Luk 10 | MdtSC | STEP | Emana ŋa, Nkumu ovurihi oswoli alwoni akima, ekuumi ntsaami na vwele. Nde otumi bo levusu le nde, vwele vwele. Ntsa enguundu na ampuhu a nde adze odze.

Luke 10

Zezi atuma alwoni ekuumi ntsaami na vwele

1 Emana ŋa, Nkumu ovurihi oswoli alwoni akima, ekuumi ntsaami na vwele. Nde otumi bo levusu le nde, vwele vwele. Ntsa enguundu na ampuhu a nde adze odze. 2 Nde oduhi na bo ndi: «Letolo le biila ^{▼▼Baari ma dela mbari e Ndzyami, mva nguunu emi yele ma otolo biila. Ŋa atoosi a mbari akyehe.} ntsa nguunu syami, ŋa adzandzi ma otolo dzo akyehe. Levwono Nkumu a nguunu otuma adzandzi kuna. 3 Ledzyehe, me etuma be mva baana ma endoombo o mpanihi ambulu ^{▼▼Ntsa osangumu o Ndzyami, endoombo alwoni a Zezi. Mbulu nyama omo ama wwana mva, ŋa nde abumaŋa antaba bla anyama akima. Mbulu baari ma abi.}. 4 Be lekaa biriha adoro, na ampye bla akoroho ni, be i sura o ndzila ma owooso mvuuru ni. 5 Ntini e be lenyuniha ntsa ndzo mo ntu, be lesa aduha na bo mbri: “Oduusu oka o ndzo e be.” 6 Be obasaha mvuuru oduusu o ndzo dzya, oduusu oki bla nde. Nde se obisa oyamba be, oduusu ovurihi bla be. 7 Leka ntsa ndzo dzya. Be ledzi, lenyui ma ampa be. Ma oma, odzandzi ove na wura. Be i yira ma andzo otsa otsa ni. 8 Ntini e be lenyuniha ntsa onguundu oyamba be, be ledzi biila ma ampa be. 9 Be lesalihi abyeri ma ali ŋa. Be leduhi baari aso mbri: “Onkani o Ndzyami omi tsiina tuha na be.” 10 Ŋa be oto ntsa onguundu obisa oyamba be, be leyeni o mwa lebuhu na aduha mbri: 11 “Bisi lekuɓuha ogru onguundu o be ali o ntaami e bisi. Ŋa ove be ledzyaɓi mbri onkani o Ndzyami omi tsiina tuha na be.” 12 Ŋa me eselehe oduha be mbri: tsuhu e Ndzyami aya opama baari, opami a Sodoome adze oya, adze oka okyehe. Ŋa opami onguundu kya adze ovula a Sodoome onini.»

Baari ma enguundu eke abisi oyalaha Ndzyami

13 «Ŋa ndoho eka na be baari ma onguundu o Sorazi! Ndoho eka na be baari ma onguundu o Betesayida! Ma oma,emaa ma asi o mpanihi e be eki ma oka o Tiire bla Sidon, ka baari ama kaala etima, ama laasa amfa ma ampye, na lekela la ewuru o nyuru. 14 Kya obila eli, tsuhu opami, ampasi a be ma adze ovula a Tiire bla Sidon. 15 Ŋa be asi Kapenaume, be le edze ovula abuha o yulu? Kali. Ma adze opiisa we mpili akwi.» 16 Zezi ovurihi oduhi na alwoni a nde ndi: «Ntini e mvuuru ayuha be, nde ayuhi me. Ŋa abisa be, nde abisi me. Mvuuru abisa me, nde abisi mvuuru atumi me.»

Alwoni ma ekuumi ntsaami na vwele ma aya na avuriha

17 Emana alwoni ma ekuumi ntsaami na vwele, ayi na avuriha ntsa oswere. Bo na Zezi ndi: «E Nkumu, na edidima ma ebi ma enyiima bisi o nkuumi e we!» 18 Zezi ndi: «Me moni Satan ^{▼▼Like ateende kuuni Satan. Nkuumi e Dzabri e mo.} owi yulu mva epeeŋi e ngari, ovi o ntsye. 19 Leyuha, me empa be mpari ma odzye o yula antaari na angya. Na ma odzaraha mpari o nga mbele eso. Kiila si omo osa be obi kali. 20 Ŋa be lekaa swere obu mbri edidima ma ebi ma enyiima be ni. Ŋa leswere ma ankuumi a be ma ami teende o yulu.»

Zezi aswere

21 O ntsi na ntsi ŋa Zezi osweri ma Oduduma Santi. Nde ndi: «Me empa we leve Taara, Nkumu a yulu na ntsye. Ma osuumbu a we ama dzisiha maami ma na anga ntsimi bla oyeri, we ama laha na baari ma ali mva enkere. We anku Taara, mvuuru adii. 22 Taara a me ama ampa me eso. Mvuuru i yaa Mwana ni, ongula Taara. Mvuuru se i yaa Taara ni, ongula Mwana, na baari akima a Mwana adya olaha Taara na bo.» 23 Emana nde okalihi mpili alwoni ndi: «Oswere oka na be lemono maami ma. 24 Ŋa me eduha be, awoɓi a mbari e Ndzyami bla ankani kuna asahi omono maami ma. Bo aka mono a be lemono ma ni. Bo asahi oyuha a be leyuha ma, ŋa bo aka yuha ni.»

Ledya le Ndzyami bla buha

25 Ŋa oyisiŋi angri a Ndzyami omo otemiŋi, olehi Zezi oduhu ndi: «Nkumu me ma obaha lebihi le mbumbu me osa buni?» 26 Zezi na nde ndi: «Ama teende ntsa Angri ^{▼▼Angri a Ndzyami alehi Azife. Ntsa osaangumu o Ndzyami.} ndi oma? We aliiri kari buni?» 27 Nde okaali ndi: «Ove we dii Ndzyami a Nkumu a we ntsa otima a we aso, na oduduma a we, na mpari e we, na etsimihi e we eso. Ŋa ove se we odii buha le we, mva e we ama dya nyuru e we anku.» 28 Zezi na nde ndi: «We ayalihi yemihi. Sa vwa, we adze obaha lebihi.»

Ntsintsami osi Samari ove

29 Ŋa oyisihi angri a Ndzyami osahi olaha ndi oduhu a nde aki tele. Nde opisi Zezi ndi: «Ŋa buha le me na?» 30 Zezi oyahi mbari ndi: «Balaha mo aki asuruha Zerizaleme ma odze na Zeriko, embeŋe ekwari nde, ebeeri nde, epiini nde amfa, eyeni, enyili nde ntsa olaɓi. 31 Osi avwoŋi omo aki ayira o ndzila dzya, omoni mvuuru dzwa o ntsye, oyiri. 32 Odzandzi a Ndzyami omo se, ama ombisa o Levi, oyiri, omoni balaha dzya. Opesi nde, olaɓihi. 33 Ŋa osi Samari omo ayira na opiinga a nde, oto paani e nde, omoni nde, nkerihi esi nde. 34 Otsiini paani e nde, odzirihi nde maari bla mali ma ampura, emana okuri. Osaari, olehi nde o yula nyama ^{▼▼Mpili ankaka ma amo, anyama akru ali ma abiriha baari, na biiɓi.} a nde anku, obiri nde ndzo andzya, ma oselehe osalaha nde. 35 Tsuhu etsa, osi Samari otusihi adoro, ompi onga ndzo andzya, na nde ndi: “Kyele nde, adoro a we adze okaɓa ovula me oya na avuriha, me vuura we.”»

36 Zezi oluusi ndi: «O ntsa bo atari ali buha le mvuuru embeŋe ma ebeeri na?» 37 Oyisihi angri okaali ndi: «Mvuuru amoni nde nkerihi.» Zezi na nde ndi: «Dzyehe, we se sa vwa.»

Maate bla Mariya ma yamba Zezi

38 Ntini e Zezi aki o ndzila bla alwoni a nde, bo ato mpuhu mo. Okaasi a nkuumi Maate oyambi nde o ndzo e nde. 39 Nde aki na mwarihi nkuumi Mariya, oya o ntsi o paani e nyiili e Nkumu, ayuha mbari e nde. 40 Maate dzandza eki ema vula kuna. Nde owasihi ndi: «Nkumu, we i mono obi ma osuumbu a mwarihi a me ama nyila me edzandza me otu ni? Duha nde oma yamaha me.» 41 Nkumu okaali na nde ndi: «Maate, Maate, we amono ongwo we afuɓa o maami kuna! 42 Ŋa dzaa e mve eli mo ntu. Mariya ama swolo lengulu le eve, ma ali i buuna otsyese nde lo ni.»