‏ Acts 10

Koniliase Fitae nganabanea tesebe.

1Naka make niniino Koniliase Lom bibo awa genalin nakai komokobe. E Sisalia bib ye bianea awa genalin naka homoni 100 i kima binabe biotabe. Awa genalin naka eli niniino Itali awa genalinobe. 2Konilias ele e alelo ikam osa eka e meletan isa i Yuda nakaba otane i Gode bainobo gabianiba e niniino dobtouleb bianiba Yuda nakaia unangai inamin namin blimi daaye bianea monio okaye bianea Gode amitie nganha binabebua 3am mak bomanoa bia kwin tloa afoko delwab manoa abisake tenea baabanea Koniliaso gesea 4Koniliase abisake atemnea dlou unanea baabanea Sum kobo nimin deib tlebe? gesea abisake baabanea Kobo Gode amitie nganha bianeba eka naka mak unang maki daaye biam nabebo, Gode kukub olo watemub kenea keb bobolo funanea 5naka make niniino asube, Saimon Fita etabe. E Yoba bib ye bianea eil blumakaui aalo klamin nakae niniin aseke Saimone bekeba biebo, e amo meb aaye sole ken ye biobo, kobo nakai mo dlaneba moniba Fitae baabaiba tleko ge baabanea 7abisake unea Koniliase deibanea okok nakai asu nganabene tliba dlona bianea eka awa genalin nakae Gode wengo amitie wente bianea Koniliase bekeba binabe naka esa dobonanea 8abisake wengo baabaneo baabenea dlane moniba tamal sibnoma 9bomanoa moniba Yoba bib asak ye bebiba kelanoa Fitae utnea biin asal ut unanea Gode nganhabea 10imen tebo anasobe. Naka maki imeno mema ye fubiba Fitae inanea imen teb anasoa temea 11abilimo amisalo betelanoa youme sume flanggete ulabe abilim ut danea sayo asuke asuke nao keno tebe gieibbua sa da e wafu wafu bliba daakesea temea 12inamin namin homoni tila eila wana inaba i youme tem wat bliba yatemnabea 13weng mako baabanoa Fita kobo hananeba kulan eli yenaneba dowonale gesoa 14Fitae baanea Yeye kulan eli ne awemobo, ne mo dowonamibabo gesea 15weng olo imin baabanoa Gode baanea Uninobo gene mole kobo mo baanebta Awemobo genemebe genoa 16weng olo ohamino asumatna kenoa wentea youme imin debeb ula abilim unea 17Fitae funanea Kukub olo mitmakamo fatnamine? gabea Koniliase nakai dlane tebibi Saimone amo hente bianiba nakai baabesib alebe dlo dla dla bliba teniba amisalo kikib ye tlaniba 18Saimon Fitae am olo tem tam aalabeo? ge nganasiba 19Fitae kukub olo alebano fumbea Gode Hobe baabanea Naka maki asumatna teniba kobo hembiobo, 20kobo mo tosianabenemebe! Hananeba moneba i baka one! Nemaye dlaia tliobo gesea 21Fitae daakenea naka eli baabenea Ibo naka ele hembibe netabo, ibo nimin deib tlibe? ge baabesea 22i baabaniba Awa genalin nakai 100 i komoke niniino Konilias eta ni dlaneta tlobobo, e naka ayamobe. E Gode niniino dobtouleb bia Yuda nakai alukum fumbianiba E naka ayamobo gabiba Gode e abisake tenea baabanea Kobo nakai mo dlaneba moniba Fitae debeb tliba e wengo wentemale ge baabaseta Koniliase ni dlane tlobobo gesiba 23Fitae baabenea Ibo tam teniba am ele aaunine ge baabenea aan sibnoma bomanoa Fita esa naka elisa Yesuse bainobo galin nakai maki Yoba bib ye blib isa moniba temal sibnoma 24bomanole teniba Sisalia bib ele tetemiba Koniliase e meletani dolmina bianea eka e nekwal mak isa nganabene tenaniba miniba Fitae waisa bianiba 25Koniliase tamnea bib tam bia Fitae tesea atemnea tonton golbua daak tounea Fitae niniino dobtoulebsea 26Fitae baabanea Hananale! Kobo mo inamebe! Ne naka makob kleb ulabobo gesea Koniliase hananea 27Fitae Koniliase dab keniba weng omomniba taniba am tam teniba naka homon unang homoni am tam blibo temna bianiba 28Fitae nakaia unangai baabenea Yudai hekmel wengo baanoa Yuda nakaia unangai naka afeti mo baka nimibe! Eka i am osa mo nimibe genobu otane Gode aletnene kesoa ne funania Ne mo baanita Naka maki misiamobo genimibabo genia 29naka eli moniba baatneniba Kobo ni bekebeneba unomo geibo ne Yeye genamino deibonia tlibe. Ibo nimin weng nganatneniba tele geibta tline? gesea 30Koniliase Fitae baabanea Ne inamin namin olo tam tloa watemibuo amo aalan tebio asuke imin asuke naiobe. Inamin namin olo tam tloa watemibuo inaminobe. Ne bib ele blia kwin tloa makob memale biob enasoa tania am tam biania Gode nganhabia naka make e youmo makob ayal einin kenobuo dlusanebua tenea meb ele masea atemna bia 31baatnenea Koniliaso keb wengo Gode wentubkenea Kobo nakai inamin namin blimi monia imenao okaye binabebo memalo daabkenang gebo, kobo nakai mo dlaneba moniba Yoba bib unaniba Saimon Fitae niniin asue debeb tline! E Saimon afete eil blumakauo aal klamin nakae amo tem ye biebo, am olo meb aaye sole ken ye biobo gesea 33ne wentenita hebmamsab naka eli dlaita monibta baabkeibta tlebobe. Kobo inaneba tlebo ni funanoba Klayam nanebta tlebobo gabuobe. Ni Gode kin dimo alukum ne am ele mibiobobe. E Sume kukubo kobo alebkenebuo ni alebenale gesea 34Fitae baabenea Ne fumbio memalo Gode nakaia unangai mito mo fumbianea eka nakai niniinsai bobolo mo fumbiam biebabe. 35Ele nakaia unangai e tolo tosiam bianiba kukub ayam wafu blib ita e kla gobe biebe. 36Sino Gode weng olo Islel nakaia unanga ni omyebuo dowan weng ayam olo baanoa Yesus Klaiste nakaia unangai alukum i Sumobo, e bobol tem fiab omyebo genobiobe. 37Ibo tekein kebib yotabo, Yone aa fuayemin naka eta aayo fuaye bianea Gode wengo omkeima biam bianea eta sin okok kebeta eka Nasalet bib sak ele e okoko Galili betan ye kilonea Gode Hobe daabanea dabanea monea Yudia betan ye unea Gode e Hob esa titil osa omanea daabanea titilo omananea dabanea monea Yudia betan mak mako haabianea nakaia unangai daaye bianea eka Gululame titilo ge dlabiamo klaye bianea 39eka Yelusalem bib sel isa eka Yuda betano bib mak bib mako blib isa daaye bianea klaye biam bia ni atemnoba nisa e dowan weng olo omkayeboba i debeb moniba atdimo dabasa anaiba kaanea 40amo asu kenea make dime Gode imin dofaanea hananea naka maki atemib otane 41naka homon unang homoni mo atemim blimobe. Gode dlakanebio naka unang nita Yesuse imin hananeo atenoba ete nite nabianoba imena aayao wembiam bianoba 42Yesuse ni baabenea Gode ne nemfakanebio kesoa sinanomo ne nakaia unangai afen blib isa kulilaibbio isa i kukubo klamin naka namabibo, ibo moniba weng olo nakaia unangai alukum baabeine ge baabenebiobe. 43Sinanggwano Gode weng omkeimalin nakai Yesuse weng olo buk temo dolaniba baaniba Nakaia unangai e bainobo geib mole Gode i hengmino omtlabenamabebo ge baabenibbiobo ge oyemonea 44weng obe dim wat ye Gode Hobe daakenea nakaia unangai weng olo wentebibi i bobol temo onon tlanea wengo afet afet obianiba 45Gode niniino dobtouleb nib kesoa Yuda bib seli Yesuse bainobo galin nakai Fitae baka tlibbuei i wengo afet afeto obibo wenteniba i smiko deibe unoa i funaniba Gode Hobe Yuda naka unang ninita dobyebiobo gabob otane e naka afet isa dobyebo gesiba 47Fitae baabenea Gode Hobe dabanea tenea Yuda nakaia unanga nib bobol tem osa naka afeti bobol tem osa onon tlane kesoa ne aaye fuelabenamabibo, naka maki mo baanibta Aaye mo fuelabenemebe genimibe ge baabanea 48e Konilias esa e meletan isa imin baabenea Ibo Yesuse niniino taisaniba aaye fuelaine gesea i inaniba aaye fuelaniba Fitae baabaniba Nibo ele binobte ge baabasiobe.