1Ch 18 | MPS | STEP | Me sogo nosali, Devit dali aga ami bidi dabego dali te Filistia dabeba boi hwįgi pali. Augwaligo te Filistia dabe aiyaba elaluama, tama augwaligo te taun Get dali, te pąde elaluali bulu dabe dali sai dao.

a[1 Kin 7:40-47; 2 Sto 4:11-18]

b[Tib 60 Tobolu pode]

‏ 1 Chronicles 18

Devitgo te boi bidi dabe aiyaba elaluali

(2 Sml 8:1-18)

1 Me sogo nosali, Devit dali aga ami bidi dabego dali te Filistia dabeba boi hwįgi pali. Augwaligo te Filistia dabe aiyaba elaluama, tama augwaligo te taun Get dali, te pąde elaluali bulu dabe dali sai dao. 2 Tama nosali, Devit dali, te aga ami bidi dabego dali te Moap dabeba boi hwįgi pelama, augwali me aiyaba elaluai. Tama te Moap dabe aga dologode bidiyu, te agaba takis mone madu geai dao. 3 Tama nosali, Devit aga ami bidi dabe dali augwa te Hadateser dali boi hwįgi pali, aga te Soba king bidi da. Soba te Siria hani dabego tǫ kantri me deli da, tama te tǫ kanrti Hamat pąde elaluai. Te sogo Hadatesergo aga ami bidi dabe selama, te wę Yufretis u badu pedai badu pabo sę yali, te boi hwįnama te tǫ sai hagede yali. Tama Devitgo hanigo augwali dali deliba gesabi unulama, 4 te boi hwįani digi augwali aiyaba elaluali. Tama Devitgo te Hadatesergo ami bidi dabe umabo salio. Agai te 20,000 ami bidi sobadi, te hosde dugulama hwįbo ami bidi umabo te 7,000 bidi sali. Tama Devitgo te hwįbo karis bidi sese umabo te 1,000 sobadi, te hwįbo karis kekebo hos 100 salio. Tialima Devitgo te gasa hos dabe sągą meba dolai madi te augwali bomona pabo usu isąwai.

5 Te sogo te Siria dabe te bulu taun Damaskusde bidali, augwali hogodama peyu, te king Hadateser tau selama te boi hwįani. Tialima, Devit te aga ami bidi dali augwaligo te Siria ami bidi umabo te 22,000 bidi ela muanio. 6 Tama Devitgo aga ami bidi hani dabe meba te tǫ kantri Siriade muani, te augwali tonalu, te augwaligo boi ma hwįdali weyu yalio. Te Siria dabe aga dologode bidu, te Devitba takis mone manio. Te tigidali habuba Devitgo boi hwįgi pabode, Genuai Bidigo aga tau sobaso, te agai bomo ugwanu mu yai dao. 7 Tama Devitgo suali, te king Hadatesergo ami polalubo ofisa dabego te hwįbo sabele dabe augwa te golgo nigai sela asali. Tama agai te wiegi yai sabele dabe selama, tama augwali te Jerusalemba odasa palio. 8 Tama me, agai te bras hauwa te taun Tiphat me taun Kunde sali, te taun si te Hadatesergo taun da. Nosali, Solomongo te bras dabego te Godigo tempel bede muabo nai dabe nigainu salio, te genuai ąį tank me te bobobage pos si, te dis dabe me plet dabe, te tama nai nigalio. ^a

9 King Toi te tǫ kantri Hamat bidigo odali, te Devitgo te king Hadatesergo ami bidi dabe aiyaba elaluali po odai, te Soba taun king dao. 10 Tama tialima, Toigo aga ogwa Hadoram tagala palalio, aga gasa nogi me Joram, te king Devit bidibo madiba pelama, Devitgo te king Hadateser aiyaba elaluali po obaso te agaba wiegi yai homu pemene ebo weyu siade da po wagi pali. Tama me, Toigo te Devitba wiegi yai homu ilibo nai tolali. Augwaligo te wiegi yai homu ebo ilibo nai te gol me silva me brasgo nigai. King Toigo te Devitgo te king Hadateser aiyaba elalualide wiegi yai homu pemene yali, magi baso meni, hauwa sogo Hadatesergo Toi dali boi bidi yai dao. 11 Devitgo te Toigo wiegi yai homu eyu mani nai dabe agai te Genuai Bidiba dąį ilama manio. Agai te tobage deli kolesaga te agai gasa boi bidi dabe elaluama sali silva me gol te Genuai Bidiba naga mawai, te Idom dabe, me Moap dabe, me Amon dabe, me Filistia dabe, me Amalek dabe, te hani augwali Devitgo aiyaba elaluai dao.

12 Tama nosali, Abisai, te Seruiago ogwago, te Devitgo ami bidi dabe selama, te Tamu Hauwa Elalubo Odogo Bulude bidibo Idom dabeba boi hwįgi pali. Tama augwaligo te bidi sese umabo te 18,000 Idom bidi dabe ela muai dao. ^b 13 Tama Abisaigo te Idom bidi hani dabe tonaluabo ami bidi dabe meba muani, tama te Idom dabe augwali Devit dologode bidalio. Te Devitgo boi hwįgi pabo tigidali habuba, te Genuai Bidigo aga tau sobaso, aga ugwanu igulama elaluai dao.

14 Devitgo te tigidali Israel habu badu tonalu, te wiegi yai doloba pai kolesaga tigidali we bidiba yalio. 15 Joap, te Seruiago ogwa, te ami bidi dabego augwa polalubo ofisa bidi bidali. Te Jehosafat, te Ahilutgo ogwa, te polalubo kuskus bidi bidiyu, te gavmango buku dabe tonalubo bidi bidai dao. 16 Te Sadok dali Ahimelek si, augwali si pris bidali. Sadok te Ahitupgo ogwa. Te Ahimelek te Abiatargo ogwa. Tama Savsa te kingo sę ebo kuskus bidi bidai. 17 Te Benaia, te Jehoiadago ogwa, agai te king Devit seselalubo ami dabe tonalubo ofisa bidali, te augwali Keret me Pelet hani dabe da. Tama te Devitgo ogwa dabe augwali te gavmande genuai bidi naga bidai dao.