Act 2 | MTI | STEP | Pentikost kumiwa uwanewa, mu undag at desirom agoniyag wakeya.

a 2:1Rvt 23:15-21; Deu 16:9-11

b 2:3 Mat 3:11

c 2:4 Mak 16:17; Apa 4:31; 10:44-46; 19:6

d 2:17-21Joe 2:28-32

e 2:25-28Sam 16:8-11

g 2:291Ki 2:10

h 2:302Sm 7:12; Sam 89:3-4; 132:11

i 2:31Sam 16:10

j 2:33 Apa 5:32; 7:55-56

k 2:34-35Sam 110:1

m 2:39Ais 57:19

q 2:47 Apa 6:7; 11:21

‏ Acts 2

Pentikost Apa Guwawa Iyakaisiyapama Aigne

1 ^aPentikost kumiwa uwanewa, mu undag at desirom agoniyag wakeya. 2 Pungi den wane mu noiwa anoya, taig yusipamit kwimin apa toivi mina. Me gwe undag mu wakeyawa noidauwane. 3 ^bIyam meru pednawa minawa ube ube onke mu desirom desirom egowo wakeya. 4 ^cMu undag Guwawa Iyakaisiyapama gumbe demtawa auya. Sira mu amatog gae ube ube waya, kuiyawa Guwawa Iyakaisiyapama gae watan oya waita munne.

5 Gare, Jerusarem apa God gumbe aepam petat toeme Ju igiyawa wakeya. Mu kwimin ankwatave at undag apa onam wakeya. 6 Noiwa mame pawanewa, iyayapan obiren agoniyag uwaya. Mu teraya, kuiyawa mu desirom desirom gae muma ubeube aigowawa veme anoya. 7 Mu yaug anog teraya, sira mu waya, “Iyai mame gae vemewa undag Gariri igiyawa go? 8 Mu desirom desirom gae numawa veme mu anoetewa, mame aninin? 9 Nu Parutia, Medes, Eramaiti igiyawa, sira Mesopotamia apa, Judia apa, Kapadosia apa, Pontas apa, Esia apa, 10 Prigia apa, Pampiria apa, Ejipt ge Sairin megiyave Ribia apa vinetewa, sira Romu apa amdau onamiyawa, 11 Ju igiyawa ge iyayapan mu anotumat mumawa yankweg Ju anotumat mumawa gumbe anotumat ayawa gaibu wakeya. Sira Kurete ge Arab igiyawa mu gae numa gumbe God yusipamit aiviwa gaiyawa veme anoete. Mame aninin!” 12 Mu yaug terag anopipanum eme, sira mu garawano aya, “Mame natawa divi?”

13 Megara upeba mu gumbo iyagau ake waya, “Mu wain kokavit naya.”

Pita Iyayapan Obiren Dirumne

14 Meve Pita apasoro 11 gaibu wan yoik noiwa gae yabdapam iyayapan dirumne. “Ne iyayapan neuma Ju igiyawa ge Jerusarem apa wakeemewa undag, mame yaimoyai guniyap watna naunewa ne gunap. 15 Ye meib anovene. Megara iyayapan mame mu wain den naya, kuiyawa kum gare 9 mumbevit. 16 Mame propeta Joeru wanewa.

17 ^d‘Kum oieba God wape,
ne Guwawa neuma iyayapan undag gumbo egampna.
Ye usitainewa ge gwaiteaiwa God gaiyawa wape.
Ud mataiwa irakoniwa uyavi minawa yaupe,
sira iyai tayawa mu uyavi gumbe yaupe.
18 Me kumive, nau neuma eme igiyawa, apan ge vesin gaibu,
mu gumbo Guwawa neuma egampna,
sira mu God gaiyawa wape.
19 Ne opa kwimin danave anopipanumowa toyau muntna,
sira epa piyu egave irakoniwa toyau muntna.
Mu ganigani ge iyam ge aup dog aipewa.
20 Kum me tobiyape sisip uwape,
sira dud me tobiyape ganigani ape,
meve Ayapan eyawa kokawa kumiwa uwape.
21 Megara me apa undag me Ayapan iviwa gumbe auwapewa
matai waita waita aupe.
22 Isuraeru igiyawa ye mame anoya. God me Nasaret apan Iesu wagomiyane ye guniyap irayauyau, anopipanumowa ge at irakoniwa ane. God apan mame yenan taibe ane. Ye yembovit mame yaug anoya. 23 God yumateba ge ano meuma me matai dimbae matatpewa yaug anopewa gumbe apan mame God barau yenne. Sira ye apan mame kukaeba igiyawa nanuwo gumbo barauyana korosi egave toya boane. 24 God me bo dawaeba gumbe warinamne sira inaig yoine. Kuiyawa me gumbe mina den ane, me bo aug yumnatpe.

25 ^eDevid me oya wane:

‘Evedni ne Ayapan namunap yaveni.
Me ne nanin yutanwa apa wakene,
meoya ne ipunapun den atna.
26 Meoya ne nonenwa me degadega ane,
sira ne pednanwa degadega noiwa uwane.
Ne kwapunwa gaibu owanowan gumbe wakepe.
27 Kuiyawa ge ne guwanwa ades ^{▼▼2:27Me at kukaeba arawa. Anotumat den eme igiyawa matai ampe.}
danave den wakepe.
Apan iyakaisi geuma den kweya putaipe.
28 Inaiinai ebuwawa toyau negana,
sira ge namugap degadega neuma noidauwape.’
29 ^gTatangwanen, ne natawa di diruitna. Isimuranewa Devid boane siya, me yampotawa gare mapa gunup. 30 ^hMe propeta, meoya me anone wagoba da matai kin arawa aupe God agi gumbe wane. 31 ⁱMe yavivi ivi anin ape, Iesu sira inainewa gaiyawa wane, ‘Me ades danave evedni den kwepe kwapiwa den puwaipe.’ 32 God me Iesu mame sira inaine, sira nu undag me yangunup yautu. 33 ^jSira God Iesu aug nanin yutanwa apa baraune. Iesu Mamawa gumbe Guwawa Iyakaisiyapama aune me Mamawa me gumbe wait agi wanewa. Iesu Guwawa Iyakaisiyapama egamne gare ye mame yavene sira anoenewa. 34 ^kDevid kwimin den dog aine. Me wane, ‘Ayapan me Ayapan neuma wane. Nanin yutanwa apa wakeya. 35 Ivi ne anavi geuma ne atna amag ankwatave barautna.’ 36 ^lMeoya, Isuraeru igiyawa undag, mame yai yaug anotanit di. God me Iesu mame Ayapan ge Keriso anewa, ye korosi gumbe toyana.” 37 Meve iyayapan mame anoyawa, mu nonomagowa mut mina yuwamiya, mu Pita ge apasoro upeba gumbo waya, “Tatangwanen, nu anin aton?” 38 Pita gara wane, “Ye undag desirom desirom nonemagewa biroriyape kukaeba yeuma yankweya, sira Iesu Keriso iviwa gumbe babataito auya, me kukaeba yeuma anog yankwepe. Sira puyo meuma me Guwawa Iyakaisiyapama auya. 39 ^mAgi mame yenan ge ye usitainewa ge iyayapan undag painau wakeyawa oya munne. Natawa me iyayapan undag Ayapan God numawa wagomiya munnewa mu munan munne.” 40 Pita gae upeba gaibu taibe dirumwane, “Kukaeba kum garewa apa yaimoyai ayun wariya.” 41 ⁿIyayapan gae meumawa auyawa mu babataito auya. Me kumive iyayapan 3,000 mina agoniyag aigowawa aya.

Anotumat Igiyawa Baigan Mumawa

42 ^oMu apasoro toewanewan mumawa yaimoyai yumateme, baigan amuneme, bredi warensieme sira nun veme. 43 Iyayapan undag teraya. Apasoro anopipanumawa ge irakoniwa obiren aya. 44 ^pAnotumat igiyawa agoniyake dividivi undag divi da den wane me nekut neuma. 45 Tawara ge dividivi kusiwa mumawa gwiruwareme anmagawa auke, bira da mu anoemewa keb ag muneme. 46 Kum evedni mu temporu arawa danave danowa desirom toboreme. Mu gweyowa danave bredi warensiya sira toborake nakwai naya degadega ge danowa oraivit gumbe. 47 ^qMu God waragateme sira iyayapan undag mu gumbo baigan amuneme. Sira Ayapan kum evedni waita waita auyawa mu desirom toboraya.