‏ Hebrews 10

Keriso Membovit Wanne Iyayapan Undag Munan

1Gwangwan me gugup gaibu. Gugup me toyau nuniviwa oraiwa matai oniviwa oya. Gugup me natawa gaibu onan. Iyayapan God oya bairawan evedni omomewa me puyo maeba desirom gumbe. Meoya Gwangwan oma den ane iyayapan oraivit ape. 2Me meib di apa ipawa, mu puyo maeba wantanwa yankwepono? Kuiyawa waiya eme igiyawa mu muinne esine, sira mu kukaeba muma sira den yaug anoya. 3Megara puyo maeba mame gumbe, mu kukaeba muma sira yaug anoya. 4 ^aMae burumakau apan ge mae goot diyawa me oma den ane kukaeba muma aug aipe.

5 ^bMeoya Keriso piyu mame uwag wane,

“Ge puyo maeba ge puyo topayana,
sira nenanwa oya kwapiwa tamibarip ana.
6Ge puyo maeba undag okeremewa sira puyo maeba
ano kukaeba oya gumbo ge gungap oma den ane, topayana.
7Meoya ne wana, ‘Gare ne mapa uwana.
Buka da Baiboru danave wakenewa gumbe nenan tenewa mina,
God, ge anoegewa atanwa oya ne uwana.’”
8Namu me wane, “Mae puyowawa, puyo, puyo maeba undag okeremewa sira puyo maeba ano kukaeba oya,—dividivi undag mame mu Gwangwan gumbe wanemewa,—ge me oya den anoegewa. Sira ge gungap oma den ane.” 9Sira wanewa, “Gare, ne mapa uwana anoegewa atanwa oya.” Me duwameba aug yoitan oya namuwa itan kwene. 10 ^cGod anoiviwa gumbe Iesu Keriso kwapiwa kum desirom mekut wanne. Me gumbe, nu muin nunne esine iyakaisi atu.

11 ^dSira pirisi undag kum evedni yoieg waiya nau meuma eme, sira puyo maeba desiroma waneme. Megara dividivi mame oma den ane kukaeba aug aipe. 12Megara Keriso me kukaeba muma aug aitan oya yaibobot puyowawa desirom mekut wanne. Meve me God seyaeba yutanwa apa wakeivi. 13 ^eSira me gare mame wakeg amaraivi, ivi anaviyawa amawa deriyateba ape. 14Keriso me puyo desirom gumbe iyayapan oya nau ane onanane viripusiwa onan, anotumat igiyawa me iyakaisiyapama atan oya.

15Guwawa Iyakaisiyapama gaibu nunan oya mamaib taibe waivi,

16 ^f“Ayapan waiviwa, kum mame ivi, ne gwangwan agiyawa gumbo atna. Me mame.
Ne Gwangwan neuma nonomagave barautna,
sira nonomagave gigirum tetna.
17Sira me waiviwa, “Ne kukaeba muma ge naunababat muma
sira den imug anotna.”
18Dividivi mame God anog yankwene, meoya me apa nu kukaeba puyowawa wantanwa den anoete.

Wakewake Mataiwa Ebuwawa

19 ^gMeoya tatangwanen, nu oma ane At Iyakaisiyapama Painauvitwa danave Iesu diyawa ge degadega gumbe unikta. 20 ^hIesu nunanwa oya ebu mataiwa yaibobot wakeigimtanwa ane, ankwin wapeyawa kokawa me wata me membo kwapiwa gumbe. 21Sira nu pirisi painauvitwa me God gweyawa amaraiviwa autu. 22 ⁱDi meuma nonunmagawa apa di yoi mina veramne, sira nonunmagawa kukaeba wakenewa muinne, sira yoi iyakaisiyapama gumbe kwapunwa muinne. Meoya anotumat oraivitwa ge nonunmagawa oraivitwa gumbe, God oya anta. 23Apan me agi nunnewa me anotumat apan. Meoya anoetewa oya atan man onan siwavit yoig nu wata. 24Sira yusiwa gara wan ag, gara wa ata gara baigan niyata, anoano oraiwa ata. 25 ^jIyayapan upeba desirom agoniyatanwa topaieme. Ye meib den aigimiya. Ye gara waita aigimiya. Kum onivi koni aivi, meoya nu meib di aigimta.

26 ^kNu ano natawa wait autu. Nu kukaeba meib di aigimtawa, me apa kukaeba puyowawa da onan. 27 ^lMeiba oya nu puyuyu kumiwa ge iyam oya amaraigimta. Me apa ebu da ampa onan di. Iyam mame me iyayapan ambuwa God anavi emewa undag igampe. 28 ^mBira da Mosisi Gwangwaneba topayanewa, duwam go duwamdesi yangowo yauyawa gumbo ui onan gumbe tope boape. 29 ⁿYe yaug anoya. Bira da God Usiwa amave yan empe, sira me gwangwan agiyawa diyawa me iyakaisi anumpewa yan yaupe, Guwawa me ano oraiwa nuniviwa ayamat den ape ipewa, me anintom mina ibnapamit aupe? 30 ^oNu Me yaug anotu. Me wane, “Garawa atanwa me ne ano neumawa. Ne matai garawa atna,” sira wane, “Ayapan iyayapan pui yu mumpe.” 31God wakeiviwa nani danave aiktanwa me ui aeba.

32Kum namuwa apa, ye eyawa guniyap esine, me apa ivi ye mut kokawa gumbe edawai auveg uiwa nikiayana. Me kumiwa apa yaug anoya. 33Ye upeba mu iyagau ge yuaore toaore gumbe edawai auyana iyayapan obiren namuwo. Sira ye upeba iyayapan mu gaibu desirom toborayana. 34 ^pYe iyayapan nog danave wakeemewa munan danadawai auyana. Ye yaug anoyana ye tawara oraiwa me yaibobot tawaraeba wait auyana. Iyayapan upeba tawara yeuma oraiwa guniyap aug ampe, megara me kumiwa apa ye degadega gumbe me auyana.

35Meoya anotumat yeuma den aoreya. Me garawa yeuma obiren yempe. 36Ye uiwa di nikiatanwa yaug anoya. Me gumbe, ye God ano meuma aya, meve divi da God agi wanewa auya.

37 ^q“Kum kusi onanapeve, apan me uwatan aiviwa me uwape.
Me pungi den wape.
38Apan oraiminavitwa neuma me anotumat gumbe wakeivi.
Me a ag sira daieven aipewa, ne degadega den atna.”
39Nu a ag daieven am wakukamtanwa igiyawa onan. Nu anotumat ag inaiinai amaraigimtanwa igiyawa.