese umabo hauwa mu te 50,000 dwagi yai ami bidi bidali. Augwa te Devit deli naga tau sabo homu kolesaga naga elaluai. Tama augwa te tobage boi hwįbo nai doado bage dabe dali sesu asalio.

34Te Naptali hanide te ofisa bidi dabe te bidi sese umabo te 1,000 bidi elalu, te ami bidi te bidi sese hauwa me 37,000 bidi bidali. Tama augwa te boi hwįbo sabele me bobage sesemone ene dali sela asalio.

35Tama te Dan hani bidi dabe te bidi sese hauwa 28,600 ami bidi bidali. Tigidali sogo augwaligo te boi hwįabo sisi elalu bidalio.

36Te Aser hani bidi dabe te bidi sese hauwa mu te 40,000 ami bidi bidali. Tama tigidali sogo augwaligo me te boi hwįabo sisi elalu bidai dao.

37Te Ruben hani me Gat hani me te Manase hani pedai te giliga asobo badu te wę Jordan badu bidali, augwali te hani dabe, te bidi sese umabo mu te 120,000 ami bidali, te augwa boi hwįbo te tobage nai doado bage dali sesalio.

38Te ami bidi dabe augwaligo te augwa boi hwįabo nai dabe dali seseyu, te Hebronba sabolalio. Augwaligo deli homu naga elaluali, te tigidali Israel pedai badu te Devit king pedalumainao homu naga yali. Te tigidali gasa Israel dabego me te tobage deli homu naga yai dao. 39Te bidi dabe augwali Devit dali te Hebronde bidali. Te augwa abagi dabego augwali nai hauwa sisi ilali, tama augwa genuai nai daa sela sogo usu nama tuai dao. 40Te tigidali tǫ pedai badu te tigidali Israel, te Isakar me Sebulun me Naptali te hani sela bidibo te not badu usu nama sisinama, te wiegi yai pemene umabo mu eyu, tama augwa te haniani nai sibi te Hebronba sisinibo sę yai. Augwaligo te plaua hauwa badi, te duani wain wai du dabe me, te ni fik kaya te augwaligo olali me salio, te hauwa wain me oliv wel sobadi yali. Augwa te nai dabe te donki dabeba, me kamel dabeba, me bulmakau dabeba ugwadu munama sesalio. Tama augwa te we bidi dabego tuabo bulmakau me sipsip dabe me sesai dao.