Eze 40 | MPS | STEP | Te da kalabuside bidibadi kibu be 25 wabode, tama te kibu bede te dei namba 10 wabo sogo eno Genuai Bidigo bomo enaba asobo gagama yali. Te da te boi bidi dabego te taun Jerusalem selama, 14 kibu be polo pai nosali badu dao. Tama te sogo tama Genuai Bidigo ena tolasa pali.

a[Ped 21:10]

b[Ped 11:1; 21:15]

‏ Ezekiel 40

Godigo Esekielbolo nosali Israel bulude pedelabo wiegi yai nai dabe ola mani

(Dąį 40-48)

Genuai Bidigo Esekiel Jerusalemba odasa pali

1 Te da kalabuside bidibadi kibu be 25 wabode, tama te kibu bede te dei namba 10 wabo sogo eno Genuai Bidigo bomo enaba asobo gagama yali. Te da te boi bidi dabego te taun Jerusalem selama, 14 kibu be polo pai nosali badu dao. Tama te sogo tama Genuai Bidigo ena tolasa pali. 2 Tama te nade ebo sę dabe tiwai elama, Godigo ena tolasa pelama, Israel dabego tǫba odasa pelama, tama bulu du ugwanu mu yai bulu duba me tagaligi pali. Tama eno u sautba tonobadi, eno be dabe elalubo suali, tama te ma te taun me elalubo tiwai subo ąǫ yali. ^a 3 Tama Godigo ena pąba odasa pali, tama eno bidi me bidibo suali, tama aga te bras ula tiwai ebo suali. Te bidi te taun obo sunumide dolaluali, tama agai te bobobage nai usu sabo haliga bono elaluyu, me te gasa nai usu sabo ni tolaluyu, dolalubo suali. ^b

4 Tialima, te bidigo enabolo e tama po walali, “Tǫde bidi, eno nagebolo waselainu ebo nai dabeba bugagia mu tonaluao. Me nago odainu ebo poba bugagia olo saganama odao. Magi baso meni. Godigo nage odasa asali, te nagebolo eno te nai dabe ola momainu, tama nosali nago Israel dabebolo eno te pusa mani po pusao,” te bidigo enabolo te po wali.

Esekielgo giliga asobo badu elalubo obo sunumi suali

5 Eno Godigo tempel be suali, tama masigigo nigai genuai obogo te be bagulai suali. Tama te bidigo te usu ni sabo eno suali. Te usu ni bobobage te 3 mita usu nama elaluali. Tama agai te Godigo be bagulali genuai obo usu sali. Tama te obo bobobage ugwaba te 3 mita usu nama elaluyu, me ugwade edasi dedawali te 3 mita usu nama elaluali. 6 Tama te obogo bobobage sunumi sela elaluali. Tama te deli deli sunumi u badude te be habu dabe si badu elalua peyu, tama elaluali. Tama bidi dabe augwali Godigo beba painogo da, augwali te be habu elalubo sunumi me delidu peyu yao. Tama be sunumi tagalama, saboligi pao. Te deli deli sunumide te ugwa holoyu, eda asiyu yabo togobili te elalubao. Tialima, te usu ni elalubo bidi aga te giliga asobo badu elalubo obo sunumi badu pali. Tama te bidi aga te sunumi togobilidu ugwaba holoyu, agai te obo sunumi ugwanu dedawali usu nigo usu sesa holali. Tama dąį te usu ni da, te 3 mita usu nama elaluali. Te hasia wali sunumi dąį te 3 mita usu nama tama elaluali. 7 Te be te sunumigo talua sai elaluali. Te be sunumide te u badu me e badu te tonalubo bidi bidabo be habu dabe me elaluali. Tama bilabo sunumi bobobage te tomode elaluali. Tama te bidigo te be habu genuai me bobobage usu nigo usu sabo suali. Tama augwali sese tama deli dąį yai naga elalubo suali, te 3 mita usu nama naga, tama agai tama te be habu tomode ugwanu edanu dedawali te usu nigo usu sali. Te be habu todogo pali tomode tama te dagago genuai dąį te 2 mita me hap mita elalua pali. Te pesage te genuai be habuba deli ugwa peyu, eda asiyu ebo pesage deli tama naga dao. Tialima, te bidi aga pelama, te be habu sunumiba saboligi pali. Tama agai te sunumi sabi badu daga ugwanu edanu dedawali te usu ni sabo suali. Tama te badu te daga dąį te 3 mita usu nama elaluali. 8 Tama aga te genuai be habuba pelama, tama agai te be habu usu nigo usu sabo suali. Te be habu genuai dąį te 4 mita usu nama elaluali. Te be habu u badu te gasa sunumi me elaluali. Te sunumi te Godigo beba pabo sunumi elaluali. Tama te bidigo te be habugo sunumi sabi badu daga usu nigo usu sigi pali. Tama agai dąį te wan mita usu nama elaluali.

10 Te be tonalubo bidi dabe bidibo be habu dabe da, te 6 tama elaluali, te genuai sunumi bogo badu elalubo be habu dabe. Te me badu sela, me badu sela elaluali. Tama tigidali be habu dabe deli usu ni naga elaluali. 11 Tama nosali te bidi aga genuai sunumi dedawaliba pelama, tama agai te pesage usu nigo usu sesa bilali. Te sunumi dedawali te 6 olama hap mita tama usu nama naga elaluali. Tiali goli, augwaligo te be sunumi dabo si da, teda te dąį pąba 5 mita tamaba usu nigi pali. 12 Tama te tonalubo bidi dabego be habu gesabidi badu te pęwadage be daga ugwaba bobobage te 50 sentimita elaluyu, me ugwade eda si dedawali me te 50 sentimita tama usu nama tama elaluali. Tama te be habugo bobobage me genuai yali me te deli mita naga elaluali, te 3 mita tama naga elalua pali. 13 Tialima, te bidi aga te tonalubo bidi me deligo be habu tomoba pelama, tama usu nigo usu siyu yali. Agai te be habu tudi badu dagade gagalama, tama pelama, te soabo sunumi ela solama, gasa dolo si be habu tudi badu dagaba pelama, te usu nigi pali. Tama te tiwai usu selama, te usu te 12 mita olama hap mita yali. Te da te bego genuai dąį namba dao. 14 Tama nosali te bidigo te dedawali sabide elalubo genuai be habu usu nigo usu sigi pali. Te be habu aga bobobage da, te 10 mita usu nama dao. Te genuai be habu u badu te sunumi te Godigo be bagulai genuai sisinibo pesageba pabo sunumi dao. 15 Te genuai sunumi bulu badu gagalama, tama te dedawali usu selama, tama te sabi badu elalubo sunumiba usu nigi pelama, te usu te 25 mita usu nama dao. 16 Te tigidali be habu si si tomode te windo elalua pali. Tama te tonalubo bidi dabego be habu tudi badu daga elalua pabo, te daga dabede me te windo dabe elalua pali. Tama augwaligo te ni det noma te be dagade te windo pąde elalua pali.

Esekiel agai genuai sisinibo pesage te obo tomode suali

17 Tama tialima, te bidigo ena oda selama, tama da sigo te be habu tagalama, tama te obo tomode genuai sisinibo pesage te Godigo be bagulama tomode elalubo, teba pesageba pali. Tama eno 30 be habu te sisinibo pesagede bogo badu elalua pabo suali, te sisinibo pesage bogo badu selade naga. Tama augwali te masigigo nigai genuai oboba ugwa mu dagana sai elaluali. Tama te be habu dabe gesabidi badude augwaligo masigi du dabe wasilama, tama bilibo pesage nigai suali, agai te pedu elalubo suali. Te bilibo pesage te tigidali be habu gesabidi badu naga elalua pabo suali. 18 Te bilibo pesage aiyadu elalubadi, te Godigo be bagulai sisinibo pesage te ugwadu tama elaluali. 19 Te sisinibo pesage obogo te gasa obo me bagulai. Te da te namba 2 obo te Godigo tempel be bagulai obo mu dao. Te namba 2 obo tomode te gasa sisinibo pesage me elaluali. Tama te sisinibo pesage te ugwanu ganama elaluali. Te namba 2 obo te giliga asobo badu, te sunumi me deli elaluali. Tama te bidigo te obo si agebele tomode elaluali tǫ usu nigo usu sali. Agai te genuai obo sunumide gagalama, tama pelama, tama te namba 2 obo sunumiba saboligi pali. Tama te tǫ mita te 50 mita usu nama tama dąį yali.

Esekiel agai u not badu obo sunumi suali

Tama tialima, te bidi aga u not badu pali, 20 tama agai te not badu elaluali be obo sunumi usu nigo usu sali. 21 Te tomo habu dabe te giliga asobo badu genuai obo tomode te be habu dabe tiwai mu dao. Tama tialima, te sunumi genuai dąį te 12 mita hap usu nama dao. Tama te sunumi dedawali bobobage da, te 25 mita usu nama dao. Tama te sunumi togobili te agalama ugwaba te genuai obo tomoba pabo te a naga olama, si, te 7 te bede elalubao. 23 Te u badu not badu te Godigo be bagulali namba 2 genuai obode, te sunumi me deli elalubo. Te da te giliga asobo badu te sunumi tiwai si mu dao. Tialima, te bidigo te sunumi si agebele tomode te tǫ usu nigo usu sali. Te agai te giliga asobo badu yali kolesaga tiwai tama yali. Tama te tǫ dąį me te 50 mita usu nama tama elaluali.

Esekielgo u saut badu elalubo obo badu sunumi suali

24 Tialima, te bidigo ena u saut badu odasa pali. Tama dadi si te obo sunumide beba sabolali. Te genuai obo sunumiba tama agai te be usu nigo te be usu sali. Te be habu dabe te deli tiwai si naga elalua pali, te gasa me be si tiwai yali gilama naga elaluali. Tama tialima, te be bobobage te 25 mita elaluali, tama te aga genuai da, te 12 mita olama hap mita tama elaluali. Tama te sunumide te ugwa genuai be habuba holobo togobili te a naga olama si, te 7 agabo madi elaluali. 27 Tama te e saut badu me te 7 namba 2 obo badu te sunumi me deli elaluali. Tama te bidigo agai giliga asobo badu te yali kolesaga tiwai te obo sunumi si tomo agebele tǫ usu nigo usu sali. Tama te tǫ dąį te 50 mita usu nama tama elaluali.

Esekiel agai namba 2 obo sunumi suali

28 Tama tialima, te bidigo ena te namba 2 obo sunumi elalubo madi odasa pali, te saut badu. Tama dadi si te sunumidu tomoba pelama, te sisinibo pesage, te Godigo tempel be gesabidi badu elalubo, te pesageba saboligi pali. Tama te namba 2 obo sunumide me be elaluali. Te bidigo te saut badu te sunumi usu nigo usu sali, tama te be habu dabe sese tama te gasa genuai be habu te usu sali tiwai si tama naga elaluali. 29 Te tempel be tonalubo bidi dabego be habu dabe me, te genuai be habu me, te be habu tomode daga dabe sese tama te gasa meba be habu usu sali usu ni tiwai naga elaluali. Tama te sunumi dedawali bede me te windo dabe me elaluali. Tama te dedawali bobobage magi te 25 mita usu nama elaluyu, me ugwanu edanu dedawali te 12 mita olama hap mita elaluali. 30 Tama te be tomode te genuai be habu te si dali si badu elaluali. Tama te be habu bobobage te usu ni te 12 mita olama, ugwadu hap mita dao. Tama te be genuai ugwanu dedawali da, te 2 mita olama hap mita dao. 31 Te bede genuai be habu aga gesabidi te genuai sisinibo pesage badu elalubao. Tama te tempel be tonalubo bidi dabego be habu dabe te Godigo tempel be pąde elaluali. Tama te ni detgo piksa dabe te windo dabe pąde elalua pali. Tama te be sunumi te a naga olama sela, te 8 agabo togobili ni aiyaba te genuai sisinibo pesageba dulubo digi elaluali. 32 Tialima, te bidigo ena te giliga asobo badu te namba 2 obo tomode elalubo sisinibo pesageba teba odasa pali. Me te tonalubo bidi dabego be habu te Godigo be gesabidi badu pąde elaluali. Tama agai te namba 2 obo badu elaluali be sunumi usu nigo usu sali. Tama te be habu dabe, me te tigidali nai dabe te meba be habu dabe usu ni sali tiwai naga elaluali. Te bego genuai be habu te genuai sisinibo pesage pąde elaluali. Tama te tonalubo bidi dabego be habu dabe te Godigo be pąde tama elaluali, te Godigo be gesabidiba polobadu. Tama te ni detgo piksa noma te windo pąde dabe elalua pabo suali. Tama te be togobili te a naga olama sela, te 8 aiyaba te genuai sisinibo pesageba dulubo digi elalubo suali.

35 Tialima, te bidigo ena oda selama, tama not badu te namba 2 obo sunumi beba odasa pali. Tama agai te be usu nigo usu sali. Tama te be habu dabe usu sali, te gasa meba be habu dabe tiwai si naga elalua pali. Tama tede te ni detgo piksa noma te piksa tama elaluali. Tama te tonalubo bidi dabego be habu dabe te Godigo be pąde elaluali. Tama te be sunumi togobili te aiyaba genuai sisinibo pesageba dulubo madi te togobili ni te a naga olama sela elaluali.

Esekiel agai te ofa nai dabe dodolobo pesage suali

38 Te not badu te bede te gasa be habu me elaluali. Te be habu te genuai be habu sesege badu elaluali. Tama te be habugo sunumi te genuai be habu dedawali sunumi badu elaluali. Tama te be habude augwaligo te iside mu dela silabo ofa yabo hasa dabego mi ąįgo telabo digi dao. 39 Te genuai be dedawali bogo badu si badu te tebol sai elaluali. Te me si u badu elaluyu, me si te me badu polo badu elaluali. Tama te tebol sai dabede augwaligo te iside mu dela silabo ofa yabo kibu eleyu, me sęgę sela sąyabo ofa yabo kibu eleyu, me sęgę dabe dodolabo ofa yabo kibu dabe tama eleyu ebo tebol dabe dao. 40 Te bulu badu te genuai be habude te genuai be habu muba pabo te togobili pagede te me si me si tebol tede munaluali. Te tebol me si te togobili elalubo badu elaluyu, me si te u badu elaluyu yali. 41 Tialima, te ofa ebo kibu dabe elebo tebol te a naga olama sela, te 8 tebol elaluali. Te me si me si te genuai be tomode elaluali, tama me si me si te bulu badu elaluali. 42 Tama gasa me si me si tebol me elaluali, te augwaligo masigigo nigai. Te tebol dabe ugwaba dąį te 50 sentimita dao. Tama agai bobobage elama, genuai te usu ni da, te 75 sentimita dao. Tama te tebol daide augwaligo te sese dela ulubo ofa yabo kibu dabe elebo kągo hwą dabe tede munalubo dao. 43 Augwaligo te be habu dagade te genuai huk dabe munama bagulai elaluali. Te huk bobobage usu ni te 7 hap sentimita dao. Tama augwaligo te ofa ebo kibu mi dabe te tebolde muyu ebo dao.

Esekiel agai pris dabego be habu suali

44 Tialima, te bidigo ena te namba 2 obo tomode elalubo te bidi dabe sisinibo pesageba odasa pali, te Godigo tempel be gesabidi badu. Tama eno te balia po wabo bidi dabego be habu si suali. Te be habu me te not badu be sunumiba polo badu elaluali, tama u sautba tonoyu ebo suali. Tama me be habu te saut badu obo sunumi be sesegede elaluali, tama u notba tonoyu ebo elaluali.

45 Tama te bidigo enabolo e tama po walali, “Te not badu te elalubo be habu te Godigo be tomode sę ebo bidi dabego be habu dao. Tama te saut badu elalubo be habu te altade 46 sę ebo bidi dabego be habu dao,” wali. “Te tigidali pris dabe te Sadok hani wai, tama augwali te Livai hani dao. Te Sadok hani pris bidi dabe naga te Genuai Bidi pageba paibao, agai sę yainogo,” te po wali.

Augwali Godigo tempel beba sabolali

47 Tama tialima, te bidigo Godigo be gesabidi badu sisinibo pesage badu usu nigo usu sali. Tama te sisinibo pesage tigidali badu te deli tiwai dąį naga elaluali, te 50 mita usu nama naga elaluali. Tama te alta te Godigo tempel be gesabidi badu te sisinibo pesage tomode elaluali. 48 Te usu ni tolalubo bidi agai ena te Godigo be sunumidu odasa pelama, tama dadi si te be mabo tiwai habuba me pali. Agai te be sunumi ugwanu edanu dedawali te usu nigo usu sali. Te sunumigo bobobage tama te dąį te 2 mita olama, hap mita elaluali. Tama agai te sunumigo genuai te usu nigo usu sali, tama agai magi te 7 mita usu nama elaluali. Tama te dwasianu daga te be habu badu elaluali te daga usu ni da, te mita deli olama, hap mita yali. 49 Te sunumi dedawaligo bobobage te 10 mita elaluali. Tama agai genuai te 5 mita olama, hap mita elaluali. Tama te sunumide togobili elaluyu, tama aiyaba te sisinibo pesageba dulubo togobili elaluali. Tama te togobili bogo badu si dali si badu te genuai pos si dolaluali.