Eze 41 | MPS | STEP | Te Tedali Gasagi Yai Be Habu te be mabo tiwai be habu tudi badu elalubo. Tama te bidigo ena te Tedali Gasagi Yai Be Habu sunumiba odasa pali. Agai te sunumi usu nigo usu sali. Tama te sunumi sesegede te obo ugwanu dedawali te 3 mita elaluali.

‏ Ezekiel 41

1 Te Tedali Gasagi Yai Be Habu te be mabo tiwai be habu tudi badu elalubo. Tama te bidigo ena te Tedali Gasagi Yai Be Habu sunumiba odasa pali. Agai te sunumi usu nigo usu sali. Tama te sunumi sesegede te obo ugwanu dedawali te 3 mita elaluali. 2 Tama te sunumi aga te dedawali te 5 mita elaluali. Tama me te obo dage te bugai te sunumi habu badu gagalama, te me habuba te 2 mita me hap mita elaluali. Tama te obo dage me te be sunumi me badu pedai badu te usu ni si te tiwai si naga yali. Tama agai te Tedali Gasagi Yai Be Habu usu nigo usu sali. Tama te be habu te bobobage te 20 mita usu nama elaluyu, me te be habu genuai te 10 mita usu nama elaluali.

3 Tialima, nosali aga te Tedali Gasagi Yai Be Habu tudi badu te gasa be habu sunumi me deliba pali. Tama agai te be sunumi usu nigo usu sali. Te sunumi sesege badu obo ugwanu dedawali te wan mita elaluali. Tama te be sunumi mu da, te 3 mita usu nama elaluali. Tama te be sunumidu te obo te sunumidu gagalama, te be habuba te 3 mita olama, hap mita elaluali. Te obo me badu sunumi sesege badu te deli tiwai dąį naga elaluali.

4 Tialima, agai te be habu usu nigo usu sali. Tama te be habu tigidali pedai badu te deli tiwai dąį naga elaluali, te 10 mita usu nama naga tama elaluali. Tama agai enabolo e tama po wali, “E da te Tedali Gasagi Yai Mu Be Habu mu dao,” wali.

Esekiel agai te Godigo tempel be sesegede elalubo be habu dabe susa pali

5 Te Godigo tempel bede te Tedali Gasagi Yai Be Habu, me te Tedali Gasagi Yai Mu Be Habu, augwali si te dwasianu dwasianu be habu dabego bagua sai mu elaluali. Tama te usu ni tolalubo bidigo te be habu tomode elalua pabo obo dabe genuai yali usu nigo usu siyu, me Tedali Gasagi Yai Be Habu, me Tedali Gasagi Yai Mu Be Habu te usu nigo usu sali. Te daga dabe aiya badu te dąį te 3 mita usu nama elaluali. Tiali goli, te habu tomode me te daga tomode te dąį te deli tiwai si menio. Magi baso meni. Augwaligo te be daga bulu badu te habu sugunani si daganani. Tama te be habu dabe te sai yali selade wasilama elaluali. Te aiyadu be habu lain te aiyadu tǫde elaluali. Tama me te tomo ugwadu be habu dabe te tomo menename ni daide elaluali. Tama te menename ni te hasia manani kau ni daide elaluali. Tama te ugwadu daide te be sai ni te si wabo manani kau ni daide elaluali. Augwaligo te tobage kolesagago nigai elaluali. Magi baso meni. Augwaligo Godigo be dagade dedage nigibo hagela ebaso, te soiyame ni aiyadu be saiba muainogo. Tigidali be saide te be habu 30 elaluai. Tama aiyadu be habu dabe te 2 mita usu nama elaluali. 7 Te tomode be habu dabego te 2 mita genuai edelama elaluali. Tama ugwadu be habu dąį dabego tomode be habu dabe edelai elaluali. Tama te be tomoba holobo togobili me, te ugwaba holobo me, te togobili elaluali.

8 Te Godigo be obo genuai me te habu u badu elaluali. Te obo dedawali da, te 2 mita usu nama elaluali. Tama te obode te sunumi si te bidi dabe ugwa eda yabo elaluali. Te sunumi me te saut badu elaluyu, me te not badu elaluyu yali. Tama eno suali, te bilibo pesage te Godigo be bagulama elalubo suali. Te ugwaba genuai yali da te 2 mita olama, hap mita elaluali. Te ugwadu te bilibo te be sai te ugwaba te Godigo be habu dąį tiwai elaluali. Tama te dąį da te 3 mita usu nama elaluali. Tama te bilibo pesage aiyadu te olo pesage me elaluali, te Godigo be bagulama elaluali. Tama agai genuai usu yai te 10 mita elaluali. Te olo tǫ elalubo digi te be dabe meba te bogode elaluali.

Godigo be usu sai

12 Te giliga dega sabo badu te Godigo be tudi badu genuai be me deli elaluali. Tama agai edaba te Godigo be bagulama elalubo te olo pesage o tǫ elalubo digi edaba tonaluali. Te be bobobage te 45 mita usu nama elaluali. Tama te be ugwanu edanu dedawali te genuai te 35 mita usu nama elaluali. Tama te be daga dedawali da, te 2 mita olama, hap mita elaluali. 13 Tialima, te be tagalama, te bidigo Godigo tempel be bobobage usu nigo usu sali. Tama te dąį te 50 mita usu nama elaluali. Tama nosali agai te olo tǫ, me te giliga pabo badu te be dali si agai usu nigo usu sali. Agai Godigo tempel be tudi badu gagalama, tama te be tudi badu tagaligi pali. Te dąį me te 50 mita tama yali. 14 Tialima, agai Godigo be gesabidiba usu siyu, me olo tǫ dabe u badu elaluali, me e badu elaluali olo tǫ elalubo pesage agai usu nigo usu sali, tama te dąį me te 50 mita usu nama naga elaluali. 15 Tama agai te tempel be tudi badu elalubo be bobobage me te be habu bobobage si u badu me elaluali, te tama usu nigo usu sali. Tama te dąį me te 50 mita naga elaluali.

Esekielgo Godigo tempel be tomode be daga tigidali au yali agai suali

Augwaligo te Godigo tempel be sunumi dedawali dali, te Tedali Gasagi Yai Be Habu dali, te Tedali Gasagi Yai Mu Be Habu dali, augwali sela te dodolai masigi dabego nigai dao. Tama te be habu selago tomode elaluali be daga dabe augwaligo te ni namigo dagawani. Me te sunumi pąde elalubo daga dabede, me dwasianu windo dabede, me te be sunumi genuai pesage badu me, te ni namigo daganai elaluali. Te ni nami dabego te daga mesega sai elaluyu, te aiyadu soiyamedu gagalama, tama holama, te windoba usu nigi pali. Tama me te windo halubo ni nami dabe me elaluali. 17 Augwaligo te Tedali Gasagi Yai Be Habude augwaligo piksa togobadi, me te Tedali Gasagi Yai Mu Be Habu me ugwa badu be habu badu daga, me te be habuba pabo sunumi daga me augwaligo te piksa togwai elaluali. 18 Tama te piksa dabe te ni det piksa, me te bogo me si me si yai ensel dabe piksa dao. Tama te deli deli ensel bidigo piksa te ni det piksa tomo tomode elalua pali. Te ensel dabego gesabidi si te e tama tiwai si elaluali. 19 Te me da, te bidigo gesabidi, me te laion yowigo gesabidi elaluali. Tama te piksa sigo te ni det u badu elalubo me e badu elalubo piksaba ugwa tonoyu, edaba tonaluyu yali. Te tiwai tigi poai piksa te tigidali be daga elalubo madi elalua pali, 20 te be aiyadu gagalama, tama te sunumi ugwadu toboluba tama usu nigi pai elaluali. 21 Te Tedali Gasagi Yai Be Habu badu te sunumi pos te me si me si badu elaluali. Tama augwali dąį te deli tiwai si naga elalua pali.

Genuai Bidi pagede elalubo tebol Esekielgo suali

Te Tedali Gasagi Yai Mu Be Habu pąde augwaligo 22 ni namigo nigai alta sai elaluali. Te nai ugwa badu dąį te 1 wan mita olama, hap mita elaluali. Te nai dage badu me, bogo badu me, page badu me, augwaligo ni namigo nigai elaluali. Tama te usu ni tolalubo bidigo enabolo e tama po walali, “Te nai da, te Genuai Bidi gesabidide elalubo tebol sai dao,” wali.

Godigo be sunumi dabe

23 Te Tedali Gasagi Yai Mu Be Habuba tula pabo sunumi si elaluali. Te be sunumi si deliba ununu pelama, elalua pali. Tama deli deli sunumi te ununama, deli sunumi elalubo tiwai yali. Tama me te Tedali Gasagi Yai Be Habu badu me te deli tiwai be sunumi naga elaluali. 25 Tama te Tedali Gasagi Yai Be Habu sunumi bulu badude me augwaligo te ni det piksa, me te ensel piksa tiwai si naga togwai elaluali, te be dagade elalua pali piksa tiwai naga elaluali. Te Godigo be tomoba pabo be sunumi bulu badu mabode te be pedu dwasianu deli elaluali. Augwaligo te be pedu te ni namigo nigai. 26 Tama te be mabo u badu me, e badu me, te dagade te dwasianu windo dabe elalua pali. Tama te be mabo dagade te ni det piksa elaluali, te windo dabe bogo badu side elaluali.