Exodus 32
Augwaligo bulmakau wai te golgo nigali
(Bom 9:6-29)
1Te Moses te Sainai bulu duba holama, tama bobage sogo bidali, tama aga gesege mu yali, tama aga polo me asobeo. Tama te we bidi augwali te Aron pageba sisinigi pelama, agabolo te po wai, “Te magi nai te bidi Mosesba pedelali, te dago konebeo, te bidigo da te Isipde selama, tama da odasa eba asai. Tama nago god me deli nigilama, tama pabodu polasa peyu, tama da tųdu odasa pomainogo yaibao.” Augwaligo te po wai. a2Tialima, Arongo augwalibolo te po wai, “Dagego duga we dabego olode walalubo gol, me duga wai dabego olode walalubo gol me sesa pelama, tama selasa aselama, enabolo magasao.” 3Arongo te po obaso, te we bidi dabe augwa olode walaluali gol dabe pepede pelama, tama sela aselama, agabolo magasai. 4Tama agai augwaligo te olode au yali gol dabe selama, tama ulama, tama te ąį tiwai pedelai. Tama agai te tǫde dedage me deli augwaligo te bulmakau noma tiwai nigilama, tama te ąį tiwai pedelai gol teba gelama, tama te bulmakau tiwai pedelai. Tama agai hwą ge selama, te golgo nigai bulmakau noma bugagia dodolai. Tama nosali te we bidi augwaligo te po wai, “Odiąo! Te nai aga da Israel bagego god dao. Agai da Isipde selama, tama da odasa eba asai dao,” wali. b
5Arongo te tebo sulama, tama agai te bulmakau pąde te alta sai me deli nigai. Tama agai te po wai, “Do da, dago Genuai Bidibolo genuai nogi mayu, genuai nai tueibao.” 6Tialima, te sogo nosali kigamu mu, te we bidi dabe augwaligo te ofa eyu, te siaba ulabo kibu bulmakau dabe sela asali. Tama augwaligo homu kolesaga deliba naga muainogo te ofa yabo kibu sipsip dabe me sela asai. Tama augwaligo te nai tuyu, te bomai wę tuyu elama, tama nosali te bidi dabe augwali pelama, te we dabe dali gagali igi pai. c
7Tama Genuai Bidigo Mosesbolo te po wai, “Nage polo e bulu dude bidali tagalama, aba dulao. Te naga Isipde odasa asali we bidi dabe augwaligo dwai kolesaga hauwa megi ebao. 8Tama eno po weyu, augwalibolo te wali pao wali tų polo geda munama, tama augwaligo te bulmakau wai te golgo nigilama, tama agabolo lotu po weyu, tama agabolo ofa ilibao. Tama augwaligo te po wai, ‘Odao,’ wali, ‘te aga dago god dao. Agai da Isipde selama, odasa asai dao.’ Te po megi obao. 9Tama ena God eno te we bidi augwali eno koneanio. Augwali da, te hagoma mu ebo we bidi dao. 10Te eno augwali dali sębę mu elama, tama eno augwali mu dolaibao. Tama nago ena me togolamuo, mu menio. Tama nosali eno nage me, te naga hani ogomani dali, augwaligo te Israel bage hasegelama, tama genuai we bidi hani mu pedelaibao.” Te po wai.
11Tiali goli, Mosesgo te Genuai Bidigo homu bea sainu, agai bomonama gedu haluasa po aga Genuai Bidi Godibolo e tiwai po wai, “Genuai Bidio, tiyu nago sębęgo naga we bidi augwali dolomainogo sula tagalamuo. Nago te we bidi augwali te Isipde te nago naga genuai bomogo digi te augwali selama, odasa asai dao. 12Ma, nago te tiwai kolesaga augwalibolo ebaso da, teda te Isip dabego te po waibao, ‘Godigo aga we bidi augwali dali dwai homu yai. Tama tibaso, augwali agai te Isipde selama, tama augwali odasa asali, te augwali te bulu dude mu dola silama, tama tigidali ela muani da,’ te po wabuo. Tiali goli, Genuai Bidi, tagalao. Tama nago te sębę yali homu te nago tagalama, tama nago homu kolesaga hasegelama, tama te we bidi augwali nago me dolamu dao.” Mosesgo te po wai.
13“Nago naga sę bidi Abraham, me Aisak, me Jekop, te homugo koneao. Tama nago te bomo yai po augwali dali dąų wali po, te homude koneao. Nago bomo yai po dąų mu weyu, e tiwai po wai, ‘Eno mu po obao, eno te dagego wąį nǫų dabe te dagebolo hauwa mu, te hǫ tiwai dageba mawaibao. Tama eno po dąų weyu, te eno dagebolo mawaiba wali te tǫ, teda te tǫ te eno duga wąį nǫų dabe augwaliba mawaibao. Tama augwali sesemane sogo mu te tǫde bidada paibao,’ nago te po wai.” d 14Tama Mosesgo te tiwai gedu haluasa po obaso, tama Genuai Bidi aga homu ma hasegelama, tama aga te we bidi dolainu yali nai te aga we bidiba me tagala palobeo. e
15Tialima, Moses te bulu dude bidali tagalama, tama aba duliyu, te Godigo bomo yai po asęani te masigi pedai si sela dulai. Godigo po te masigi si te si dali si badu te po asęai dao. 16Godigo digi te masigi si nigilama, tama te masigi side te bomo yai po asęani, te bugagia ma dodolama todogo pai.
17Tama Josua te Sainai bulu dude a badu gana Moses asobo tonaluyu bidali. Tama Moses teba dulama, tama augwali si aba pidubadi, tama Josua agai te we bidi dabe augwaligo te i wabo po daga agai odai. Tama agai Mosesbolo e tiwai po wai, “Ae, Moses! Eno te we bidi bidibo madi te wąbi hwįyu kulukulu wabo odalio.”
18Tiali goli, Mosesgo te po wai, “Menio. Te bidigo wąbi hwįbo te aiyaba elaluyu, i wabo te tiwai me ebeo. Ma, te wąbi hwįbode te bidi dabe aiyaba elalubaso, te gela wabo tiwai menio. Eno te tęąbi wabo dogoni naga odobao,” wali.
19Tama Moses te we bidi bidibo pesage pąba sabolama suali, te bulmakau gol, me te we bidi augwali tęąbi idubo suali, tialima tama aga sębę mu yai. Tama agai te tolasa asali te masigi si, agai te bulu du pageba sąnama, tama te masigi si pepeda pai. 20Tama Mosesgo augwaligo te nigali bulmakau selama, tama siaba ulai. Tama te gol ąį tiwai pedelama, tama nosali kedau elama, dila saide, agai te hamago haluama, te olo pauda tiwai pedelai. Tama agai te pauda gol te pabo ąįba sąwai. Tama sąsą bila silama, tama Mosesgo te tiwai ilama, te Israel dabe augwaligo te ąį tumainogo yalio. 21Tama agai Aronbolo te po hanalu wai, “Te e we bidi augwaligo magi sę nagebolo ebaso, tama nago augwaligo te dwai kolesaga mu emainogo sula tagalaliwe?”
22Tialima, Arongo po wei ponoyu, te po wai, “Genuai bidio, nago ena dali sębę igio. Nago te we bidi hani augwaligo ebo kolesaga koneai dao. Augwaligo dwai kolesaga yainogo bomo mu ebo dao. 23Tama augwaligo enabolo e tiwai po wai, ‘Dago te bidi Mosesba magi nai pedelali, te dago konebeo, te bidigo da Isipde selama, tama da eba odasa asai. Tama da te pabo tųde polasa pabo god me deli nago nigao.’ 24Eno odolama, tama eno te gol olode elalubo we bidibolo te po olama, tama augwaligo te gol pedelama, enabolo mao wai. Tialima, augwaligo enabolo mawai, tama eno te gol te siaba ulalio. Tama polo te bulmakau wai aga digi odolali pedelalio,” Arongo te po wai.
25Mosesgo koneani, te we bidi augwaligo dwai kolesaga subigila emainogo yali, tama Arongo augwali dąų wabo usu ebeo, te homu yali. Tama agai te homu yai, tiyu augwa boi bidi dabego augwali sulama, tama posobo po me gisugu maidali, te homu yai. 26Tama tibaso, Moses pelama, te obo tųba doligi pelama, tama te tiwai i wai, “Te mena bidigo te Genuai Bidi wali paiba wida, teda te bage te ena bidibo madi asao.” Tialima, te Livai hani bidi tigidali augwali aselama, aga pąba dolagasai.
27Tama agai augwalibolo te po wai, “God, te da Israel bagego Genuai Bidigo te po wai, ‘Dage tigidaligo te bobage ge hwą selama, tama te u bidi dabe bidibo madi te pesageba pelama, tama te tibo god wali pabo bidi dabe ela muao, te ama, me te abagi dabe, te dage dali pąde bidibo bage, te dao,” wali. 28Tama te Livai dabe augwaligo te Mosesgo wali po selama, te tiwai sę yai. Tama te sogo naga augwaligo te bidi sese umabo bidi dabe, 3,000 mu ela muai dao. 29Tama Mosesgo te Livai dabe augwalibolo te po wai, “Megi dagego te bidi dabe augwali ela muani, te wai dabe me, te duga ama dede dabe, augwali meba da, te duga wai dabe, ama dede dabe, tiali digi augwaligo dwai sę ebaso, dagego augwali ela muani. Tama dagego te kolesaga yaligo naga, dage te Genuai Bidigo pris dabe tau sabo bage pedelaibao. Tama tiyu, megi Genuai Bidigo wiegi yai sę dagebolo ilaibao,” wali.
30Tama nosali sogo Mosesgo te we bidi augwalibolo te po wai, “Dagego te yali sęgę, te Genuai Bidi bidibo madi te bulu duba ma holama, tama eno agabolo te dagego sęgę sela sągowe naga, te eno agabolo hanalua sueibao,” wali. 31Tialima, Moses te bulu duba ugwa holama, tama Genuai Bidibolo te tiwai po wai, “Homu dene mu ebao. Te e we bidi augwaligo te genuai sęgę sabo sę mu yalio. Augwaligo te tibo god me deli nigilama, tama augwaligo lotu po agaba wai dao. 32Tiali goli, megi eno nagebolo hanalu obao, te nago homugo augwaligo sęgę sela sąyąbo homu ebaso da, teda nago augwaligo sęgę sela sąyao. Ma, nago hagela homu ebaso da, teda eno nagebolo te po hanalu waibao, te nago naga we bidi augwali nogi asęai elalubo bukude te eno nogi asęai elalubo, te deli naga te sela sąyagameo.” Te po wai. f
33Tiali goli, Genuai Bidigo Mosesbolo te po wai, “Menio. Eno te dwai sę yali we bidi augwaligo nogi naga te eno sela sąwaibao. 34Tialima, megi nage pelama, tama te we bidi augwali selama, tama eno nagebolo te po wali te buluba pao. Odao, eno Ensel Mobo Bidigo dage te pabo tųdu odasa paibao. Tiali goli, nosali da, te dene mabo sogo ena asiyu, tama te dwai sę yali we bidi augwali eno dene mu ilaibao,” Genuai Bidigo te po wai.
35Tialima, Genuai Bidigo nosali genuai gasi dwai me deli te bidi dabego dwai sę yali wei ponoyu, tama te gasi augwaliba tagala palai. Magi baso meni, augwaligo po bomo yai Aronbolo olama, tama agai te bulmakau wai te golgo nigai dao.
Copyright information for
MPS