2Cor 3 | MTI | STEP | Nu sira amatog numbo taibe toyau munta iyayapan anope? Onan. Nu numbo taibe toyau yentan gigirumawa nu yenan tetawa, go nunan taibe toyau muntan gigirumawa ye teyawa go, iyayapan upeba anoeme mina nu gigirum meiba anoete?

a 3:1 Apa 18:27; 2Ko 5:12

b 3:2 1Ko 9:2

c 3:3Eks 24:12; Jer 31:33; Ejk 36:26-27

e 3:6Jer 31:31; Jon 6:63; 1Ko 11:25

f 3:7Eks 34:29

g 3:9Deu 27:26; Rom 1:17

h 3:13Eks 34:33

i 3:16Eks 34:34

j 3:17 Jon 8:36; Rom 8:2

‏ 2 Corinthians 3

1 ^a Nu sira amatog numbo taibe toyau munta iyayapan anope? Onan. Nu numbo taibe toyau yentan gigirumawa nu yenan tetawa, go nunan taibe toyau muntan gigirumawa ye teyawa go, iyayapan upeba anoeme mina nu gigirum meiba anoete? 2 ^b Nu toyau yentan gigrum numawa me ye. Me nonunup tene, sira iyayapan undag anoeme sira basieme. 3 ^c Me mame taibe. Ye Keriso gigirum meuma, sira ye nau numawa natawa. Me ink ^{▼▼(3:3)Me gigirum teemewa. Me yoi mina, sira gamat me kapupun mina.} gumbe onan, God wakeviniviwa Guwawa meuma gumbe tene. Sira me an pepetu egave onan, iyayapan nonowa pepetu egave tene.

4 Kuiyawa nu imunwa yaigipamit meiba Keriso gumbe God namive auete. 5 Nu numbovit divi da nau atu watanwa oya yusiwa gunup onan, megara yusiwa numawa God gumbe uwape. 6 ^e God me Agi Mataiwa oya nau atan oya yusiwa nunne. Gigirum nauwawa atan oya onan, Guwawa nauwawa atan oya. Kuiyawa gigirum me ape iyayapan gutpe, megara Guwawa me iyayapan inaiinai mumpe.

Agi Mataiwa Eyawa Meuma

7 ^f Gigirum nauwawa me an egave tuig tenewa sira bo aug uwapewa, me gumbe eyawa ande wakepe, sira Mosisi ginangawa eyawa meuma me matai inanat aipewa gumbe, Isuraeru igiyawa oma den ane Mosisi ginangawa iyaiyai yauya ipewa, 8 Guwawa nauwawa me eyawa koka aninin? 9 ^g Iyayapan kukaeba muma taibe ane nauwawa me eyawa gumbe ipewa, God namive oraivitwa aug uwaivi nauwawa me eyawa koka aninin? 10 Numan eyawa aunewa gare eyawa me onanane. Kuiyawa gare eyawa kokavitwa uwane. 11 Inanat ainewa me eyawa gaibu ipewa, evedni wakeigimpewa me eyawa me koka aninin?

12 Meoya nu owanowan meiba auete, meoya nu yusipamit gae wata. 13 ^h Nu Mosisi ane mina den ata. Mosisi me ginangawa umiviwa wapeyawa gumbe tobodne. Kuiyawa me imive Isuraeru igiyawa den yaupe ginangawa eyawa inanatpe me onanape. 14 Megara Isuraeru kuiyowa undag boredne. Kum me apa onne gare uwane, Iyayapan agi nunganwa basiemewa umiviwa wapeyawa gina desirom ande tobod wakene. Wape me atan den auya, kuiyawa Keriso mekut gumbe atan aug aipe. 15 Ande kum gare Mosisi buka meuma basiemewa, umiviwa wapeyawa gina desirom mu nonowa tobodne. 16 ⁱ Megara bira da Ayapan gumbe tobirori aipewa, umiviwa wapeyawa me atan aug aipe. 17 ^j Ayapan me Guwawa. Sira Ayapan Guwawa wakeiviwa arawa apa ui onan waketanwa me wakene. 18 Umiviwa wapeyawa nu ginungunwa tobodnewa atan aune, nu undag Ayapan eyawa meuma ig esigimpe geyu eyawa yug taigiviwa mina. Sira eyawa koka koka aivi, nu Ayapan irawa desiroma tobiete. Ayapan me Guwawa, sira mame Ayapan gumbe aiviwa.