‏ Ezekiel 36

Godigo Israel dabe dali wiegi yai sę yaibao

1Genuai Bidigo ena dali e tama po wali, “Tǫde bidio, nago te Israel dabego bulu du dabebolo eno augwalibolo wainogo ebo te poba bugagia olo saganama odao po walao. 2Ena God Genuai Bidi, eno e tama po wainu ebao. Te Israel dabe augwaligo boi bidi dabego e tama po wai dao, ‘Wiegi yai mu dao. Megi da, te genuai bulu du dabe dago bulu du dao,’ wai.”

3“Tama tialima, nago ena God Genuai Bidigo e po pusao, ‘Te gasa hani bidigo dage Israel dabe dali hwįagasai dao. Tama te kantri tigidali badu mu tama dolama, tama te dagego kantri sai dao. Tama augwaligo te kantri Israel dwai po walama, tama augwaligo posobo po walai dao. 4Tama tialima, dage Israel dabego bulu du dabe, me malu bulu dabe, dagego ena God Genuai Bidigo po odao. Tama me dage dolali taun dabe, me te meba gasa te kantride bulu dabe, dagego me odao, te dage boi bidi dabego dolali bulu dabe, dagego odao.’ Te po pusao,” wali.

“‘Eno koneani, te dage pąde elalubo kantri bidi dabego dage dali dwai sę elama, tama dage dali posobo po wai dao. 5Tama tialima, God ena Genuai Bidi ena haliga sębę posolo tiwai eyu, eno bomai po te kantri Idomba, me kantri dage pąde elalubo, te kantri dabeba te obao. Augwaligo homugo ena te olo nai dao tiwai homu elama, tama augwaligo eno tǫ sainu homu mu gana pai dao. Magi baso meni. Augwaligo te tǫ me badu te augwaligo kau kibu dabe me sipsip kibugo nosai tede tumainao homu yali. 6Tama tialima, tǫde bidi, nago eno e tama po pusa mao. “Dage te Israel tǫde elalubo bulu du dabe, me odogo malu bulu dabe, dagego odiąo. Ena God Genuai Bidi, eno te meba gasa kantri dabe dali sębę dwai mu ebao. Magi baso meni, augwaligo dage dali hale yabo po wai dao. 7Tialima, ena God Genuai Bidi, eno mu po mu te obao, eno te kantri dabe aiyaba elaluama, tama augwali hale ilaibao. 8Tiali goli, te ni dabe te dagego bulu du dabede ma holaibao. Tama augwaligo yabe hauwa solama, tama augwali du hauwa walaibao. Dwasianu sogo mu tama, eno we bidi dage Israel dabe dage te kantri Israelba ma asaibao. Tama dagego te wiegi yai ni du dabe tuaibao. 9Eno dage bulu du dabe dali wiegi yai sę yaibao. Tama tialima, eno te Israel dabe augwaligo dagede gi dabe ma emainu yaibao. 10Tama eno Israel we bidi hauwa mu pedelemainu ilama, tama augwali dagede bidimainu yaibao. Tama augwaligo te taun dabe ma geseleyu, me te boi bidi dabego dolali bulu dabe ma dodoliyu yaibao. 11Tama te we bidi dabe me dagede bidibo hasa dabe hauwa mu pedelaibao. Tama te we bidi tigidali pesage badu polobadu bidali yali gilama yaibao, tama eno dage dali wiegi yai kolesaga mu yaibao. Tama te kolesagago da, eno polobadu yali kolesaga edelama mu yaibao. Tama dagego bugagia mu koneaibao, ena deli naga ena Genuai Bidi dao homu yaibao. 12Tama eno ena we bidi Israel dage bulu du dabede bugagia bidimainu yaibao. Tama dage augwaligo tǫ elaluaibao, tama augwaligo te tǫ augwa wai dabebolo nosali mawaibao. Tama dagego te Israel dabego wai bǫų dabe munu me ma dologobeo.” Te tama po te bulu du dabe dali, me odogo malu bulu dabebolo tama pusao,’ ena Genuai Bidi eno te po obao,” wali.

13“Ena God Genuai Bidi, eno te po te obao. Te we bidigo te po wabo dao, ‘Dago kantri tǫgo te bidi dabe siliyu, me te wai bǫų dabe doliyu ebo dao,’ po wabo dao. 14Augwaligo te tama po obao, tiali goli, ena God Genuai Bidi eno te po obao, dage bulu du dabego Israel dabe dali dwai sę ma elamo dao. 15Tama te gasa meba hani bidigo posobo po olama, tama dage Israel dabego bulu du hale me iligobeo. Tama dage bulu du dabego eno we bidi dwai sęde me tulalumainu iliyu me egobeo. Ena God Genuai Bidi, eno po polo walio,” te po wai.

Godigo Israel we bidi gesi we bidi pedelemainu ilaibao

16Genuai Bidigo enabolo po ma weyu, e tama po wali, 17“Tǫde bidi, te Israel dabe augwa tǫde polobadu bidali sogo augwaligo dwai kolesaga meda yai mu yai dao, tama augwaligo te tǫ dolai dao. Tama augwali eno gedude meda yai mu bidai dao, te we me aga poluago elai we tiwai ąǫ yai dao. 18Augwaligo bidi hauwa mu elai dao. Tama augwaligo tibo god dabeba lotu olama, tama tebogo augwaligo kantri Israel eno gedude meda dwai mu pedelai dao. Tama tibaso, eno augwali dali sębę genuai mu elama, tama eno augwali dene genuai mu mawai dao, 19te augwaligo tigidali dwai kolesaga dabe wei ponainu. Tama eno augwali gasa kantri dabeba sela sąwai dao. 20Te gasa meba hanigo Israel dabe augwali tomode dwai mu bidalubo suali. Tama te tialigo eno nogi aiyaba elalualio. Tama te hani augwaligo homugo ena olo nai dao homu yalio, tama augwaligo te po wabo dao, ‘Te Israel dabe augwali te Genuai Bidigo hani dao. Magi baso augwaligo agai tǫ taga soaliwe? Te agai augwali tau sabo usu isąbaso yali, agawe?’ 21Eno te po dabe te Israel dabe pali bulu tigidalide wabo eno odali. Tama eno homugo tiali tiyu, te hani augwaligo eno nogi aiyaba elaluidalio,” wali.

22“Tama tibaso, eno homugo Esekiel, nago eno te po Israel dabebolo pusa mao, ‘Ena God Genuai Bidi, eno po te tama te wali dao. Te gasa meba hanigo dage augwali tomode bidibo sulama, tama augwaligo eno nogi aiyaba elaluali. Tama tialima, eno te megi yainogo ebo sę dabe te eno dage Israel dabe kone palama, me yainu ebeo. Eno dage tobade te sę egobeo. Menio. Eno ena genuai nogiba kone palama, tama eno nogi tobade eno te sę yaibao. 23Tama tialima, eno te gasa meba hani e tama kolesaga ola mawaibao. Te eno kolesaga wiegi yai doloba pai mu dao olama, ola mawaibao. Tama augwaligo enabolo genuai nogi mawaibao. Dage Israel dabego dagede te hani bidigo megi eno nogi aiyaba elalubao. Tiali goli, eno dage tau sabo sę bomai mu ebo si da, te gasa meba hanigo sulama, tama augwaligo te e tama koneaibao, ena tedali gasagi yai dao, tama eno kolesaga wiegi yai doloba pai te yabao olama, koneaibao. Tama augwaligo e tama bugagia koneaibao, ena deli naga te Genuai Bidi dao homu yaibao. Te da God Genuai Bidi eno po dao.’ Esekiel, nago te po pusao,” wali.

24“Nago te eno po me augwalibolo pusao, ‘Eno dage dali yabo sę po da, e dao. Eno dage te bidibo te kantri sese tamade oda selama, tama dage duga tǫ muba ma odasa asaibao. 25Tama eno wiegi yai meda meni yai ąį selama, dage tigiba gelaibao, te dage eno gedude wiegi yai ma pedalomainu. Awe, eno dagego dwai damua pai kolesaga, me dagego tibo god dabe me sela sąwaibao, tama dage eno gedude wiegi yai pedelaibao. 26Tama eno dagebolo gesi kolesaga me gesi homu mawaibao, te eno poba begi pabo homu kolesaga dao. Polobadu dagego tobolu te masigi tiwai dila pai dao. Tiali goli, eno te dwai homu kolesaga sela sąnama, tama eno dagebolo gesi homu kolesaga mawaibao. 27Tama eno dagebolo ena mobo bidi dagebolo mawaibao, tama aga dagego homude bidaibao. Tama eno dage homu hogodolama, tama dagego eno bomai po, me eno gasa po wali bugagia pomainu ilaibao. 28Tama dage eno duga wąį dabebolo mani te tǫde bidaibao. Tama dage ena we bidi dolo mu pedelaibao, tama ena dagego God mu bidaibao. ^a 29Tama eno dage tau selama, tama dagego dwai meda yai kolesaga munu ma me egobeo. Tama eno dagego gide dabe nai dabe hauwa holomainu ilaibao. Tama te ni du walobo ni dabego te ni du dabe hauwa mu walaibao. Tama tiyu, dage nai me habuge me egobeo. Tama tibaso, gasa meba hanigo dage posobo po te nai sǫą pabode me wagobeo. 31Tama te sogo da, dagego duga yali te dwai damua pai kolesaga dabe sęgę dabe kone palaibao, me te dagego yali eno godolo mu isąwai sę dabe kone paliyu, tama dage hale genuai mu yaibao.’ Te po me pusao,” wali.

32“‘Awe, dage Israel we bidi, dagego God Genuai Bidi eno po bugagia odiąo. Te sę page mu eno yainu ebo sę eno dage tobade egobeo. Menio. Eno homugo ena genuai nogiba kone palama yaibao. Tama eno te sę dabe ebo sogo da, eno homugo dagego duga yali dwai kolesaga kone palama, tama dage hale dwai mu yaibao.’ Te po wao.”

33“E po me augwalibolo pusao, ‘Ena God Genuai Bidi, eno po genina ma weyu, e tama po obao. Te eno dagego sęgę sela sąnama, tama dage eno gedude wiegi yai pedalubo sogo da, teda eno dage sula tagalama, tama dagego duga taun dabe, me duga bulu dabe bugagia ma dodolomainu ilaibao. Te boi bidi dabego dolali hanu dabe ma dodolama, tama dage te taun dabede ma bidaibao. 34Te bidi dabe dagego tǫde biliyu ebo dao, tama augwaligo dagego gi dabe dasu hola pai suyu ebo dao. Tiali goli, eno dagego te gi dabe ma emainu sula tagalaibao. 35Tama te gasa hani bidi dabe augwaligo e tama po waibao, “Polobadu te tǫ dasu hola pai goli dao. Tiali goli, megi da, te gi Iden yali gilama wiegi yai mu te ilai yabo. Tama polobadu da, te taun dabe da dolama mu elaluai dao. Tiali goli, megi da, te Israel dabe augwaligo sę ma elama, tama augwaligo deli deli taun bagulama bomai obo te ma gesela silai dao. Tama te we bidi te taunde ma te bidibao.” Augwaligo te po waibao. 36Tama dage Israel dabe duga tǫde ma bidibo sogo da, te meba gasa hani dage pąde bidibo bidi dabe auwaligo e tama bugagia koneaibao, ena Genuai Bidi ena digi te dolali taun ma nigiyu, me eno te dasu dwai mu holai gi ma eyu yai dao. Ena Genuai Bidi eno te sę yabo po dąų walaio, tama eno te tama sę yaibao.’ Te po tigidali nago te Israel bagebolo pusao,” Genuai Bidigo enabolo te po wai.

37“Ena God Genuai Bidi eno te po obao. Te Israel dabe augwaligo enabolo te augwa we bidi hauwa ilao po hanalubo sogo da, teda eno augwaligo te gedu haluasa po wabo me odaibao. 38Te augwali hauwa pedelaibao, te sipsip kibu dabe augwaligo te genuai sogo me eno augwalibolo sa muani te sogo te ofa yainu sesebo, te sipsip kibu hauwa tiwai yaibao. Tama te Israel dabe augwa ma te nigali te taun dabede bidigo pągąna paibao. Tama te sę dabe pedalobo sogo da, teda augwaligo e tama koneaibao, ena deli naga ena Genuai Bidi dao homu yaibao,” wali.