Ezekiel 42
Pris bidi dabego be si
1Tialima nosali te usu ni tolalubo bidigo ena u not badu odasa pali. Tama da si te genuai sisinibo pesageba saboligi pelama, tama eno u not badu te Godigo be not badu te be me elalubo suali. Te be te Godigo be tudi badu te not badu te genuai be tudi badu pąde elaluali. 2Te be sunumi te u not badu gesabidi elaluali. Te be bobobage te 50 mita elaluyu, me agai genuai te 25 mita usu nama elaluali.3Te be tudi te olo tǫ dage te Godigo be bogo badu elaluali, te tǫba dagana sai elaluali. Tama te be gesabidi te genuai sisinibo pesage elalubo, tama ugwaba te bidi bilibo sunumiba ugwaba tonaluali. Tama augwaligo te bede sai sela yai elaluali. Augwaligo namba 2 me namba 3 plua be sai ugwanu tomoba pelama, gana nigai elaluali. Tialima, te bego agabo togobili sela elalubo ąǫ yali. 4Tama te bede te bilibo pesage bobobage te namba 3 saide elaluali, te olo tǫ dage pąde. Te bilibo pesage ugwanu dedawali da, te 5 mita usu nama elaluali. Tama te bilibo pesage me te be bagulama pelama, tama u badu te not badu sunumi dabeba saboligi pai elaluali. Tama te bilibo sunumi te 50 sentimita usu nama elaluali. 5Te namba 3 be sai te namba 1 wan me namba 2 be sai magi magi genuai usu nama tiwai si menio. Magi baso meni. Augwaligo namba 3 plua sai ugwanu mu nigai dao. 6Augwaligo te be sai dabe augwaligo pos saide ugwadu nigai menio. Te meba sisinibo pesagede be dabe tiwai menio. Menio. Te badu tǫ te dwasianu bulu du tiwai dao, tama tialima augwaligo te be sai dabe te tǫde nidigili pai dao. Tama tialigo te namba 2 me namba 3 sai ugwanu mu gana pai elaluali.
7Te namba 1 be sai usu sali bobobage te 25 mita tama naga usu nama elaluali. Tiali goli, meba be sai dabe te 50 mita usu nama elaluali. Tama augwaligo namba 1 wan be saide augwaligo be daga deli yai elaluali. Te daga bobobage te 25 mita usu nama dao, te namba 1 be sai tiwai mu dao. 9Te obo tomode bilabo sunumi elaluyu, me te namba wan be saide me tiwai si elaluali, te bilabo pesage. Tialima, bidi te be tomoba painogo da, teda te bidi agai giliga asobo badu aselama, tama aga te bilibo sunumidu aselama, tama te be tomoba pomainao.
Tama u saut badu te Godigo be elalubo pąde te be me deli elaluali. Tama aga me te genuai be Godigo be tudi badu elalubo be pąde elaluali. 11Te saut badu te be gesabidi badu te bilibo pesage me deli elaluali. Tama te da te not badu elalubo te bilibo pesage tiwai dao. Tama te be si dąį deli tiwai si tama dao, tama te be sunumi me tigidali nai dabe deli tiwai si naga dao. 12Tialima, bidi u saut badu elalubo beba painogo yali da, teda aga giliga pedalubo badu aselama, tama te bilibo sunumi wali pelama, te be tomoba pao, te not badu elalubo be dali tiwai si tama dao.
13Tialima, te usu ni tolalubo bidigo ena dali te po wali, “Te be si te Godigo be mu dao, tama tedali gasagi yai mu dao. Te pris dabe augwali te Genuai Bidigo beba augwa sę igi pabo dao. Augwali da te be siba pomainao, tama augwaligo te we bidigo Genuai Bidibolo mani te wiegi yai tedali polalubo ofa yali nai tumainao. Te be si te Genuai Bidigo be si mu dao, augwali tedali gasagi yai mu dao. Tama tialima, te pris dabe augwaligo te we bidigo mani tedali polalubo ofa nai dabe te be side muyu emainao. Te da te wit ulubo ofa, me we bidigo sęgę sela sabo ofa, me dwai kolesaga dodolobo ofa yali, te ofa mubo be si dao,” wali.
14Tama agai te po me wali, “Te pris dabe augwali Godigo bede sę yali bidi dabe, augwaligo te be side augwaligo gudubo ugwa hasegelebo ugwa te be side hasegeleyu emainao. Te pris sę yabo gudubo ugwa te Genuai Bidigo nai ugwa dabe naga dao. Tama tiyu, augwaligo pris sę ebo ugwa hasegelama, tama augwaligo meba olo ugwa hasegelama, gudumainao. Tama elama, augwali te be si teda solama, genuai sisinibo pesageba pomainao, te da te olo we bidigo pesage dao,” te usu ni tolalubo bidigo te po wali.
Bidigo Godigo be bagulali obo usu nigo usu sali
15Te bidigo Godigo tempel be dali, me te genuai obo tomode elaluali te nai dabe sese tama usu nigo usu sali. Tama agai ena te giliga asobo badu te genuai obo sunumi badu odasa pelama, tama te genuai obo usu nigo usu sigi pali. 16Agai te usu ni selama, tama agai te badu te obo usu nigo usu sali, te giliga asobo badu. Tama agai usu sali te 250 mita usu nama elaluali. 17Tama nosali agai not badu obo usu nigo usu siyu, me saut badu, me giliga dega sabo badu obo usu nigo usu siyu yali. Tama augwali deli deligo dąį te 250 mita usu nama naga elalua pali. 20Te Genuai Bidigo tempel be bagulali obo te me si me si bogo badu elaluali. Tama te dąį tigidali bogo badu te deli tiwai si naga yali, te 250 mita usu nama naga yai yali. Te genuai obo te Genuai Bidigo tedali gasagi yai nai dabe dali, te olo nai dabe dali si tomode dąį elalubo obo dao. Te Godigo tedali gasagi yai nai dabe te obo tomode elaluyu, tama te olo nai dabe bulu badu elaluyu elaluali.
Copyright information for
MPS