Genesis 1
Abatelipuna elana Yabowaine Bugul Gegewena I Ginolil
1Abatelipuna elana Yabowaine labulabum ge panayawi i ginolil. 2He panayawi i enonovan ya, ge nigeya ga ana awa i mamasal i oola te sauga ya. Gogou kubwa wewel limwalimwanina i yabom, ge Yabowaine Yayaluwana i nononawanawa wewel pwatanaa.3 aYaka Yabowaine i ba, “Mwananal ni gan,” inoke mwananal i gan. 4Inoke Yabowaine i kite mwananal i waisi ge i yaliyaya-an. Mwananal ge gogou i teli walel, 5yaka mwananal alana i tun “lan” ge gogou alana i tun “bulin.” He bulin i gan ge lan i gan, ▼ lan houwan to.
6 cYaka Yabowaine i ba, “Hawawal ni gan wewel nuwana tabonaa ge wewel ni tagawali.” 7Yabowaine hawawal i ginol ge wewel i wali eluwe, etega i minaa hawawal pwatanaa ge etega i minaa gabulanaa. Inoke i gan i ola to. 8Yaka Yabowaine hawawal alana i tun “labulabum.” He bulin i gan ge lan i gan, lan eluwana to.
9Yaka Yabowaine i ba, “Wewel toto labulabum gabulanaa ni tub pahipahi, inoke bilibili kekevana ni masal.” Inoke i gan i ola to. 10Yaka Yabowaine bilibili kekevana alana i tun “datu,” ge wewel i tub pahipahi alana i tun “hoga.” Inoke Yabowaine i kite i waisi ge i yaliyaya-an.
11Yaka Yabowaine i ba, “Mwawin bolo enowaliya pwatum ge ebwakil bolo enowaliya pwatumwina gaganina tomaha ge tomaha nihi gan nihi siun datuwa.” Inoke i gan i ola to. 12Mwawin tomaha ge tomaha ge ebwakil tomaha tomaha hi gan hi siun datuwa. Inoke Yabowaine i kite i waisi ge i yaliyaya-an. 13He bulin i gan ge lan i gan, lan etonina to.
14Yaka Yabowaine i ba, “Mwananal ona nihi gan labulabumwa, heliya lan ge bulin nihi teli walel, nihi ola etotohi, lan, baliman, ge tal ona kaiweliya, 15ge nihi yana labulabumwa panayawi nihi yane.” Inoke i gan i ola to. 16Yabowaine mwananal bwabwatal labui i ginolil, toto mwananalina bwabwatana lan ni logugui-an, ge toto mwananalina kekeisi bulin ni logugui-an. I ola al putum i ginolil. 17Yabowaine i telel labulabumwa panayawi hi yane, 18lan ge bulin hi logugui-an, ge mwananal ge gogou hi teli walel. Inoke Yabowaine i kite i waisi ge i yaliyaya-an. 19He bulin i gan ge lan i gan, lan esopalena to.
20Yaka Yabowaine i ba, “Bugul bolo yawaliliya gaganil hoga nihi pakalaopopwi, ge bwasumu nihi youyou hawawala panayawi pwatanaa. 21Yabowaine moti bwabwatal hot ge bugul yawaliliya gaganil bolo hoga hi kalaopopwi tomaha ge tomaha i ginolil. I ola al bwasumu bolo hi youyou tomaha ge tomaha i ginolil. Inoke Yabowaine i kite hi waisi ge i yaliyaya-agil. 22Yaka Yabowaine i ba muloluagil i ba, “Moti, nuku talaabab ge nuku gewi, yaka nuku debalala hoga nuku pakalaopopwi. Bwasumu bolo ku youyou, nuku gewi yaka nuku debalala panayawi pwatanaa.” 23He bulin i gan ge lan i gan, lan nimala panunana to.
24Yaka Yabowaine i ba, “Bugul bolo yawaliliya gaganil tomaha ge tomaha nihi masal datuwa: bolo totounuwal, bolo hi yawayawal bilibili pwatanaa, ge bolo bekikil, tomaha ge tomaha.” Inoke i gan i ola to. 25Yabowaine bwasumu bekikil tomaha ge tomaha, bwasumu totounuwal tomaha ge tomaha, ge bugul bolo hi yawayawal bilibili pwatanaa tomaha ge tomaha i ginolil. Inoke Yabowaine i kite i waisi ge i yaliyaya-an.
26 dYaka Yabowaine i ba, “Gamagal ta ginol totola kanukanunula elana ge ni ola kila, yaka moti hogaa, bwasumu bolo hawawala, bwasumu totounuwal, bwasumu bekikil ge bugul bolo hi yawayawal bilibili pwatanaa gegewel nihi logugui-agil.” 27 e , fYabowaine gamagal i ginol totona kanukanununa elana, he iya Yabowaine totona kanukanununa elana i ginolil; gamagalau i ginolil tau ge yova. 28Yaka Yabowaine i ba muloluagil i ba, “Nuku talaabab ge nuku gewi, yaka nuku debalala panayawi nuku pakalaopopwi ge ni minaa wami logugui gabulanaa. Moti hogaa, bwasumu bolo hawawala ge bugul gegewel yawaliliya gaganil bolo hi nawanawa bilibili pwatanaa nuku logugui-agil.”
29Yaka Yabowaine i baek elal i ba, “Mwawin gegewel panayawi pwatanaa bolo enowaliya pwatum ge ebwakil gegewel bolo enowaliya pwatumwina gaganina ya pewa. He nuku ahel aanan kaiwena. 30Ge bwasumu gegewel panayawiya, bwasumu gegewel hawawala, ge bugul gegewel bolo hi nawanawa bilibili pwatanaa, he bugul gegewel yawaliliya gaganil, mwawin ge ebwakil lamwaliya gegewena ya pek eliyalil aanan kaiwena.” Inoke i gan i ola to. 31Inoke Yabowaine bugul gegewel i ginolil i kitel hi waisi hot ge i yaliyaya-agil. He bulin i gan ge lan i gan, lan sikisina to.
Copyright information for
MPX